定期送上世界各地最新、最地道嘅旅遊資訊!

【塔斯曼尼亞必食】五大必食塔斯曼尼亞美食餐廳推介!(連荷伯特美食推介)

成個澳洲有75%嘅海鮮都係出產自塔斯,完全因為塔斯擁有全球最優質嘅海洋環境,所以嚟呢度食海鮮絕對係指定動作!今次就同大家介紹一下塔斯食海鮮嘅好去處,同埋發崛一下呢度嘅隱世cafe同特色餐廳啦,以下落嚟五間塔斯曼尼亞美食餐廳推介,都係小編私心推薦,CP值極高!


📖
延伸閱讀:【塔斯曼尼亞遊記】追蹤美絕粉紅塔斯曼尼亞南極光!南極光時間、季節攻略!
📖延伸閱讀:【塔斯曼尼亞遊記】塔斯曼尼亞薰衣草園、鬱金香花海賞花攻略!


塔斯曼尼亞必食|荷伯特美食|Barilla Bay Tasmania

Barilla Bay係位於荷伯特 (Hobart) 機場附近一間遠近馳名嘅蠔場餐廳,除咗有自家蠔場飼養嘅新鮮生蠔食之外,仲有得賣塔斯嘅野生鮑魚同頂級溏心鮑。


@barillabay.com

Barilla Bay分為兩層,樓上係餐廳,而樓下就係自助形式嘅商店,仲有預備好哂嘅即食海鮮冷盤賣㗎!


@barillabay.com

呢度嘅太平洋生蠔價錢相當之便宜,外賣只需要$12.9AUD一打,而堂食就係$19.5AUD一打。

除左生蠔,仲有冰鮮鮑魚,同優質溏心乾鮑賣,最方便嘅就係有埋其他塔斯特產,如果大家想把握掃手信嘅最後機會,就可以去機場前嚟呢度掃貨啦!

雖然呢度嘅生蠔就咁食都已經非常新鮮美味, 但配上唔同嘅醬汁, 將生蠔嘅美味帶到去另一個層次。樓上餐廳嘅生蠔拼盤就一定非試不可啦,小編每次去都會叫嚟食!


@barillabay.com
30隻生蠔拼盤,有4種口味任君選擇,而價錢都只不過係$69AUD!

除咗生蠔之外,周打蜆湯同羊扒都係必食!周打蜆湯夠哂creamy濃郁,而且非常之足料,有原隻鮮蝦同帶子,真係無得輸!

Barilla Bay Tasmania
地址:1388 Tasman Highway, Cambridge TAS 7170 (顯示地圖)
營業時間:樓上餐廳 11:30-14:30 (星期一至日,午餐),17:30-20:00 (星期五及六,晚餐)
網址:http://www.barillabay.com.au/

 

📖延伸閱讀:【快閃塔斯曼尼亞】3日2夜塔斯曼尼亞必去景點行程全攻略!
📖延伸閱讀:【塔斯曼尼亞遊記】本地人大推必去特色市集、景點- MONA博物館

 

塔斯曼尼亞必食|Tasmanian Gourmet Seafoods

炸魚薯條就食得多,但炸龍蝦你又試過未呢?Tasmanian Gourmet Seafoods 係一間專賣炸龍蝦嘅舖頭,呢間嘢細細間,仲要位於一個四野無人嘅地方,唔係本地人都真係未必識搵啊!小編都係最近先發掘到佢,但就一試難忘。呢度嘅炸龍蝦配薯條都只係$24.90AUD,唔好以為龍蝦一定係清蒸又或者芝士焗先好食,原來炸龍蝦都別有一番風味!龍蝦原本已經夠哂新鮮,炸過之後所有肉汁鎖哂喺入面,一咬落去鮮甜多汁,好味到不得了!

唔鍾意食炸嘅都無所謂,可以就咁叫半隻龍蝦食,咩醬汁都唔洗落,就咁食都一樣滋味鮮甜啊!

