定期送上世界各地最新、最地道嘅旅遊資訊!

【金門自由行】快閃金門一日遊!景點、交通、餐廳、住宿懶人包!(廈門去金門交通攻略)

 

心郁郁想玩轉台灣,但又撲唔到平機票?其實仲有一個比搭廉航更低成本嘅出遊方法!不論旺季或閒日,大約只需港幣一千蚊就可以喺香港出發,經由水陸兩路極速來回台灣神隱小島-金門!自高鐵香港段開通後,香港去金門自由行就更方便,朝早出發經廈門去金門,中午已經到達,最啱玩轉廈門再快閃金門一日遊

 

台灣神隱小島|金門一日遊簡介

金門一日遊簡介
@ccccc927

金門市內保留咗近半世紀以來嘅古老建築,市貌恍如時空停頓而被形容為神隱小島。去金門自由行非常輕鬆,沿環島公路可遊遍熱門金三鎮:金城鎮、金湖鎮、金沙鎮。雖然喺一水之隔嘅廈門可以搵到唔少即日旅行團,不過行程多數包攬香爐廟宇等大媽級景點,唔太吸引。而小編就私心推介以下金門自由行「文青一日遊路線」,最後仲有香港來往金門交通攻略

 

金門一日遊|第一站
文青景點打卡必到|陽翟老街民風壁畫國

陽翟老街民風壁畫國
@small.1976

位於金沙鎮的陽翟大街,隨戰後撤軍而變得蕭條淒清,直至近年因電影《軍中樂園》拍攝而將70年代初街景重現眼前,復古風格嘅街景同壁畫保留至今成為IG打卡勝地。

陽翟老街民風壁畫國_2
@ccccc927

 

陽翟老街
地址:金門縣金沙鎮陽翟村內 (顯示地圖)
交通:陽翟公車站
開放時間全天
入場費用 (只供參考)免費
網址https://kinmen.travel/zh-tw/travel/attraction/1462

 

金門一日遊|第二站
免費歷史故事導賞|「近水樓台」得月樓

「近水樓台」得月樓
@ziting__y

正所謂「近水樓台先得月」,建於30年代嘅得月樓取其名就係當時全水頭最高嘅建築物。遊客可以參加免費導賞,了解得月樓昔日嘅歲月風華。

 

得月樓
地址:金門縣金城鎮前水頭45號 (顯示地圖)
交通:水頭圓環公車站
開放時間08:30 – 17:00
入場費用 (只供參考)免費
網址https://kinmen.travel/zh-tw/travel/attraction/654

 


金門一日遊|第三站
鬼斧神工軍事傑作|翟山坑道觀海步道

翟山坑道觀海步道
@instayong_
翟山坑道洞內

翟山坑道係金門No.1人氣景點,係內戰時期建成嘅戰備水道,花崗岩壁喺光影折射下非常亮眼,坑道外仲可以欣賞一望無際大海。

翟山坑道觀海步道_2
@ivymch
翟山坑道觀海步道

 

翟山坑道觀海步道
地址:金門縣金城鎮古崗湖東南方翟山腹 (顯示地圖)
交通:翟山坑道公車站
開放時間08:30 – 17:00
入場費用 (只供參考)免費
網址https://kinmen.travel/zh-tw/travel/attraction/1337

 

金門自由行|必試地道美食之一
風獅爺文物坊|毛澤東奶茶(高粱酒奶茶)、蔣介石特調(石花凍奶茶)

毛澤東奶茶(高粱酒奶茶)、蔣介石特調(石花凍奶茶)
@kinmentravel

毛澤東奶茶由得月樓內風獅爺文物坊推出,聽個名都知非試不可!奶茶加入咗金門名物58度高粱酒,入口帶香又有少少燒喉嚨。毛澤東唔啱心水?仲有無酒精嘅蔣介石俾你揀。

 

得月樓風獅爺文物坊-毛澤東奶茶
地址:金門縣金城鎮前水頭45號 (顯示地圖)
交通:水頭圓環公車站
開放時間09:30 – 17:00
消費 (只供參考)新台幣80元一杯

 

金門自由行|必試地道美食之二
祖傳三代蚵嗲之家|勁足料脆口蚵嗲

勁足料脆口蚵嗲
@revery_chen

蚵嗲係蚵仔煎嘅油炸版,食落香脆有口感,蚵仔足料到滿瀉。蚵嗲之家位於貞節牌坊「邱良功母節孝坊」旁邊,附近亦有好多出名小食店,例如70年老店文記蚵仔麵線,值得一試。

 

