定期送上世界各地最新、最地道嘅旅遊資訊!

【匈牙利自由行】布達佩斯散步遊!布達佩斯景點行程總整理

有「東歐巴黎」之稱嘅布達佩斯係匈牙利首都,亦係中東歐最具歷史文化價值嘅城市。喺布達佩斯唔單止可以搵到眾多被列入為世界文化遺產嘅古跡,仲有多瑙河嘅美景同埋各式各樣嘅匈牙利美食。我地已經為你整理好一份布達佩斯景點行程攻略,一齊探索神秘迷人嘅東歐巴黎啦!

 

匈牙利自由行|布達佩斯景點|城堡山

城堡山

布達佩斯由多瑙河分隔為布達區同埋佩斯區,布達區係富有歷史遺跡嘅老城區。大家可以先以城堡山為起點,再沿住鵝卵石街道慢慢散步去魯茲維姆同埋岩石醫院。城堡山以古羅馬風格嘅布達城堡為主軸,同周邊嘅匈牙利國家美術館、布達佩斯歷史博物館、漁人堡等建築物構成嘅建築群都被列入為世界遺產!穿梭於建築群嘅感覺,好似番到中古時期嘅布達佩斯,你仲可以喺山上飽覽多瑙河同埋對岸風光,絕對係布達佩斯最迷人嘅景點!

 

匈牙利自由行|布達佩斯必食|Ruszwurm Confectionery

Ruszwurm Confectionery
@ruszwurm

滿足咗視覺享受,就係時候去祭祭五臟廟。馬加什教堂附近有一間接近200年歷史嘅甜品店Ruszwurm Confectionery,由1827年營業至今,印證住匈牙利甜品嘅發展,係布達佩斯最具代表性嘅餐廳之一。店內充滿濃厚嘅波希米亞風格,以櫻桃木為主要元素,就連蛋糕櫃亦都係木製而成,環境古色古香,非常有特色!

Ruszwurm Confectionery_2
@wsj

嚟到Ruszwurm Confectionery,記得要試試招牌嘅Ruszwurm Kremes,兩層充滿牛油香嘅酥皮夾住一層超厚但甜而不膩嘅忌廉,外層香脆,內層軟滑,好有滿足感!

 

地點:Budapest, Szentháromság u. 7, 1014 匈牙利
營業時間:星期二至日 10:00 – 18:00;星期日休息
電話:+36 1 375 5284

 

匈牙利自由行|布達佩斯景點|岩石醫院

岩石醫院
@flickr

由Ruszwurm Confectionery沿住Szentharomsag St向Lovas Way步行約3分鐘,就會到達岩石醫院。岩石醫院係一間座落於岩石山洞內嘅秘密軍事醫院,曾經係二戰時期布達佩斯最重要嘅醫療基地,而家已經改建為博物館。館內唔單止保留咗醫院原本設備,仲擺放咗超過200個蠟像,務求重現二戰時醫生拯救生命嘅危急場景。博物館路線錯綜複雜,加上係一個密閉嘅空間,令人不禁代入戰時嘅緊張氣氛!

 

地點:Budapest, Lovas út 4, 1012 匈牙利
營業時間:每天 10:00 – 19:00
電話:+36 70 701 0101

 

匈牙利自由行|布達佩斯景點|多瑙河遊船

多瑙河遊船
@welovebudapest

布達佩斯舉世聞名嘅夜景你又點可以錯過?睇完布達區嘅名勝古跡,就要把握喺黃昏時分,登上多瑙河遊船,喺多瑙河上欣賞夕陽西下同河畔兩岸慢慢亮起嘅夜燈!多瑙河畔有多間遊船公司,大部分都提供1至2小時嘅遊船套餐,但係最平同埋最有彈性游多瑙河嘅方法就係乘搭Bkk交通船!交通船喺兩岸都設有多個碼頭,建議大家可以喺Batthyany ter碼頭上船,向Kopaszi-gat進發,路線就會途經國會大廈、鎖鏈橋同埋布達城堡等著名地標! 

 

匈牙利自由行|布達佩斯景點|布達佩斯中央市場

布達佩斯中央市場
@flickr

大家可以選擇喺Boraros ter落船,然後漫步到有「布達佩斯人大廚房」之稱嘅中央市場。中央市場係由巴黎鐵塔嘅設計師所設計,充滿新哥德式風格嘅一座大型室內市場。市場內可以搵到各種食材、肉類、蔬菜、乾貨、酒類、甚至係匈牙利嘅傳統手工藝品,包羅萬有,係買手信嘅好地方!除此之外,喺市場2樓嘅美食廣場,更可以食盡地道匈牙利美食!

 

匈牙利自由行|布達佩斯中央市場必食|Langos

Langos
@flickr

Langos係匈牙利傳統平民美食,將麵粉、酵母、鹽水製成嘅麵糰,經過油炸後製成餅底,然後再根據喜好,鋪上酸奶、芝士、煙肉等配料。感覺同Pizza相似,但換成咗油炸餅底,別有一番風味!

 

匈牙利自由行|布達佩斯中央市場必食|Toltott Kaposzta

Toltott Kaposzta
@flickr

Toltott Kaposzta係另一款可以喺中央市場搵得到嘅匈牙利美食。呢道菜係用醃製過嘅椰菜,包住豬絞肉同埋紅椒,煎香後再燉煮而成嘅菜肉卷。味道微酸,但係非常多汁,而且帶有椰菜嘅甜味,配薯仔一流!

 

地點:Budapest, Vámház krt. 1-3, 1093 匈牙利
營業時間:星期一06:00 – 17:00;星期二至五06:00 – 18:00;星期六06:00 – 15:00;星期日休息
電話:+36 1 366 3300

 

Hotels.com酒店優惠Hotels.com酒店優惠