Tasmanian Gourmet Seafoods
地址:50, Loop Road, Cambridge TAS 7170 (顯示地圖)
營業時間:星期日至三 10:00-16:00,星期四至六 10:00-19:00

 

塔斯曼尼亞必食|荷伯特美食|Waffle On Cafe

Waffle On Cafe係一間位於荷伯特 (Hobart) 市中心完全唔起眼嘅咖啡小店,但呢度嘅waffle絕對係一流!小編本身唔係特別鍾意食waffle,因為每次食到嘅一係就唔夠脆,一係就唔夠牛油香,所以第一次嚟食嘅時候都唔敢抱太大期望,但呢度嘅waffle一試就有驚喜,令小編喜出望外!先講佢嘅waffle,外層香脆,但入面就香軟濕潤,唔會乾噌噌,而且牛油味濃,好味到暈!Waffle好食之餘,配料一啲都唔簡單。



必試推介一定係Buttermilk Chicken Waffle!Waffle上放咗炸到勁脆,但啲肉又滑又多汁嘅炸雞,再放一層椰菜沙律,減低油膩感,一個人食哂咁大份都完全冇問題啊!再叫多杯咖啡,真係大滿足!

Waffle On Cafe
地址:155 Liverpool St, Hobart TAS 7000 (顯示地圖)
營業時間:星期一至五 07:00-16:00,星期六及日09:00-15:00

 

塔斯曼尼亞必食|朗塞斯頓美食|Cafe Culture Trevallyn


@tripadvisor

朗塞斯頓市 (Launceston) 雖然唔算好大,但好嘅餐廳都唔少㗎!今次小編要介紹呢間餐廳嘅位置比較偏僻,小編都係有一次誤打誤撞入咗去試,但就一試難忘,食過返尋味!Cafe Culture Trevallyn同朗塞斯頓其中一個著名景點The Cataract Gorge好近,可以去玩嘅時候,順便試埋呢間餐廳。

每次嚟Cafe Culture Trevallyn,有兩樣美食係必點嘅!就係Pizza同奶昔。Pizza點先好食?最緊要係餅底厚薄適中,底部同外層都要脆脆哋,但中間就要夠軟熟,而餡料要夠多,再加上拉絲芝士,咁就完美喇!呢度嘅pizza就完全做到以上幾點,真係搵唔到唔試嘅理由啊!

除咗pizza,呢度嘅奶昔都一樣咁足料,飲落去係真材實料嘅新鮮水果同牛奶,而唔係加咗好多糖漿同冰嘅「假奶昔」。可能佢真係落咗好多鮮果,每次飲完一大杯都會飽飽哋。如果唔食午餐,淨係嚟嘆個下午茶,食件蛋糕加杯奶昔都好正㗎!

Cafe Culture Trevallyn
地址:3 Osborne Avenue, 7251 Launceston, Tasmania (顯示地圖)
營業時間:星期六至四 07:30-16:00,星期五 07:30-17:00

 

📖延伸閱讀:【塔斯曼尼亞遊記】零距離接觸塔斯獨有野生動物-企鵝、袋鼠
📖延伸閱讀:【塔斯曼尼亞遊記】世界級自然遺產-搖籃山旅遊、酒店攻略!

 

塔斯曼尼亞必食|朗塞斯頓美食|Cuccina Cafe



呢間係
朗塞斯頓市最受推介嘅cafe,每次嚟到都係全廳滿座,唔係浪得虛名㗎!呢度嘅早餐有好多唔同嘅選擇,所有食材都係塔斯當地新鮮出產,而且份量又夠哂多,每次都食到捧住個肚走!小編每次嚟到都一定會叫All-day-breakfast,貪佢咩都有,滿足哂所有願望。呢度嘅煙肉煎得非常之香脆,有少少脆邊但又唔會太燶,好有水準!再配上薯餅、茄汁豆、水波蛋、香腸等等,呢份勁量早餐,食完包你全日都咁精神啊!

記得要試下呢杯Iced Mocha,咖啡非常香濃,而且呢度係用朱古力漿,並唔係朱古力粉,再加埋自家制嘅雲呢拿雪糕,一粒冰都無加,所以飲落好濃郁,好creamy!

