定期送上世界各地最新、最地道嘅旅遊資訊!

【墾丁行程陸上篇】唔想落水?墾丁一日遊陸上活動推薦!(騎馬、吉普車、夜間生態遊)

OLYMPUS DIGITAL CAMERA

一講起去墾丁旅行,好自然就會諗起潛水、滑浪等水上活動。唔鍾意落水濕身?其實仲有好多陸上活動等住你玩!嚟緊會去墾丁旅行嘅話,不妨將以下呢啲陸上活動排入你嘅墾丁行程入面啦!

 

墾丁陸上活動推介 | 吉普車體驗

吉普車體驗
@taiwanviptravel

墾丁嘅吉普車體驗場地大部份都集中於恆春半島區或者南面海灘區。當地吉普車場都由專業司機駕駛,帶你坐住吉普車喺沙丘間飛馳,感覺就恍似置身喺沙漠一樣。唔同嘅吉普車場都各有特色賣點,有啲賣點係沙丘落差大,好似衝落懸崖咁,衝落去嗰下離心力令人腎上腺素飆升!

吉普車體驗_2
@taiwanviptravel

亦有啲吉普車場鄰近海灘,其中沿海路段仲會載住你喺海邊沙灘疾馳,強勁嘅海風撲面而來,甚至水花四濺,炎炎夏日之下非常消暑!

不過,吉普車屬於極限運動,大家選擇幫襯邊間吉普車場前,都要睇清楚所有活動細節,包括查下佢有冇營運牌照等,保障自己安全!除咗吉普車,某啲吉普車場亦都提供沙灘越野車呢個額外選擇,你可以自己做埋司機,自由自在咁喺沙灘飛馳!

 

墾丁陸上活動推介 | 野外騎馬

野外騎馬
@Facebook

想喺墾丁親近一下大自然同動物,不妨嚟學吓騎馬,同溫馴聽話嘅馬仔零距離接觸。教練一般會先教授基本野外策騎技巧同埋安全守則,例如點樣以韁繩控制馬匹行嘅方向、調節夾腳嘅力度去控制馬匹快慢,以及上馬、落馬嘅技巧。教練亦都會教你點樣可以取得馬匹信任,等真正騎馬嘅時候馬仔會更聽你話,咁就自然更安全啦!

野外騎馬_2
@Facebook

你可以化身成武俠小說入面嘅主角,騎馬漫步郊野,穿過樹林,涉水走過溪澗,同你嘅專屬坐騎四圍探索一番。你亦可以按興趣選擇唔同嘅路線,包括漫步山區、草原、涉水過溪以及海邊等主題,行程需時約30分鐘至2小時不等。騎完馬,你仲可以去馬厩一路餵下可愛嘅馬仔,一路聽吓馬場主人嘅介紹,加深對馬匹嘅認識。

 

墾丁陸上活動推介 | 草地飛球

草地飛球
@我愛墾丁

源自紐西蘭嘅飛球 (zorbing ball) 又叫太空球、悠波球,由堅韌得嚟富彈性嘅塑膠製成。採用雙層球中球設計,外層同內層間有空氣緩衝層,產生避震效果,令玩家可以企喺波裏面,360度咁隨波滾動都唔會受傷,仲可以彈高彈低,非常刺激!球內有安全帶將你綁實,亦會有扶手俾你捉實,所以只要跟足工作人員指示,就可以非常安全咁飛球。

飛球場內有唔同坡段,斜坡睇落唔算太斜,但360度不停咁轉住碌落山,其實天旋地轉都幾容易頭暈,所以小編奉勸各位玩之前唔好食咁飽。

 

墾丁陸上活動推介 | 夜間生態遊

夜間生態遊
@我愛墾丁

小編為你設計嘅墾丁行程又點少得夜間活動呢!墾丁保育意識高,有唔少生態遊都可以帶你認識當地自然生態同埋獨有物種。除咗有日間生態遊,恆春半島嘅夜間生態遊都同樣受歡迎,當中「社頂」就係最著名嘅夜間生態遊地區。喺社頂生態區,導遊會帶你走入森林,尋找各種新奇有趣嘅昆蟲,隨時仲有機會睇到可愛又細膽嘅梅花鹿,一家大細藉住夜色掩護周圍搵草食。大家記得唔好大聲講嘢,如果唔係就好容易會嚇親野生動物,特別係梅花鹿呢啲容易受驚嘅動物。

除咗梅花鹿,呢度最矚目嘅物種就係螢光菇。呢種真菌會喺漆黑中發出夢幻神秘嘅綠光,非常特別,不過就非常罕見,見到嘅話就真係好好彩喇!另外,呢度都有唔少樹蛙同埋黑眶蟾蜍,所以你會聽到蛙鳴聲充斥成個森林。夜間生態遊適合一家大細參加,齊齊認識墾丁生態,非常之有教育意義。

 

📖延伸閱讀:【親子墾丁行程】4日3夜高雄墾丁自由行攻略大全 (連墾丁夜市必食推薦)
📖延伸閱讀:【高雄新景點】 四大必去高雄私房旅遊景點推薦!(連高雄夜市美食攻略)
📖延伸閱讀:【高雄自由行】高雄文青私心推!4日3夜台灣高雄景點、美食遊玩攻略!(人氣高雄Cafe+瑞豐夜市必食推薦)
📖延伸閱讀:【旗津一日遊】台南度假風~旗津老街吃喝玩樂懶人包!(附高雄旗津交通指南)

 

Hotels.com酒店優惠Hotels.com酒店優惠