HOME > Hotels.com 部落格

CK小鎮cover photo

捷克庫倫洛夫小鎮(Český Krumlov)位於捷克嘅南部,呢度已經有超過700年歷史,但到而家仍然保留中世紀嘅風貌,所以喺1992年被列為世界文化遺產之一。由布拉格搭巴士去CK小鎮,大約需要3個鐘。雖然要搭好耐車先去到,但絕對值得一去,去到CK小鎮就會知道點解呢度會咁吸引!

 

前往CK小鎮之交通方法

小編上次由布拉格去CK小鎮就係搭Student Agency,搭到去CK小鎮(Český Krumlov, AN)站。Student Agency喺歐洲好多地方都有服務,所以唔一定要喺布拉格出發,可以上官網睇下邊一個站最近自己,咁就最方便啦!Student agency嘅車上面仲有電視同wifi,亦會提供耳機同一杯熱朱古力同茶,價錢又唔貴,如果大家去歐遊嘅話,強烈推薦bookmark Student Agency啊!

 

Student Agency
官網:https://www.studentagency.eu/en/

 

第一日:食盡CK小鎮

第一日搭車去到CK小鎮都冇咗半日,所以第一日就hea遊陣先啦!第一站可以去食捷克傳統小食—捷克麵包卷Trdelnik。小編仲記得當時一入到小鎮,已經見到唔少遊客手拎一個雪糕麵包卷,食得津津有味,但當時都未知邊度有得買,好在皇天不負有心人,終於喺hea遊途中見到Trdelnik嘅蹤影!

Trdelnik係源自斯洛伐克捷克匈牙利等地,師傅會將麵粉圍住鐵柱上繞幾個圈,再放入焗爐入面。因為Trdelnik係即叫即做,所以可以睇到師傅整Trdelnik嘅步驟。焗完之後,師傅就會灑上杏仁、核桃、肉桂等唔同口味,亦可以喺Trdelnik入面加果醬或者朱古力醬,食落好似冬甩咁㗎!喺MLS Creperie仲可以加雪糕喺Trdelnik入面,熱辣辣嘅麵包卷加埋冰凍嘅雪糕,真係正到爆!

 

MLS Creperie
地址:Latran 12, Cesky Krumlov 381 01, Czech Republic
營業時間: 大約到傍晚

 

食完小食再周圍行下、hea下就到傍晚喇,又係時候搵地方醫肚。Papa’s Living係其中一間喺CK小鎮好出名嘅意大利餐廳,位於MLS Creperie對面,1998年就開始營業。呢間餐廳最出名就係豬肋骨,一份有四大塊,份量超多,而且肉質超軟嫩,又多汁,大推啊!雖然呢間餐廳唔算特別平,但係份量超多,而且菜色水準好高,如果多啲朋友去食就更加抵食喇!

@Flickr

 

Papa’s Living Restaurant
地址: Latrán 13, 381 01 Český Krumlov
營業時間: 09:15-00:00
官網:http://www.papas.cz/index_en.php

 

小編食完Papa’s Living Restaurant,返酒店時影㗎,仲有月亮𠻹!

 

🏨Top 10庫倫洛夫CK小鎮酒店住宿推介HK$247起 *安心價格保證*
[烏杜里美麗旅館 HK$247起,羅迪尼安東尼旅館 HK$343起,勞拉酒店 HK$382起]

 

第二日:CK小鎮歷史遊

CK小鎮已經有超過700年歷史,大部分建築物建於14至17世紀之間,主要係哥德式、文藝復興、巴洛克建築,所以一入到CK小鎮會覺得好似時光倒流返去中世紀咁。去度咁有歷史氣息嘅地方,緊係要嚟個歷史遊啦!小編就推薦買Český Krumlov Card,一張卡可以去曬五個CK小鎮主要嘅博物館,包括:

1.城堡博物館及城堡塔(Castle Museum and Castle Tower)
2.CK小鎮博物館(Regional Museum in Český Krumlov) (停啟至2018年2月26日

3.攝影博物館(Museum Fotoatelier Seidel)
4.Egon Schiele藝術館(Egon Schiele Art Centrum)
5.CK小鎮修道院(Český Krumlov Monasteries)

 

買呢張卡嘅好處除咗係價錢平一半之外,仲可以喺購買後12個月內使用,咁就唔怕限住自己一定要喺買飛果日參觀啦!

