定期送上世界各地最新、最地道嘅旅遊資訊!

【愛爾蘭自由行】愛爾蘭景點懶人包 — 都柏林自由行景點行程、餐廳、住宿推薦!

都柏林由中世紀開始就係愛爾蘭首都同最大嘅城市。有別於一般歐洲古色古香嘅城市,呢度聚集咗好多高科技企業,所以有歐洲矽谷之稱。既有現代化發展,同時亦保留好多歷史遺跡,再加上蘊藏獨特嘅凱爾特同維京文化,令呢度成為一個古今文化薈萃嘅都市!今次就為大家整合一個都柏林自由行懶人包,推介必玩愛爾蘭景點行程、餐廳同住宿,再教埋大家都柏林交通攻略𠻹!

 

📖延伸閱讀:【歐洲上網卡推介】歐洲電話卡大評比2018!邊隻歐洲Sim Card最抵?!
📖延伸閱讀:【最強歐洲火車路線】歐洲之星巴黎 – 倫敦 – 布魯塞爾景點懶人包! (連票務行李全攻略)

 

愛爾蘭自由行|都柏林自由行景點|聖三一座堂 (Christ Church Cathedral)

聖三一座堂 (Christ Church Cathedral)
@flickr

聖三一座堂,又名基督教會座堂,係都柏林最古老嘅教堂,始創於1030年代,後來經過兩次重建,雖然同當初嘅模樣已經唔一樣,但歷史價值仍然好高!教堂現今嘅面貌充滿維多利亞時期嘅建築風格,非常有氣派!而連接著旁邊教會會堂Synod Hall嘅一道橋,令教堂添上夢幻童話feel,成為都柏林必去instagram打卡位!

聖三一座堂 (Christ Church Cathedral)_2
@flickr

教堂內仍然保留著歌德式拱頂,而花磚同彩色花窗更令教堂華麗高雅,比起歐洲各大著名教堂,毫不遜色!而呢個教堂最大特色,就係有一個全英國最大嘅教堂地窖,入面有好多精緻大理石彫像同歷史文物,好值得參觀!仲可以爬上鐘樓,欣賞埋利菲河嘅景色!

 

聖三一座堂 (Christ Church Cathedral)
地址:Christchurch Pl, Wood Quay, Dublin 8, 愛爾蘭 (顯示地圖)
LUAS車站:Smithfield或Westmoreland
營業時間:星期一至六09:00-18:00;星期日 12:30-14:30,16:30-18:00 ※會因季節而有所調整
入場費用 (只供參考)成人 €7.00;5-15歲小童 €2.50
網址http://www.christchurchdublin.ie/

 

愛爾蘭自由行|都柏林自由行景點|健力士啤酒倉庫 (Guinness Storehouse)

健力士啤酒倉庫 (Guinness Storehouse)
@flickr

喺愛爾蘭,Guinness黑啤酒可以稱得上係國民飲品!好似去到任何一間餐廳,都有得飲Guinness黑啤!可見Guinness呢個古老啤酒品牌對愛爾蘭人影響有幾深!嚟到都柏林,一定要去Guinness啤酒廠,了解吓黑啤令愛爾蘭人著迷嘅原因!

健力士啤酒倉庫 (Guinness Storehouse)_2
@facebook

啤酒廠一共有7層,設計型格,整體感覺神秘而高貴,淨喺建築本身都好有睇頭!每一層除咗介紹創辦嘅歷史同啤酒製作方法,仲有好多比大家親身體驗嘅設施!參觀完之後,仲可以去到最頂層由玻璃外牆建成嘅圓形大酒吧,大家可以一邊品嚐採用都柏林山脈水源釀製而成嘅Guinness純黑啤,一邊欣賞360度全方位都柏林市景!

 

健力士啤酒倉庫 (Guinness Storehouse)
地址:St James’s Gate, Dublin 8, 愛爾蘭 (顯示地圖)
LUAS車站:Fatima
營業時間:每日9:30-17:00 ※會因季節而有所調整
入場費用 (只供參考)成人 €18.50;13-17青少年 €16.00
網址https://www.guinness-storehouse.com/en

 

愛爾蘭自由行|都柏林自由行景點|三一學院 (Trinity College)

三一學院 (Trinity College)
@flickr

有超過400年歷史嘅三一學院係愛爾蘭最具代表性嘅大學,同牛津、劍橋、哈佛、耶魯等等世界名校齊名!係都柏林人嘅驕傲!三一學院建築古樸而帶濃厚英倫風格,宏偉嘅鐘樓同猶如城堡般嘅學院,令呢度被《Forbes》雜誌評為世上最靚校園之一!

