定期送上世界各地最新、最地道嘅旅遊資訊!

【挪威自由行】挪威旅遊景點、行程、住宿攻略大全 (連挪威極光秘點推薦)

世界最幸福國家、壯麗景色、冰雪奇緣、原始森林、極光勝地,集以上印象於一身嘅挪威,係香港人夢寐以求,一生總想去一次嘅夢幻國度!不如趁住今個冬天,離開石屎森林,嚟一個浪漫嘅挪威自由行,親身體驗幸福洋溢嘅挪威城市、睇盡北歐美景,同探索挪威極光小編已經整合好一個挪威旅遊景點、行程、住宿攻略大全比大家!

 

挪威自由行|挪威行程建議
奧斯陸 (Oslo) > 弗洛姆 (Flam) > 卑爾根 (Bergen) > 斯瓦爾巴 (Svalbard)

 

挪威自由行|挪威旅遊景點推介|奧斯陸 (Oslo)

奧斯陸 (Oslo)
@Flickr

奧斯陸 (Oslo) 係挪威首都,亦係全球數一數二嘅世界級都市,每年諾貝爾和平獎都喺呢度頒發㗎!雖然奧斯陸係挪威最大,最繁華嘅城市,但其實呢度比綠樹包圍,有三分之二嘅範圍都係森林同水域,令呢度係以好山好水,景色壯麗而聞名世界。再加上城內有好多14世紀嘅歷史古蹟,淨喺係城市內漫步,已經感愛到濃厚嘅藝術文化氣息,成個人都好relax!

維格朗雕塑公園 (Vigeland Park)
@Flickr
維格朗雕塑公園 (Vigeland Park)

位於奧斯陸市中心嘅維格朗雕塑公園 (Vigeland Park) ,展示咗雕刻藝術家古斯塔夫.維格蘭嘅畢生傑作,全個公園有212座以人生為主題嘅雕塑,展現人生哲理,好值得去朝聖!

 

維格朗雕塑公園 (Vigeland Park)
地址:Nobels gate 32, 0268 Oslo, 挪威 (顯示地圖)

 

奧斯陸歌劇院 (Operahuset)
@visitnorway.no
奧斯陸歌劇院 (Operahuset)

座落於Bjorvika海濱嘅奧斯陸歌劇院 (Opera huset) 由著名建築師Snohetta設計,係繼尼德羅斯大教堂之後,挪威最大嘅藝術文化建築。呢座建築物獲獎無數,對挪威嘅重要程度就好似悉尼歌劇院咁,係挪威嘅一大地標!

 

奧斯陸歌劇院 (Operahuset)
地址:Kirsten Flagstads Plass 1, 0150 Oslo, 挪威 (顯示地圖)

 

挪威自由行|奧斯陸住宿推介|舒適快捷中央車站酒店

舒適快捷中央車站酒店
@Hotel.com

舒適快捷中央車站酒店唔單止喺中央火車站隔離,附近仲係巴士同電車站,最正係食肆同購物中心都喺左近,大部分主要景點都係步行10分鐘就到,地理位置無可挑剔!而且酒店仲提供自助check in/out服務,大家就唔洗擔心after hours會另外收費,夠哂方便!

舒適快捷中央車站酒店_2
@Hotel.com

酒店設計係以簡約北歐風為主,房間空間夠大又夠光猛,部分房間仲有大露台!可以欣賞奧斯陸市景觀!正!