 

購買地點:Tourist Information Centre Český Krumlov
價錢:
-成人 300,- CZK;
-15歲以下小童, 26歲以下學生,65歲以上及傷殘人士 150,- CZK ;
-家庭票(最多兩名成人, 三名15歲以下小童) 600,- CZK
官網:http://www.ckrumlov.info/docs/en/CK_CARD_20131205152059.xml

 

城堡博物館及城堡塔(Castle Museum and Castle Tower)

買完Český Krumlov Card,時不宜遲,即刻開始去參觀!小編建議第一站可以去城堡博物館及城堡塔,因為呢度最多野睇同埋最多影相位,預多啲時間慢慢行,感受呢度嘅歷史氣息。城堡博物館及城堡塔位於CK小鎮嘅山丘之上,由四十幾棟建築物組成,規模僅次於布拉格城堡,係捷克第二大嘅城堡建築群。

有兩隻熊守住城堡門口㗎!

 

城堡塔係CK小鎮最靚嘅地標,建於十三世紀,喺1580年後被翻新,成為文藝復興風格嘅建築物。因為城堡塔係利用彩繪嚟裝飾外牆,亦都叫做彩繪塔。爬上塔頂需要經過147級樓梯,而且空間狹小,大家上塔頂時要小心啲!上到塔頂睇到個風景,真係嘩咗一聲,因為超.級.靚,文字已經形容唔到畫面嘅震撼!喺塔頂望落去,成個小鎮一覽無遺,加埋藍天白雲,呢個景真係冇得輸!

喺度望住經過歲月洗禮嘅小鎮同歷史建築物,時間就好似停滯咗喺中世紀時期一樣!

 

行完城堡塔,下一站可以去城堡博物館城堡博物館入面展示咗好多唔同捷克皇室展品,好似俄根勃克黃金馬車、瓷器等等,大家嚟到記得唔好錯過!

@Český Krumlov Website

 

行完城堡博物館就繼續向前行,去皇家城堡花園。行去花園途中都可以望到小鎮,沿途風景再加埋伏爾塔瓦河(Vltava River)襯托,就好似一幅畫咁,勁靚啊!

一路望住風景一路行,好快就會去到皇家城堡花園!呢度有好多植物同草地,好多本地人都會瞓喺草地上睇書同野餐,非常寫意!

 

城堡博物館及城堡塔(Castle Museum and Castle Tower)
地址:Zámek 59, 381 01 Český Krumlov
開放時間:
4月1日至5月31日 星期二至星期日9:00-17:00
6月1日至8月31日 星期二至星期日9:00-18:00
9月1日至10月31日 星期二至星期日9:00-17:00
(逢星期一休館,關閉前1小時停止進入)

 

行完博物館肚餓就去食啲野啦!地窖餐廳(Krčma v Šatlavské ulici)係當地好出名嘅餐廳,入到去餐廳,會見到以地窖為主題嘅裝飾同裝潢,牆上有好多中古時期嘅器具,好有feel㗎!喺餐廳中間有一個超大嘅烤爐,所有烤肉都係以烤爐即叫即做。可能因為用烤爐烤肉,所以烤肉外脆內軟,肉汁滿溢,份量又多,超級好食!大蒜麵包濃湯算係餐廳嘅招牌菜,好香蒜味,入面仲有好多芝士同配料,超濃郁!小編大推豬手!另外,記得提早book定位!

