定期送上世界各地最新、最地道嘅旅遊資訊!

【慕尼黑自由行攻略】慕尼黑景點行程路線推薦 — 慕尼黑美食、交通、住宿總整理!

 

一講到慕尼黑,就會諗到每年吸引過百萬人蜂擁而至參加嘅啤酒節!但其實慕尼黑又點止啤酒節咁簡單!慕尼黑係南德首府,既保留著巴伐利亞歷史風情,亦同時係歐洲最現代化同開放城市之一!而且周邊仲有多個童話式小鎮同風光如畫嘅近郊景點!以下已經整理好必玩慕尼黑景點、美食、交通,住宿攻略比大家!慕尼黑自由行無難度啦!

 

📖延伸閱讀:【歐遊攻略篇】歐洲旅遊必讀!3大歐洲自由行路線及常見問題!
📖延伸閱讀:【歐洲上網卡推介】歐洲電話卡大評比!邊隻歐洲Sim Card最抵?!

 

慕尼黑自由行|慕尼黑景點推薦|BMW博物館

BMW博物館

BMW博物館獨特嘅飯碗型外觀,係慕尼黑地標性嘅建築物之一,整座博物館由內到外都充滿超現代感設計,無論你係唔係愛車之人,呢度都係慕尼黑絕不可錯過嘅景點!平日喺街上都經常見到BMW、Mercedes-Benz、Porsche嘅靚車,原來呢幾個風摩全球嘅名車品牌都係源自德國!究竟德國嘅汽車生產業點解會咁成功?去完BMW博物館睇睇就知!

BMW博物館_2

博物館內展示咗BMW成立歷史、生產過嘅車款、設計理念等等。成日聽人講歐洲車「鋼水好」,睇完博物館就完全feel到BMW真係不負其名!BMW原先係生產飛機引擎,後來引入航空技術去製造汽車,每一個細節同造車工藝都非常精湛。行完一轉博物館,一定要行埋show room,買返架BMW做歐洲手信都幾好喎!

 

BMW博物館
地址:Am Olympiapark 2, 80809 München, 德國 (顯示地圖)
交通:乘坐U-Bahn U3線,喺Olympiazentrum站落車,步行3-4分鐘
營業時間:每日 10:00-18:00 逢星期一休息
費用 (只供參考)成人 €10;18歲以下兒童及青少年 €7
網址https://www.bmw-welt.com/de/locations/museum.html


📖延伸閱讀:【慕尼黑景點】慕尼黑自由行程攻略-安聯球場、BMW博物館、奧林匹克公園!

 

慕尼黑自由行|慕尼黑景點推薦|瑪利亞廣場 (Marienplatz)

瑪利亞廣場 (Marienplatz)

瑪利亞廣場係慕尼黑市中心最旺地帶,哥德式建築嘅新市政廳、卡爾門、瑪利亞圓柱、聖母教堂幾個地標都集中喺呢度!除咗有古典建築,瑪利亞廣場更加係購物狂嘅天堂!德國「喼神」Rimowa、孖人牌刀具、藥妝、潮流服飾等等,通通都可以喺度搵到!

瑪利亞廣場 (Marienplatz)_2

有景點又有得shopping,當然唔少得餐廳,建議大家可以行到攰就喺附近食晚餐,然後再次去到廣場中央睇夜景!新市政廳係夜燈照射下更有魔幻feel,而且每日中午11:00,12:00同下午17:00,21:00市政廳上嘅木偶鐘都會有同真人大小一樣嘅木偶表演歌舞報時,千祈唔可以錯過!

 

瑪利亞廣場 (Marienplatz)
地址:Marienplatz 15, 80331 München, 德國 (顯示地圖)
交通:S-Bahn S1-4,6-8號線或U-Bahn U3, U6線,Munich Marienplatz站落車。

 

📖延伸閱讀:【德國必買2018】德國手信系列清單!(連慕尼黑自由行住宿推薦)

 

慕尼黑自由行|慕尼黑景點推薦|新天鵝堡 (Neuschwanstein)

新天鵝堡 (Neuschwanstein)
@flickr

慕尼黑必去近郊景點絕對係非全世界最童話嘅地方新天鵝堡莫屬!新天鵝堡係19世紀由巴伐利亞國王路德維希二世所創建,建築融合咗傳統歌德式同巴洛克風格,以天鵝為主題,城堡內大多嘅裝飾同家具都係天鵝造型!整座城堡由內到外都極之氣派奢華!而咁夢幻嘅設計,正正就係迪士尼城堡嘅藍本!能夠親臨迪士尼城堡,一定會成為畢生難忘嘅經驗!