Cuccina Cafe
地址:57 Frederick St, Launceston TAS 7250 (顯示地圖)
營業時間:星期一至五 07:30-15:00,星期五 08:00-15:00

 

塔斯曼尼亞酒店推介|鹽水日出酒店 (Saltwater Sunrise)


@Facebook

呢間位於法爾茅斯嘅酒店,以別墅式享受作為主打,酒店仲曾經奪得塔斯曼尼亞最浪漫酒店獎,可見來頭絕對唔惹少。酒店近乎係畀全海景包圍,無論行出飯廳又好、喺房入面又好,甚至廁所窗位都好,都可以見到出面嘅無敵大海景,自成一角。酒店純白色嘅設計加上湛藍嘅大海,去到就好似去咗希臘聖托里尼咁,可以盡情享受陽光與海灘。


@Facebook

酒店房都係以純白色為主,而且強調寬敞休息空間,等住客可以聽住海浪聲入睡,亦可以走出門口,坐喺屋外望住個海嘆下午茶。

鹽水日出酒店 (Saltwater Sunrise)
地址:36 Frank St, Falmouth TAS 7215澳洲 (顯示地圖)
星級 | ★★★☆☆  
位置 | ★★★☆☆  
設施 | ★★★☆☆  
環境 | ★★★★★  
價格 | 查看價格

 

📖延伸閱讀:【塔斯曼尼亞自駕遊】當地人推薦!尋找最好食嘅塔斯曼尼亞生蠔!(連塔斯曼尼亞租車攻略)

 

塔斯曼尼亞酒店推介|藍湖旅館 (Blue Lake Lodge)


@Facebook

去旅行有時都係為咗洗滌心靈,呢間位於威爾伯韋爾嘅藍湖旅館依湖而建,可以提供一個恬靜渡假體驗。酒店主要以木材建成,入面仲有燒烤區同共用空間等等,畀住客可以對住個海BBQ。而酒店大陽台更加可以望到一大片湖景,係鳥鳴之時望住個湖食早餐,真係夠哂寫意!


@Facebook

酒店房簡約乾淨,畀到住客一個家嘅感覺,仲會周不時見到有小動物經過,可以親親大自然!


藍湖旅館 (Blue Lake Lodge)
地址:329 Arthurs Lake Rd, Arthurs Lake TAS 7030澳洲 (顯示地圖)
星級 | ★★★☆☆  
位置 | ★★★☆☆  
設施 | ★★★★☆  
環境 | ★★★★★  
價格 | 查看價格

 

塔斯曼尼亞必住|席洛胡椒酒店 (Peppers Silo Hotel)


@benoslater

呢間位於市區倫瑟斯頓嘅酒店時尚感十足,酒店大堂利用落地大玻璃透光,配襯唔同色彩應用,別具時尚設計感。酒店沿塔馬爾河而建,利用河景營造出清麗脫俗嘅感覺。而內在有SPA、健身中心、咖啡室同環形酒吧等等,可以話係內外俱備,唔洗行出酒店門口都可以悠閒渡假。


@Facebook

時尚設計感延伸到酒店房入面,啡色皮梳化、白色牆身同灰色地板混合得宜,營造出更大嘅空間感,住客可以完全放鬆自己。而喺房入面更加可以望到塔馬爾河嘅迷人景色!

席洛胡椒酒店 (Peppers Silo Hotel)
地址:89-91 Lindsay St, Invermay TAS 7248澳洲 (顯示地圖)
星級 | ★★★★☆  
位置 | ★★★★☆  
設施 | ★★★★☆  
環境 | ★★★★☆  
價格 | 查看價格

 

📖延伸閱讀:【藍山一日遊】悉尼藍山國家公園自駕行程攻略 2018
📖延伸閱讀:【澳洲自由行】Top 5 澳洲跳傘地點連套餐價格懶人包及常見問題
📖延伸閱讀:【澳洲自由行】Top 3 澳洲墨爾本必去人氣Cafe!
📖延伸閱讀:【澳洲悉尼自由行】悉尼景點行程攻略-攀登悉尼港灣大橋!

 

Hotels.com 酒店優惠