 

Krčma v Šatlavské ulici
地址:Tavern in Šatlavská street, Horní No. 157, 381 01 Český Krumlov
營業時間:11:00-00:00
官網:http://www.satlava.cz/en/tavern-satlava-cesky-krumlov/1/

 

🏨Top 10布拉格酒店住宿推介HK$111起 *安心價格保證*

 

第三日:泛舟遊CK小鎮

到咗第三日,小編就帶大家用第二個角度去睇下CK小鎮啦!不過點用第二個角度呢?就係去撐艇仔喇!CK小鎮環繞伏爾塔瓦河(Vltava River),所以好多水上活動可以玩㗎!小編上次去就係book Maleček Rafting & Canoe,唔單止價錢較平,又有大橡皮艇,加上多啲路線揀,百幾蚊港幣就可以玩三個鐘以上,勁抵玩!伏爾塔瓦河唔係啲咩激流,所以唔會太刺激,小朋友都可以玩㗎!除咗橡皮艇之外,都有獨木舟,大家可以因應自己嘅需求去選擇想玩嘅種類同路線,一定有一種啱你玩!

小編一開頭都冇咩期望,但因為同行嘅朋友好想玩,所以先會玩。但係一上咗船,就完全冇後悔到,因為喺河上望小鎮個feel同view都好唔同,好似重新遊一次CK小鎮咁,感覺好特別!

撐到接近尾聲,我哋四個一齊收起支槳喺河度飄浮,瞓喺艇度一路望住個天,一路聽住河水拍打岸邊嘅聲音,果刻時間好似停止咗咁,所有煩惱都拋諸於腦後,真係超正同寫意,大家嚟到一定一定一定要撐艇(好重要所以講3次),唔係嘅話一定會後悔!

 

Maleček Rafting & Canoe
地址:Kaplická 27, 381 01 Český Krumlov
營業時間:08:30-19:00
官網:http://www.malecek.cz/en/

 

體力勞動完就緊係去食啲野醫肚先啦!等小編帶你哋去食當地好出名嘅餐廳-Restaurant Na louži。呢間餐廳嘅烤鴨好出名,連小編平時唔食鴨都覺得好食,傳聞捷克總統都有嚟食過㗎!除咗烤鴨之外,炸豬排同三文魚都好好食,再配埋地道捷克啤酒,一個字-正!

@Restaurant Na louži

 

Restaurant Na louži
地址:Hotel Na louži, Kájovská 66, 381 01 Český Krumlov
營業時間:星期一至四 10:00-22:30;星期五至日 10:00-23:00
官網:http://www.hospodanalouzi.cz/en/

 

CK小鎮酒店推介

瑪勒胡維卡酒店 (Hotel U Maleho Vitka)

小編上次去CK小鎮就係住呢間酒店,酒店好近廣場,出門就可以見到城堡,去邊度都好方便。附近都有好多好食嘅餐廳。酒店係由三幢傳統捷克建築物合併而成,房間入面都係以木製傢俱佈置,保留住傳統捷克建築風貌。酒店員工都好親切,英文都好好,唔洗怕溝通唔到!

➡瑪勒胡維卡酒店 (Hotel U Maleho Vitka)⬅
地址:Radnicní 27, 契斯基庫倫洛夫, 381 01, 捷克共和國   HK$451起

 

Hotels.com 酒店優惠
睇到呢度,喺咪想即刻book酒店去CK小鎮呢?點樣先可以用至抵價錢book酒店?上Hotels.com攞我哋最新嘅優惠代碼啦!只需要click入去呢個網站https://zh.hotels.com/jiu-dian-you-hui/coupon/再copy優惠碼,然後喺付款頁面貼上優惠碼,就可以享用折扣優惠㗎啦! 仲有好多超筍酒店優惠同埋精選酒店神秘優惠價,快啲上Hotels.com用至抵價錢訂房啦!