新天鵝堡 (Neuschwanstein)_2
@Potatofishyu

唔單止城堡宏偉,四周圍景色更加係壯麗絕美!高低起伏的山巒同清澈平靜嘅Alpsee湖,加上舊天鵝堡,一片景色如詩如畫,真係靚到令人窒息!

 

新天鵝堡 (Neuschwanstein)
地址:Neuschwansteinstraße 20, 87645 Schwangau, 德國 (顯示地圖)
交通:乘坐DB鐵路,去到Füssen站,再喺車站旁轉坐73或78巴士,到達Hohenschwangau Neuschwanstein Castles站落車,可以步行或乘坐馬車上山。
營業時間:每日 08:00-17:00
費用 (只供參考)成人 €13;18歲以下兒童及青少年免費入場
網址http://www.neuschwanstein.de/

 

📖延伸閱讀:【迪士尼城堡藍本】德國必去!舊、新天鵝堡交通行程攻略懶人包!

 

慕尼黑自由行|慕尼黑景點推薦|國王湖 (Konigssee)

國王湖 (Konigssee)
@flickr

好多人去慕尼黑自由行,多數都會將位於接近奧地利邊境嘅國王湖列入行程之內,但其實由慕尼黑去都要接近2小時車程,究竟呢個地方有咩吸引力?國王湖被阿爾卑斯山脈圍繞,湖水由冰河時期後冰川溶化而成,係世上最清澈嘅湖泊!藍綠色湖水,加上壯觀山色,無論無夏天綠意盎然,定冬天冰凝雪積,都係一片人間仙景!

國王湖 (Konigssee)_2
@flickr

國王湖畔有一間聖巴爾多祿茂教堂,因為紅色洋蔥頭嘅外觀,令呢度又稱為紅蔥頭教堂。 雖然唔係好大,但獨特嘅造型同國王湖互相映襯,構成獨一無二嘅畫面。如果無呢座教座,國王湖亦會失色不少,同樣地,如果無國王湖,教堂亦唔會咁突出!

 

國王湖 (Konigssee)
地址:83471 Schönau am Königssee (顯示地圖)
交通:乘坐DB鐵路,去到Freilassing站轉車去到Berchtesgaden站,再喺車站旁轉坐RVO841巴士,到達站Konigssee落車

 

📖延伸閱讀:【德國自由行攻略】薩爾斯堡一日遊 — 德國薩爾斯堡國王湖交通、住宿攻略!

 

慕尼黑自由行|慕尼黑交通攻略

慕尼黑交通攻略

喺德國玩,就連坐車都係一種享受!德國火車同地鐵網絡發展完善,無論去任何地方,乘坐MVV地鐵同DB國鐵都可以到達!而且每一個地鐵同火車站都各有特色,有時仲會坐到懷舊款嘅列車𠻹!

慕尼黑交通攻略_2
@MVV

喺慕尼黑市內主要乘坐MVV地鐵,MVV亦分為S-Bahn城郊列車同U-Bahn市內地鐵。車票主要分為3種:Single €2.90/1 Zone;Stripe Card (1小時內可乘坐最多4次) €2.80/1 Zone; Day Ticket €6.70/人,€12.80/2-5人共用團體票。

慕尼黑交通攻略_3
@Bahn

DB國鐵除咗可以去德國唔同嘅城市,亦可以去到鄰近國家例如奧地利。如果有2個人以上,無論去邊個目的地,買Bayern Ticket一日邦內通行票一定係最平。慕尼黑位於巴伐利亞邦內,所以一張Bayern Ticket可以通用於巴伐利亞邦內嘅所有交通,包括MVV、巴士同電車。Bayern Ticket €25/人,每多一人多€7,最多可以5人共用。

 

慕尼黑自由行|慕尼黑美食推薦|Hofbrauhaus皇家啤酒屋

Hofbrauhaus皇家啤酒屋

嚟到德國又點可以唔飲啤酒?想一次過品嚐美酒佳餚同參觀景點?去全世界最大嘅Hofbrauhaus皇家啤酒屋就一定唔會錯!位於慕尼黑嘅Hofbrauhaus已經有超過400年歷史,原先係只供應酒比皇室嘅啤酒屋,所以內部設計充滿宮廷feel!而家已經成為平民飲酒狂歡嘅勝地!入面大到可以容納足足3500人,真係夠哂誇張!

