定期送上世界各地最新、最地道嘅旅遊資訊!

【大嶼山景點地圖】大嶼山一日遊行程懶人包 + 必食美食推薦!

返咗成個禮拜工,週末梗係想放鬆吓。就算你攞唔到長假,其實都可以留喺香港,舒舒服服咁嚟個大嶼山一日遊,等小編為你推薦一啲特色大嶼山景點,同埋大嶼山一日遊路線啦!

 

大嶼山一日遊路線1:大澳觀光及食午餐 → 長沙海灘滑浪或者曬太陽 → 水口海灘影日落天空之鏡

 

大嶼山一日遊景點推薦 | 大澳漁村
大澳漁村享有東方威尼斯嘅美譽,可以話係眾多大嶼山景點中,最為人熟悉嘅一個。大澳好去處有好多,可以一次過滿足曬你食、玩、買3個願望。

 

大澳景點推薦 | 大澳文物酒店 (即前大澳警署)

大澳文物酒店 (即前大澳警署)
@酒店官網

前大澳警署已經活化成為一間文物古蹟酒店兼博物館。博物館部份展出多年來警署使用過嘅炮台、房間同埋物件,俾大家認識以前大澳警署嘅一點一滴。警署頂樓亦有間叫做Tai O Lookout嘅玻璃屋餐廳,可以飽覽海景,食物質素亦有保證。有機會都可以喺呢間咁有特色嘅文物酒店住番晚。

 

大澳文物酒店
地址:離島大嶼山大澳石仔埗街 (顯示地圖)
博物館開放時間:星期一至日 11:00-18:00
交通:搭地鐵去東涌站,轉乘11號巴士到大澳巴士總站。由大澳巴士總站步行5分鐘到大涌橋,再由街市街步行至石仔埗街,前行約半個鐘到達酒店。

 

大澳美食推薦 | 大澳蓮香酒家

大澳蓮香酒家
@Gogoadvise

大澳美食種類有好多,除咗海鮮酒家外,無論喺大街定小巷,你都可以搵到掃街小食店。大澳蓮香酒家主打海鮮菜式,招牌菜有墨魚餅、椒鹽蝦、椒鹽鮮魷等,份量頗大。對海鮮酒家嚟講,價錢都幾實惠。墨魚餅採用自家打出嚟嘅墨魚滑,足料之餘,仲非常彈牙,唔會食到有麵粉味。椒鹽蝦用上游水海蝦,好有風味,鍾意食海鮮嘅話就真係唔好錯過!

 

大澳蓮香酒家
地址:大澳吉慶街52號 (顯示地圖)
營業時間:星期一至五 11:30-15:00; 17:00-20:30、星期六至日 11:30-21:00

 

大澳美食推薦 | 張財記蝦豬餅

張財記蝦豬餅
@hkppltravel

張財記本身係製造蝦醬同埋蝦膏嘅老字號,但近年就研發咗蝦豬餅呢道招牌小食,成為大澳人氣美食之一。就算未行到去張財記門口,你就已經可以聞到一陣蝦醬香味,就好似召喚你過去試吓蝦豬餅。蝦豬餅其實係將用蝦醬炒過嘅豬肉碎,加埋菜脯同埋生菜,以即叫即煎嘅餅皮包住一齊食,非常惹味。

 

張財記
地址:大澳吉慶前街41號 (顯示地圖)
營業時間:星期一至日 09:30-19:00

 

大澳美食推薦 | 車站豆腐花

車站豆腐花
@ShadowZo

炎炎夏日,食完午餐最好就係去食消暑甜品。車站豆腐花嘅豆腐花有凍有熱,夏天就梗係食凍啦!豆腐花豆味算幾濃,亦有微微豆香,唔會得個甜字,而呢度嘅招牌糖水就係太極豆腐花。太極豆腐花其實係一碗豆腐花同黑芝麻糊雙拼,一黑一白,就如太極陰陽符號嘅顏色。

 

車站豆腐花
地址:大澳永安街57號 (顯示地圖)
營業時間:星期一至日 12:00-18:00

 

大嶼山一日遊景點推薦 | 長沙泳灘

長沙泳灘
@hkppltravel

長沙泳灘賣點係長!海灘由上長沙一直到下長沙,總共連綿3公里,行都行到攰!所以呢度吸引好多人嚟游水、滑浪、或者玩風帆。長沙泳灘有水上活動中心,你可以參加各項水上活動,或者租塊滑浪板滑浪,舒展一吓筋骨。

 

長沙泳灘
地址:大嶼山嶼南道上長沙 (顯示地圖)
交通:由大澳出發嘅話,搭11號巴士,到長沙下村落車;由中環出發嘅話,坐船到梅窩,轉乘1號或2號巴士,於長沙泳灘落車。