三一學院 (Trinity College)_2
@flickr
The Book of Kells

而三一學院內嘅圖書館,更加係名列世界頂級圖書館之一!先講圖書館古典嘅設計,吸引咗唔少電影以此地為電影場景!《哈利波特》內嘅霍格華茲圖書館就係喺呢度拍攝!裏面有超過20萬本古老嘅書籍,彷彿每一本打開就會藏著一個一個神奇嘅咒語,帶大家進入魔法世界!而最有價值嘅藏書就係愛爾蘭國寶《凱爾斯之書》,係世上最古老同最華麗嘅手抄本《聖經》!呢個圖書館每年都吸引唔少世界各地嘅人嚟朝聖,經常都要排長龍,仲要買飛先可以入去!大家如果想避開人潮,記等早啲嚟啦!

 

三一學院 (Trinity College)
地址:College Green, Dublin 2, 愛爾蘭 (顯示地圖)
LUAS車站:Trinity
開放時間:星期一至六 09:30-17:00 ;星期日 12:00-16:30 ※會因季節而有所調整
圖書館入場費用 (只供參考)成人 €10;學生 €9
網址https://www.tcd.ie/

 

愛爾蘭自由行|都柏林自由行景點|鳳凰公園 (Phoenix Park)

鳳凰公園 (Phoenix Park)_2
@CultureTrip

鳳凰公園位於都柏林市中心,號稱歐洲最大最靚嘅市區公園,佔地707公頃,愛爾蘭總統府、威靈頓紀念碑、美國大使館、教皇十字架呢幾個重要嘅建築亦座落於公園內,集自然環境同歷史意義於一身!愛爾蘭亦正積極申請呢度成為世界文化遺產𠻹!除咗遊客,當地人平日都好鐘意嚟鳳凰公園踩單車同野餐,大家不妨都喺公園踩吓單車,感受當地人好chill嘅生活!

鳳凰公園 (Phoenix Park)_2
@DublinVisitorCentre

雖然公園又大又靚,不過睇紀念碑同總統府並唔係最吸引小編之處,而係鳳凰公園內嘅鹿園!鹿園喺17世紀由當時總督所建,原先係屬於皇家,但後來開放比公眾觀賞。大家嚟到,一定要去尋找仍然聚集喺到嘅野生鹿群!不過見到鹿仔都唔好太興奮,要慢慢去親近,唔好嚇親佢地呀!

 

鳳凰公園 (Phoenix Park)
地址:Phoenix Park, Dublin 8, 愛爾蘭 (顯示地圖)
LUAS車站:Heuston
網址http://www.phoenixpark.ie/

 

愛爾蘭自由行|都柏林自由行活動推薦|Viking Splash Tours

Viking Splash Tours
@VikingSplashTours

觀光巴士差唔多係每一個大城市都有嘅旅遊活動,對成日去旅行嘅人嚟講,唔算係有咩咁特別,一般都未必會參加。但喺都柏林就有一間公司Viking Splash Tours,以戰時所用嘅水陸兩用車嚟做觀光巴士!先帶大家喺陸上穿梭都柏林市,沿途會經過三一學院、聖派翠克大教堂、政府大廈等等著名景點。

Viking Splash Tours_2
@Flickr

然後就會喺有歐洲矽港區之稱嘅Grand Canal dock落水遊覽!四周圍都係現代化建築,仲有好多時尚嘅酒吧餐館!愛爾蘭最大最有現代感嘅德蓋斯能源劇院都喺呢度㗎!

 

Viking Splash Tours
地址:St Stephens Green North, Dublin 2, 愛爾蘭 (顯示地圖)
LUAS車站:St Stephen’s Green
營業時間:每日 10:30-16:00
費用 (只供參考)成人 €21.25-€27.00;2-14歲小童 €11.05-€15.00
網址http://www.vikingsplash.com/

 

都柏林自由行電車LUAS攻略

都柏林自由行電車LUAS攻略
@IrishMirror

都柏林最主要有巴士、Dart火車同Luas電車3種交通,其實巴士就最方便,但都柏林塞車問題好嚴重,所以小編建議大家可以坐Luas。雖然唔係個個景點都可以點到點,一落車就到,但大部分景點10鐘內嘅步行路程就會有一個Luas車站。而且都柏林市景本身都好值得漫步欣賞,就算要行都唔算好辛苦!

都柏林自由行電車LUAS攻略_2
@luas.ie

Luas主要分為紅同綠兩條線,非常簡單,主要景點集中喺Westmoreland、St. Stephen’s Green、O’Connell Street GPO同Trinity呢幾個站。大家可以喺任何一個車站嘅售票機買1 Day Flexi Ticket,成人票價係€7.30,小童票價係€3,只要上落車時候拍卡就可以。

 

愛爾蘭自由行|都柏林餐廳推薦|Fish Shack Cafe

Fish Shack Cafe
@fishshack

都柏林係一個沿海城市,海產非常豐富,嚟到一定要食海鮮!而Fish Shack Cafe係一間性價比極高嘅海鮮餐廳!餐廳走休閒酒吧風,食物大份得嚟好有水準,海鮮夠新鮮之餘,炮製方法多樣化!唔似一般西餐,淨喺以炸同烚嘅方法處理海鮮。除咗海鮮,佢地自家品牌嘅啤酒都好正㗎!必試!