Hofbrauhaus皇家啤酒屋_2
Crispy Roasted Knuckle of Pork €14.90

去到啤酒屋就梗係要飲啤酒!當地人教一定要飲黑啤先係最純正最好飲!飲啤酒又點可以唔配德國必食嘅豬腳?呢度嘅德國豬腳製法傳統,外層烤到脆卜卜,內層肉質煙韌多汁,煮到焾哂嘅軟骨令成隻豬腳帶有黏黏地嘅口感,香味更濃!配埋彈滑嘅薯球一齊食,好味到一個人可以食哂咁大份都唔覺膩!

 

Hofbrauhaus皇家啤酒屋
地址:Platzl 9, 80331 München, 德國 (顯示地圖)
營業時間:每日 09:00-23:30
網址http://www.hofbraeuhaus.de/en/

 

慕尼黑自由行|慕尼黑美食推薦|California Bean

California Bean

喺慕尼黑搵食,豬腳、啤酒、腸仔周圍都係,德國人連早餐都可以飲啤酒!亞洲人未必習慣,如果有時想食吓啲無咁heavy嘅嘢?推薦大家去呢間隱世cafe!California Bean係一間融合巴伐利亞同美國西部風格嘅Cafe,主要做早餐、輕食、沙律同糕點。Cafe比人一種悠閒舒適,好warm嘅感覺!喺到嘆個早餐,成個人精神哂!

California Bean_2

食物以美式早餐為主,但最欣賞係無美式食物嘅油膩厚重感,反而著重以簡單嘅方法炮製,突出食材本身滋味同保留食物營養,好味又健康!每日仲有唔同口味嘅鹹或甜pancake,唔同季節仲有特別口味!充滿驚喜!

 

California Bean
地址:Dachauer Str. 12, 80335 München, 德國 (顯示地圖)
營業時間:每日 06:30-16:00
網址https://www.california-bean.de/

 

慕尼黑自由行|慕尼黑住宿推薦|慕尼黑瓦迪六酒店

慕尼黑瓦迪六酒店

慕尼黑瓦迪六酒店位於慕尼黑火車總站旁邊,鄰近多個著名景點,行去瑪利亞廣場、皇家啤酒屋同卡爾斯廣場都只係20鐘內路程,地理位置極佳!酒店以簡約,休閒風為主,設計大方時尚!喺德國睇完咁多古跡同靚景,難免會有審美疲勞,住返間走簡約主義嘅酒店,平衡吓都係唔錯嘅選擇!

慕尼黑瓦迪六酒店_2

呢間酒店最大驚喜就係房間內附帶小型廚房,想整吓簡單嘅早餐或者宵夜都唔係問題!仲要有埋餐枱!但空間仍然好大好足夠,絕對係玩完一日休息吓,Chill吓嘅最佳地方!

 

慕尼黑瓦迪六酒店
地址:DEU慕尼黑Marsstrasse 6-10 (顯示地圖)
星級 | ★★★☆☆  
位置 | ★★★★★  
設施 | ★★★☆☆  
環境 | ★★★☆☆  
價格 | 查看價格  

 

慕尼黑自由行|慕尼黑住宿推薦|國王城市酒店

國王城市酒店

想位置方便,但又怕喺太繁榮區域會太嘈嘅,國王城市酒店就啱哂大家!呢間酒店喺慕尼黑車站後一條街,相對較為寧靜,但一行返出少少就係食肆同商店,靜中帶旺!小編推介嘅California Bean就喺酒店樓下,夠哂方便!

國王城市酒店_2

雖然唔係5星高級酒店,但勝在設計夠grand,夠luxury,加上細心服務,一定比到大家高級享受!房間寬敞,而且採用高級被褥,仲有46寸平面電視,就連提供嘅梳妝用品都係名牌,會唔會喺酒店房hea到唔想出去呢?

 

國王城市酒店
地址:DEU慕尼黑Dachauer Straße 12 (顯示地圖)
星級 | ★★★★☆  
位置 | ★★★★★  
設施 | ★★★☆☆  
環境 | ★★★★☆  
價格 | 查看價格  

 

📖延伸閱讀:【瑞士自由行】瑞士遊記 — 坐瑞士火車 嘆零污染舒適假期!
📖延伸閱讀:【奧地利自由行】音樂‧藝術‧咖啡館—3日2夜慢活維也納景點行程、美食懶人包
📖延伸閱讀:【荷蘭過暑假】$600蚊有找!阿姆斯特丹住宿推薦 (連紅燈區觀光指南)
📖延伸閱讀:【波蘭自由行】從維利奇卡鹽礦、奥斯威辛集中營探索東歐歷史
📖延伸閱讀:【布拉格自由行】布拉格市內散步地圖連布拉格景點一覽 (布拉格必買小物推介)

 

Hotels.com酒店優惠Hotels.com酒店優惠