定期送上世界各地最新、最地道嘅旅遊資訊!

【布吉一日遊】超好玩布吉飛索、布吉激流local tour推薦!

去到布吉,除咗享受陽光海灘,仲想喺布吉一日遊,挑戰戶外極限運動?今次就等小編為你一一介紹各種布吉local tour,玩齊布吉飛索、激流啦!

 

布吉local tour推薦 | Hanuman World — 刺激嘅布吉飛索樂園

Hanuman World — 刺激嘅布吉飛索樂園
@Hanuman World Facebook

嚟到布吉玩叢林飛索 (zipline),識揀一定去布吉新開嘅叢林飛索樂園Hanuman World。呢度唔單止刺激好玩,飛索種類繁多,最重要係設施安全,防護設備完善。兼且由合資格教練以小組形式帶領,令人非常放心。

Hanuman World — 刺激嘅布吉飛索樂園_2
@Hanuman World Facebook

Hanuman World係布吉最新嘅飛索樂園,園區內總共有16條飛索,連接30個高台,總長度達400米!乘住飛索高速咁穿梭於樹冠之間,追求刺激嘅你,一定會鍾意呢種喺半空中飛馳嘅感覺。

Hanuman World — 刺激嘅布吉飛索樂園_3
@Hanuman World Facebook

Hanuman World最大賣點係活動種類多,呢度唔單止可以玩飛索,仲可以玩垂直速降 (abseil)、飛索叢林過山車 (jungle roller coaster)、懸梯 (spiraling staircase) 等刺激活動。

垂直速降離地至少20米,距離地面最高嘅垂直速降台更加有40米高,嗰種離心力真係諗起個心都離一離,絕對係挑戰膽量之選!

Hanuman World — 刺激嘅布吉飛索樂園_4
@Hanuman World Facebook

飛索叢林過山車,軌道長達800米,除咗會高速咁以直線飛馳,仲會忽然掟個急彎,玩嗰陣腎上腺素一定會爆升!如果你係同另一半嚟玩的話,就一定要試下呢度獨有嘅雙人飛索 (dual zipline),佢亦都稱為蜜月飛索 (honeymoon zipline),又浪漫又刺激。

另外,大家要小心分辨Hanuman World 同埋名字相近嘅 Flying Hanuman。兩者都係位於布吉嘅飛索樂園,而且都係知名景點,但Flying Hanuman就只有飛索玩,而Hanuman World就有飛索,同埋上述介紹過嘅其他飛索活動玩。你亦可以參加包埋酒店來回接送嘅當地local tour,方便之餘又可以慳時間。最緊要嘅係呢啲local tour大部份都會包埋保險,令你玩得更安心盡興!

喺布吉,提供叢林飛索local tour嘅旅行社真係有好多,質素亦較參差。要玩得安心,當然要小心選擇旅行社。你可以按個人喜好、膽量同埋體力,選擇唔同嘅package,某啲package仲會包一餐飯,都幾抵玩!

 

Hanuman World
地址:105 Moo 4, Chaofa Rd., T. Wichit, Muang, Phuket, Thailand 83000 (顯示地圖)
網址:https://hanumanworldphuket.com/ 

 

布吉local tour推薦 | 布吉激流local tour

布吉激流local tour
@phuketattraction

介紹完陸上嘅刺激玩意,又點可以唔介紹吓激流呢樣水上極限活動?布吉激流文化興盛,有好多激流高手都會專程嚟布吉,想征服一個又一個嘅布吉激流熱點。你可以參加激流local tour,坐橡皮艇衝過重重波浪,感受大自然帶嚟嘅刺激感覺。

布吉激流local tour_2
@phuketattraction

布吉激流local tour大部份都會帶你去攀牙府一帶嘅河流進行激流活動。基於安全考慮,橡皮艇主要係由教練負責划艇,參加者就擔當輔助嘅角色,你亦可以就咁坐喺艇內全情感受俾波浪衝擊嘅快感!好多布吉激流local tour嘅行程,河流多數會劃分成幾段,例如2公里、3公里同埋5公里段,你可以自由選擇長度組合,例如2公里加5公里河段,總共可以玩7公里嘅激流。

布吉激流local tour_3
@phuketattraction

大部份激流local tour都會夾埋叢林飛索同埋ATV (四驅越野車) 等刺激活動,一次過滿足你幾個願望!通常玩完一朝早激流,下晝就去玩叢林飛索或者ATV。大部份旅行社都會明確寫低各個活動佔幾耐時間,例如激流7公里+1小時叢林飛索+30分鐘ATV。大約下午4至5點開始回程,結束一日行程。同揀飛索local tour一樣,大家記得留意個團有冇包旅遊保險,如果冇,就記得出發前自己買定保險喇!

 

選擇布吉飛索或激流local tour小貼士

  1. 選擇網上口碑好嘅旅行社
  2. 記得睇清楚local tour包唔包保險,如果唔包,小編絕對建議你自行購買,始終玩得安心先會盡興
  3. 盡量選擇由英文或者中文導遊帶領嘅團,語言相通,就算有突發事情都容易溝通

 

📖延伸閱讀:【布吉PoolVilla平靚正】雙泳池、精靈樹屋極浪漫!5大布吉Pool Villa推介
📖延伸閱讀:【布吉美食指南】自由行布吉必食!嚴選三大高質靚景布吉餐廳2019!
📖延伸閱讀:【Office手信特輯】泰國超市必買 — 泰國薯片、即食麵、鹹蛋薯片品牌大檢閱!
📖延伸閱讀:【泰國手信介紹】係時候入貨!泰國必買藥膏、泰國藥妝指南 2019

 

Hotels.com酒店優惠Hotels.com酒店優惠