 

舒適快捷中央車站酒店
地址:NOR奥斯陸Fred Olsens Gate 11 (顯示地圖)
星級 | ★★★☆☆  
位置 | ★★★★★  
設施 | ★★★☆☆  
環境 | ★★★☆☆
價格 | 查看價格

 

挪威自由行|奧斯陸去弗洛姆交通
由奧斯陸去弗洛姆要先坐挪威國鐵去到米達爾,記得要上挪威國鐵NSB嘅網站預訂車票。然後就喺米達爾轉坐弗洛姆高山鐵路去到弗洛姆。

 

 

挪威自由行|挪威旅遊景點推介|弗洛姆 (Flam)

弗洛姆 (Flam)
@Flickr

弗洛姆 (Flam) 係位於挪威著名松恩峽灣內嘅一條小村落,人口只有350人,四周被湖泊同高山綠樹包圍,風光明媚,猶如人間仙境!小小嘅村落,但有無窮嘅驚喜!因為呢度有號稱世上最美麗鐵道路線,有世上最窄嘅峽灣同最特別嘅觀景台,絕對係挪威必到之地!

弗洛姆高山鐵路 (The Flam Railway)
@visitnorway.no
弗洛姆高山鐵路 (The Flam Railway)

乘搭被《Lonely Planet》評為「全球最不可思議火車路線」嘅弗洛姆高山鐵路 (The Flam Railway),係挪威之旅唔可以錯過嘅行程!弗洛姆高山鐵路係歷時20年建造,世上修建難度極高嘅鐵路奇蹟,而沿途所經過嘅路段,唔單止係挪威最壯觀嘅景色,更加係地球上保留得最原始嘅自然風貌!

 

弗洛姆高山鐵路 (The Flam Railway)
地址:A-Feltvegen 11, 5742 Flåm, 挪威 (顯示地圖)
費用 (只供參考)來回車程 490NOK起 ※會因季節而有所調整
網址:https://www.visitflam.com/

 

斯泰格斯坦觀景台 (Stegastein Viewpoint)
@Flickr
斯泰格斯坦觀景台 (Stegastein Viewpoint)

斯泰格斯坦觀景台 (Stegastein Viewpoint) 係由峽谷懸崖延伸出30米,距離河面650米,可以飽覽艾于蘭峽灣全景嘅觀景台。最特別之處係觀景台最末端只有一塊透明玻璃,刺激得嚟又可以零死角欣賞美景!

 

斯泰格斯坦觀景台 (Stegastein Viewpoint)
地址:Bjørgavegen 83, 5745 Aurland, 挪威 (顯示地圖)

 

挪威自由行|弗洛姆去卑爾根交通
由弗洛姆去卑爾根可以坐火車,巴士或者係渡輪。小編建議大家不妨坐渡輪,可以欣賞松恩峽灣嘅景色!主要嘅渡輪公司係Norled,大家可以上網訂票。

 

挪威自由行|挪威旅遊景點推介|卑爾根 (Bergen)

卑爾根 (Bergen)
@visitbergen

卑爾根 (Bergen) 係挪威第二大城市,亦係歐洲其中一個最大嘅郵輪港。因為有連綿山丘同五顏六色嘅小屋交織,加上迷人海港景色,令呢度成為挪威最有童話feel嘅都市!喺1299年前,卑爾根曾經係挪威首都,蘊含著挪威重要嘅歷史,呢度嘅舊城區更加被列入世界文化遺產𠻹!

布呂根 (Bryggen)
@Flickr
布呂根 (Bryggen)

係已經有超過700年歷史嘅區域,呢度集中咗62幢仍然保留北歐古老風貌嘅木屋。大家可以喺彩色木屋之間嘅小巷同特色店鋪穿梭,感覺真係好似童話世界!每個角落都係打卡影相位!必到!

卑爾根魚市場(Fisketorget)
@Flickr
卑爾根魚市場(Fisketorget)

既然係歐洲最大海港之一,海產當然係非常豐富啦!所以嚟到卑爾根就一定要去漁市場大吃特吃至靚至新鮮嘅海鮮! 除咗超鮮甜嘅特大蝦蟹,大家千祈唔好錯過以前只有皇室先可以食嘅魚子醬呀!