蚵嗲之家-蚵嗲
地址:金門縣金城鎮莒光路一段59號 (顯示地圖)
交通:金城站公車站
開放時間14:30 – 19:00 賣完收攤
消費 (只供參考)新台幣30元一份

 

金門自由行|必試地道美食之三
合泉平價中心|金門蛋狗

金門蛋狗
@lee_woodong

「蛋狗」即係蔥油餅+蛋+香腸(台灣人稱作熱狗),位於小徑村邱良功墓園旁合泉平價中心蛋狗十幾蚊港幣就有一份,除咗大件夾抵食,門面裝潢都別具風味。

 

合泉平價中心-金門蛋狗
地址:金門縣金湖鎮小徑村63號 (顯示地圖)
交通:小徑公車站
開放時間14:30 – 19:00 賣完收攤
消費 (只供參考)新台幣60元一份

 

金門自由行|環島遊特色住宿|小週末民宿

小週末民宿
@irisspace

玩完一日意猶未盡?可以預留多兩至三日入住民宿,玩轉金門環島遊。小週末民宿以簡約北歐風為主調,不時仲會舉辦音樂會,可以認識新朋友。

小週末民宿_2
@littleweekendinn

 

小週末民宿
地址:金門縣金城鎮西海路35巷25號 (顯示地圖)
星級 | ★★★☆☆  
位置 | ★★☆☆☆  
設施 | ★★★★★  
環境 | ★★★★★  
價格 | 查看價格  

 


金門自由行|環島遊特色住宿|鳳毛麟趾

鳳毛麟趾

鳳毛麟趾係金門典型閩南格調旅館,由古色古香老宅改建而成,四圍佈置以精緻木雕同壁畫為主,啱哂對藝術美學有要求嘅你。

 

鳳毛麟趾
地址:金門縣金門城132號 (顯示地圖)
星級 | ★★★☆☆  
位置 | ★★★★★  
設施 | ★★★☆☆  
環境 | ★★★★☆  
價格 | 查看價格  

 


廈門去金門|香港出發交通攻略

香港出發交通攻略
@Mnb
金門水頭碼頭
目前香港並無直飛航班來往金門,最近都要去到舊台北松山機場轉乘內陸航班,中途轉機需唔少時間,所以港人直踩上廈門北再轉乘渡輪,經水陸兩路反而更方便!

居住北區嘅港人,如果先跨境到深圳再乘搭高鐵往廈門北,高鐵二等票嘅單程票價約為人民幣160元,比由香港直接出發約人民幣260元平一舊水。另外,以往北角同羅湖火車站都有直通巴士去廈門,不過單程都要港幣300幾蚊,仲貴過喺香港坐高鐵,所以都唔建議大家捱10幾粒鐘巴士車程。

香港經廈門往金門路程總覽(約6hrs)
香港/深圳 乘搭高鐵(~4hrs30mins)>> 到達廈門北站轉乘的士(~30mins) >> 東渡碼頭/五通碼頭登渡輪(~30mins-70mins) >> 金門水頭碼頭


到達廈門北站後,建議乘搭跳錶的士前往東渡碼頭或五通碼頭,車費約人民幣80元,行車需時約20至30分鐘。由東渡碼頭或五通碼頭前往金門嘅渡輪,單程票價都係大約港幣200蚊。不過,由五通碼頭出發,航程只需30分鐘,由東渡碼頭出發,航程則需70分鐘。出發前記得睇清楚船期,方便夾返自己行程,亦要預留時間喺廈門北入境過關。

 

📖延伸閱讀:【親子墾丁行程】4日3夜高雄墾丁自由行攻略大全 (連墾丁夜市必食推薦)
📖延伸閱讀:【台東自由行】文青留意返!3日2夜快閃台東景點推薦!(台東海濱公園、鐵道藝術村)
📖延伸閱讀:【野柳景點懶人包】最強台北野柳地質公園景點行程一覽表!(連來回台北野柳交通攻略)
📖延伸閱讀:【太魯閣一日遊】台灣太魯閣國家公園景點懶人包 (連台北花蓮火車時刻表 + 太魯閣住宿推薦)

 

Hotels.com酒店優惠Hotels.com酒店優惠