Fish Shack Cafe_2
@fishshackcafedublin
Sailors Shellfish Medley €19.50

樣樣海鮮都咁吸引,想一次過食哂咁多款海鮮就可以點呢個Sailors Shellfish Medley海鮮拼盤啦!一大盤蕃茄魚湯入面,有青口、魷魚、大蝦,仲有BB薯仔同甜粟米!未食落口都可以想像到有幾鮮甜!仲可以一次過滿足哂所有願望𠻹!

 

Fish Shack Cafe
地址:1 The Diamond, New Street, Malahide, Co. Dublin, 愛爾蘭 (顯示地圖)
營業時間:每日 12:00-22:00
網址https://fishshack.ie/

 

愛爾蘭自由行|都柏林餐廳推薦|The Temple Bar Pub

The Temple Bar Pub
@flickr

無嚟過The Temple Bar就等於無嚟過都柏林!The Temple Bar係全都柏林最出名嘅酒吧,出名到連呢一區都以呢間酒吧命名叫Templa Bar,成為都柏林文化區!喺具標誌性嘅紅色牆內,有最傳統愛爾蘭人崇尚嘅快樂、音樂同美酒酒吧文化!大家一家要嚟享受吓當地人嘅nightlife呀!

The Temple Bar Pub_2
@facebook
The Full Irish €9.50

喺都柏林最人氣嘅愛爾蘭酒吧內,梗係要一邊聽住傳統愛爾蘭鄉村Live Music,一邊嘆最正宗嘅愛爾蘭咖啡啦!愛爾蘭咖啡並唔係普通espresso加奶泡,而係加入咗愛爾蘭威士忌嘅熱飲!正確嘅飲法係唔需要攪拌,一飲落去,先係甜甜嘅忌廉,然後係咖啡嘅濃香,再加上威士忌嘅果香同刺激,層層變化,衝擊整個味蕾!

 

The Temple Bar Pub
地址:47-48 Temple Bar, Dublin, D02 N725愛爾蘭 (顯示地圖)
營業時間:星期一至三 10:30-01:30,星期四至六 10:00-02:30,星期日 11:30-01:00
網址https://www.thetemplebarpub.com/

 

愛爾蘭自由行|都柏林住宿推薦|翠尼緹首都酒店

翠尼緹首都酒店
@tripadvisor

坐落於都柏林市中心嘅翠尼緹首都酒店,步行去三一學院、都柏林城堡、博德瓦斯能源劇院各個主要景點都只係10分鐘左右路程,而且附近有好多食肆同商店,非常方便!雖然喺市中心,但由於酒店唔係面向最旺嘅街道,隔音又做得好,所以相對較靜!

翠尼緹首都酒店_2
@facebook

酒店外型係古典英倫風,但室內設計注入現代化元素,就好似響應咗都柏林古今薈萃嘅文化一樣!房間配套完善,書枱、咖啡機、獨立浴室、平板電視樣樣齊!建議大家訂房時指明要有景觀嘅客房!隨時隨地都可以欣賞都柏林市景!

 

翠尼緹首都酒店
地址:IRL都柏林Pearse Street (顯示地圖)
星級 | ★★★★☆  
位置 | ★★★★★  
設施 | ★★★★☆  
環境 | ★★★★☆  
價格 | 查看價格  

 

愛爾蘭自由行|都柏林住宿推薦|聖殿酒吧酒店

聖殿酒吧酒店
@hotel.com

聖殿酒吧酒店位於Temple bar區,一出酒店已經可以感受到都柏林市嘅熱鬧同活力!距離主要嘅購物街Grafton Street同Henry Street都只係幾分鐘路程!最啱鐘意shopping同夜生活嘅旅客入住!夜晚喺Temple bar飲完,行兩步就返到酒店,唔洗就住就住飲咁啦!

聖殿酒吧酒店_2
@hotel.com

酒店房以藍白為主調,比人一種優雅而relax嘅感覺!有英式早餐送到客房嘅服務之餘,最正係退房時間係中午12:00,就算玩到好夜,都唔洗好早起身趕check out!一眾夜貓嘅福音!

 

聖殿酒吧酒店
地址:IRL都柏林13-17 Fleet St Temple Bar (顯示地圖)
星級 | ★★★★☆  
位置 | ★★★★★  
設施 | ★★★☆☆  
環境 | ★★★★☆  
價格 | 查看價格  

 

📖延伸閱讀:【倫敦景點—倫敦市集精選】南倫敦布里克斯頓活化市集遊玩攻略
📖延伸閱讀:【蘇格蘭自由行】蘇格蘭高地自駕行程攻略(連愛丁堡住宿推薦)
📖延伸閱讀:【有今生冇來世】英國朝聖曼徹斯特「夢劇場」奧脫福!(連英超門票撲飛攻略)
📖延伸閱讀:【倫敦景點地圖】倫敦遊玩必備London Pass攻略 (連London Pass景點大全)

 

Hotels.com酒店優惠Hotels.com酒店優惠