 

卑爾根魚市場(Fisketorget)
地址:Torget 5, 5014 Bergen, 挪威 (顯示地圖)
營業時間:每日09:00-23:00

 

挪威自由行|卑爾根住宿推介|麗笙卑爾根皇家酒店

麗笙卑爾根皇家酒店
@hotel.com

麗笙卑爾根皇家酒店座落於卑爾根舊城區布呂根,鄰近海濱,同彩色木屋相連,無論係地點定係四周景色都係一流!酒店除咗提供免費早餐,同wifi,仲有健身室同酒吧,設備非常完善!

麗笙卑爾根皇家酒店_2
@hotel.com

酒店房間簡約時尚,用色柔和,再加上木地板,整體感覺溫韾舒服!喺咁優美嘅環境,住咁舒服嘅酒店,真係成個人都身心舒暢!

 

麗笙卑爾根皇家酒店
地址:NOR卑爾根Bryggen 5 (顯示地圖)
星級 | ★★★★☆  
位置 | ★★★★☆  
設施 | ★★★★☆  
環境 | ★★★★☆
價格 | 查看價格

 

挪威自由行|卑爾根去斯瓦爾巴交通
因為斯瓦爾巴喺挪威最北嘅島嶼之上,所以無陸路交通可以到達,最快同最直接嘅方法就係坐內陸機,大概預5-6個鐘嘅航程。

 

挪威自由行|挪威極光秘點推薦|斯瓦爾巴 (Svalbard)

斯瓦爾巴 (Svalbard)
@Flickr
斯瓦爾巴嘅Sarkofagen山同北極光互相輝映

走訪完挪威各個必去絕美景點,壓軸活動就梗係睇北極光啦!好多人都以為挪威嘅特羅姆瑟 (Tromso),係睇極光嘅最佳地點!但其實喺挪威同北極中間嘅斯瓦爾巴 (Svalbard),先係睇極光嘅真正勝地!斯瓦爾巴位於北緯78度,係最近接北極嘅地方,所以最容易睇到極光!

斯瓦爾巴 (Svalbard)_2
@Flickr

每年10月至3月,整個斯瓦爾巴都會差唔多係全天侯黑夜,任何時間都有機會捕捉到極光嘅幻彩!能夠可以喺咁原始嘅極地,欣賞到世上最美麗嘅光芒,真係足夠回味一生!

 

挪威自由行|斯瓦爾巴住宿推介|瑪麗安波拉里格酒店

瑪麗安波拉里格酒店
@hotel.com

嚟到斯瓦爾巴,小編推介大家入住充滿原始感覺嘅瑪麗安波拉里格酒店!酒店以木同石為主要建築物料,成間酒店都有木香味,比人一種好wild嘅北極風情,但唔好似為酒店好簡陋呀!酒店嘅設備係好完善,好乾淨整齊!而且仲有露天同室內SPA,比客人喺冰天雪地之下好好relax!

瑪麗安波拉里格酒店_2
@hotel.com

酒店嘅傢俬同擺設都好有北歐復古感,入住呢度真係別有一番風味!而且部分酒店房間內仲有超大按摩浴缸,真係無得輸!

 

瑪麗安波拉里格酒店
地址:SJM朗伊爾城Longyearbyen (顯示地圖)
星級 | ★★★☆☆  
位置 | ★★★★☆  
設施 | ★★★☆☆  
環境 | ★★★☆☆
價格 | 查看價格

 

 

📖延伸閱讀:【北歐自由行】法羅群島旅遊全記錄2018 (景點+餐廳+住宿+交通大全)
📖延伸閱讀:【冰島自由行】冰島極光邊度睇?連冰島自駕遊租車攻略及住宿推薦
📖延伸閱讀:【加拿大極光】黃刀鎮自由行—加拿大黃刀鎮極光遊記 (連黃刀鎮景點自駕攻略)
📖延伸閱讀:【追蹤粉紅極光】塔斯曼尼亞南極光地點、時間、季節攻略2018!
📖延伸閱讀:【紐西蘭自駕遊】3個最大機會睇到紐西蘭極光嘅景點+紐西蘭手信之選+極光追蹤手機App推介

 

 

Hotels.com酒店優惠Hotels.com酒店優惠