定期送上世界各地最新、最地道嘅旅遊資訊!

【土耳其必買】十大土耳其手信一文睇哂!土耳其咖啡、無花果、軟糖、玫瑰水…

去土耳其旅行除咗要做定research搵靚景、book靚酒店睇熱氣球,記得記得記得要帶多個喼去呀!事關土耳其真係超多好嘢買,唔預多啲位點得呢。經過一輪瘋狂掃貨,小編整理咗十大土耳其手信,包括土耳其咖啡、無花果、軟糖、玫瑰水等等,全部都係土耳其必買,買漏咗一定會後悔!

 

📖延伸閱讀:【土耳其自由行】9日8夜土耳其景點行程攻略 (連遊覽土耳其安全小貼士)

 

土耳其必買|天然橄欖產品

天然橄欖產品
@Dalan官網

喺土耳其土生土長,再進一步加工嘅橄欖,可以話係最具代表性嘅農產品之一。喺愛琴海及地中海沿岸,橄欖產量無論係內需外銷都係首屈一指,所以橄欖同相關產品都係十大土耳其手信之一!

Dalan係土耳其本地著名品牌,已經有70幾年歷史,口碑非常好。不論係橄欖皂、沐浴乳、乳液、hand cream等都好熱賣,品質有保證,價錢仲好吸引添!

 

土耳其必買|玫瑰水

玫瑰水
@minikogretmenindunyasi

土耳其盛產玫瑰,經過提煉嘅玫瑰水絕對係必買手信之一。土耳其嘅玫瑰產品主要由伊斯帕爾塔生產,喺製成玫瑰水之前由產地收成、曬乾再蒸餾,1000朵玫瑰提煉出200毫升精油,可以話係精華中嘅精華,有「液態黃金」之稱!

其中小編推介必買土耳其嘅國民品牌Rosense,主打純天然無添加、無任何化學成分、無防腐劑嘅玫瑰產品。不論係當地定國外都好受歡迎,嚟到土耳其買就當然係平好多啦,一定要大手入貨呀,買得多可以講價㗎!

 

土耳其必買|土耳其無花果

土耳其無花果
@turkish_shop_cf

土耳其盛產各類水果,而且大部分都會製成果乾,方便保存及隨時食用。土耳其果乾標榜天然乾燥、不添加任何防腐劑或香料,而當中最受歡迎嘅就要數無花果喇。

土耳其無花果
@nazillimasumgida

土耳其無花果對健康益處多多,含豐富維他命及高蛋白質,對消化系統好有幫助,更可以預防癌症及舒緩壓力,甚至無花果葉都會用嚟做藥材。聯合國糧食農業組織統計過,土耳其佔世界無花果總產出嘅五分之一,係土耳其出口嘅主要作物。各大超市、市場、香料檔都會搵得到土耳其無花果,非常受歡迎。

 

土耳其必買|土耳其杏桃

土耳其杏桃
@anatoliantrading

除咗無花果,杏桃都係好有人氣嘅果乾!土耳其囊括全世界百分之十到十五嘅杏桃產量,喺土耳其幾乎所有城市都出產杏桃,十分常見。

杏桃含豐富維他命A,可以解決消化不良嘅問題,強化心臟肌肉,仲可以紓緩骨骼疾病、曬傷、濕疹等問題。基本上,喺買無花果乾嘅地方都會有杏桃乾賣,一次過掃貨冇問題!

 

土耳其必買|土耳其軟糖

土耳其軟糖
@ricyork349

小編知道零食通常都係大家嘅熱門手信之選,咁就唔可以錯過土耳其軟糖喇,色彩繽紛仲有好多款不同口味,真係人人都帶幾盒走㗎。有包裝好曬嘅盒裝軟糖賣,亦都可以去市場試味秤重買。

土耳其軟糖_2
@hafizmustafa1864

HAFIZ MUSTAFA 1864係好出名嘅土耳其軟糖專賣店,已經有超過150年歷史,喺伊斯坦堡嘅新舊城區都可以搵到。佢哋有盒裝亦有自選,現場試食俾嘅份量好大方,絕對可以試清楚先買。

 

土耳其必買|土耳其紅茶土耳其紅茶
@turkiyenincayi

土耳其人飲茶文化相當盛行,茶葉係佢哋每日不可或缺嘅文化,土耳其仲超過咗英國成為「全世界茶葉消費量最多嘅民族」!