 

大嶼山一日遊景點推薦 | 水口灣

水口灣
@weshare

有冇諗過喺香港都睇到天然嘅天空之鏡呢?嚟水口灣呢度就睇到喇!水口灣係摸蜆勝地,但多年嚟,有大量海蜆俾人摸走,影響生態。所以小編就唔鼓勵大家再嚟呢度摸蜆,就算要摸蜆,都記得放走體型細小嘅蜆仔。水口灣嘅淺灘區浪好細,尤其冇風嘅情況下,如果陽光普照,就能夠輕鬆影到天空之鏡,揀日落時份嚟,仲可以影埋黃昏同埋magic moment天空之鏡!

 

水口灣
地址:大嶼山嶼南道水口灣 (顯示地圖)
交通:由大澳出發嘅話,搭11號巴士,到水口村落車,再步行15分鐘;由中環出發嘅話,坐船到梅窩,轉乘4號巴士,於水口村(東)落車。

 

大嶼山一日遊路線2:梅窩The Kitchen午餐 → 銀礦灣海灘 → 銀礦瀑布 → 水口海灘影日落天空之鏡

 

大嶼山一日遊景點推薦 | 梅窩

梅窩
@香港旅發局

梅窩位於大嶼山東部,可由中環搭船前往,亦都可由東涌搭大嶼山巴士前往,交通尚算方便。銀礦灣泳灘同埋銀礦瀑布係梅窩兩個主要景點。銀礦灣泳灘出名沙質幼細,赤腳咁喺沙上面行真係好舒服。而且銀礦灣泳灘佔地廣闊,令你唔會覺得好擠擁,可以清靜咁曬吓太陽。

要行去銀礦瀑布其實唔算遠,由銀礦灣泳灘出發,大約只需要半個鐘至45分鐘路程,途中有行山嘅路段。

 

銀礦灣泳灘
地址:梅窩東灣頭路 (顯示地圖)

 

梅窩美食推薦 | The Kitchen

The Kitchen
@SPD4459

The Kitchen係一間意大利餐廳,主打菜式當然係pizza同埋意粉啦!最受食客歡迎嘅pizza係薄批,新鮮烤好嗰陣個批邊非常香脆,配料亦都非常足料。意粉都非常出色,招牌係闊條麵。採用闊條麵嘅好處係非常掛汁,每一啖都食到醬汁嘅味道,而且口感「al dente」,啖啖都好滋味。

 

The Kitchen
地址:大嶼山梅窩碼頭路18A號卓濤軒1號地舖 (顯示地圖)
營業時間:星期一至日 10:00-22:00

 

路線3:迪欣湖野餐,租船或單車 → 欣澳海旁

 

大嶼山一日遊景點推薦 | 迪欣湖

迪欣湖
@香港品牌

如果你想全日都好hea好chill咁過,其實可以簡簡單單咁帶張野餐墊,去迪欣湖野餐,瞓喺草地舒舒服服咁嘆一日都得。迪欣湖風光優美,湖裏面嘅噴泉非常有動感,最啱同朋友或者家人嚟影打卡相。你亦可以租船,泛舟湖上,或者租單車沿住湖邊四圍探索,過一個寫意嘅午後時光。

 

迪欣湖
地址:大嶼山竹篙灣迪欣湖活動中心 (顯示地圖)
交通:搭R8巴士,迪欣湖活動中心站落車

 

大嶼山一日遊景點推薦 | 欣澳海濱長廊

欣澳海濱長廊
@Gogoadvise

欣澳海旁係影打卡相嘅好地方,無論係企喺防波提上面以鐵路為背景、定係影夕陽,呢度都係唔錯嘅地點。而且,由欣澳站行過去,只需要步行5至10分鐘就到達,非常方便。

 

欣澳海旁
地址:大嶼山欣澳道 (顯示地圖)
交通:搭地鐵到欣澳站

 

📖延伸閱讀:【香港文青Cafe精選】想搵間香港靚Cafe飲嘢兼打卡?五間必去香港Cafe推薦!
📖延伸閱讀:【香港兩日一夜好去處】隱世香港渡假屋、酒店連本地遊玩攻略!
📖延伸閱讀:【香港拍拖好去處】編輯嚴選!Top 6本地拍拖好去處連超抵住情侶酒店精選!
📖延伸閱讀:【香港郊遊樂】香港行山路線懶人包(西貢、大嶼山、港島區) (連超抵住香港郊區酒店推薦)

 

Hotels.com酒店優惠Hotels.com酒店優惠