土耳其紅茶以產自黑海地區嘅最出名,而CAYKUR就係土耳其最老字號嘅茶葉品牌,亦係土耳其最大嘅茶葉公司,每年收購茶葉量足足佔咗當地茶葉總量嘅六成,好多土耳其人都由細飲到大㗎。

 

土耳其必買|馬賽克燈

馬賽克燈
@m1st3r_j0n3s

土耳其同西班牙一樣,馬賽克拼貼文化根深蒂固,想買紀念品一定有佢份,好似係馬賽克杯墊、餐具等等,但係最特別最值得買嘅就係馬賽克燈喇。

手製嘅馬賽克燈每盞都係獨一無二,好有中東風情。手工馬賽克燈喺土耳其好常見,小編就覺得Grand Bazaar 頂大市集最抵買,記得要講價呀!由於好多遊客買開,店家都好熟手會幫你包好厚嘅防撞棉,唔駛擔心好易撞爛。

 

土耳其必買|藍眼睛

藍眼睛
@sukilov

呢個藍眼睛其實係土耳其家喻戶曉嘅「惡魔之眼(Nazar Boncuğu)」,相傳可以驅魔避凶,喺地中海以及中東地區非常流行。戴住佢做護身符可以藉由又大又邪惡嘅藍眼睛嚟對抗由邪惡之心所形成嘅詛咒。當所有衰運黑氣都比藍眼睛吸咗之後,厄運就會離去。

藍眼睛_2
@_natakaha

藍眼睛相關嘅產品,喺市集真係隨處可見。藍眼睛做出嚟嘅飾品簡單得嚟又不失設計感,仲好有特色,買返幾個送俾朋友就啱曬!

 

土耳其必買|土耳其咖啡

土耳其咖啡
@pelengkap_jemari

相對歐美國家嘅咖啡,土耳其咖啡更加傳統同簡樸。土耳其咖啡聞起上嚟有啲似中藥,特色係用明火煮,飲落仲會有渣𠻹。

土耳其咖啡_2
@guardiantravelsnaps
總店採用咗大型玻璃窗設計,令咖啡豆烘焙過程都變成另一種觀光風景

土耳其咖啡係當地一種傳統文化,亦都係世界聞名。而其中最出名嘅就係Kurukahveci Mehmet Efendi,總店隱身喺伊斯坦堡港邊Eminönü區香料市集附近嘅一條巷仔。唔識路?只要聞住咖啡香,就可以搵到大排長龍等待出爐咖啡豆嘅民眾。

 

土耳其必買|絲巾

絲巾
@esraesarpp

伊斯蘭教係土耳其最大嘅宗教,有大量穆斯林人口。雖然土耳其被稱為最開放嘅穆斯林國家,而土耳其嘅女性亦唔係一定要戴頭巾,但係絲巾依然係土耳其女性用嚟打扮自己嘅必備品。

絲巾_2
@turkish_shop_cf

各種絲巾製品有極多款式,有不同紋路及裝飾,色彩豔麗,除咗用嚟做頭巾,仲可以做披肩或者用嚟襯衫,好有中東色彩。

 

📖延伸閱讀:【杜拜自由行】Top 6特色杜拜手信購買攻略+杜拜旅遊注意事項
📖延伸閱讀:【克羅地亞遊記自由行】8日7夜玩轉克羅地亞遊記攻略!必去克羅地亞景點逐個數!
📖延伸閱讀:【阿布扎比自由行】阿布扎比超豪景點逐個數!(阿布扎比羅浮宮、法拉利世界、華納兄弟電影世界)
📖延伸閱讀:【摩洛哥自由行】10日9夜摩洛哥景點行程懶人包 (日落撒哈拉沙漠、IG大熱摩洛哥藍色小鎮)

 

Hotels.com酒店優惠Hotels.com酒店優惠