定期送上世界各地最新、最地道嘅旅遊資訊!

【吉隆坡美食2019】當地人帶路!推薦3大隱世吉隆坡必食海鮮餐廳!

講到吉隆坡美食,一定會諗起肉骨茶、魔鬼魚、椰漿飯等等,但原來當地人話除咗呢啲地道菜色之外,嚟到吉隆坡,識食一定係食海鮮大餐!以下就係當地人推薦嘅3大隱世吉隆坡必食海鮮餐廳,仲話埋你知有咩必食items,快啲bookmark定啦!

 

吉隆坡美食2019|3大隱世吉隆坡必食海鮮餐廳|PJ23奇怪海鮮酒家

PJ23奇怪海鮮酒家
@uniqueseafood

想喺吉隆坡食最靚、最新鮮嘅海鮮,就千祈唔可以錯過23奇怪海鮮酒家喇!酒家唔單止供應頂級海鮮,仲出哂名多特別嘢!一入到店內,就會見到好似水族館一樣嘅魚缸,海鮮種類繁多,澳洲白雪蟹、南非鮑魚、血蛤、波士頓龍蝦、蘇格蘭扇貝,完全係將世界各地最出名嘅海鮮集於一身。大家可以親自挑選海鮮,然後就送入廚房即劏即煮!就連烹調方式都可以自由決定,包你一定滿意!

PJ23奇怪海鮮酒家_2
@uniqueseafood
皇燜雪蟹 時價

酒家可以按照客人喜好烹調海鮮,但其實總廚Lau Yoong經驗老到,好了解每一種海鮮嘅特色,最擅長用獨特嘅煮法同調味去突出每種海鮮嘅鮮味!例如呢道「皇燜雪蟹」就係佢地嘅招牌菜!用南瓜上湯去燜煮澳洲白雪蟹,南瓜嘅甘甜香味,同肉質幼滑而有韌性、鮮甜清爽嘅白雪蟹配合得天衣無縫,令人一試難忘!必食!

 

PJ23奇怪海鮮酒家
地點:LOT 9B-3, Jalan Kemajuan 12/18, Seksyen 13, 46200 Petaling Jaya, Selangor (顯示地圖)
營業時間:11:30-14:30;17:45-22:30
網址:http://unique-seafood.com.my/Restaurants-PJ23

 

吉隆坡美食20193大隱世吉隆坡必食海鮮餐廳|One Seafood Restaurant港一活海鮮

One Seafood Restaurant港一活海鮮
@facebook

喺吉隆坡,餐廳美食成行成市,想突圍而出真係唔容易,而港一活海鮮靠嘅就係名廚兼老闆洪清寶嘅廚藝、創意同對食材嘅堅持!老闆堅持只會用活海鮮,而且由世界各地入口嘅都係當造海鮮,帝王蟹、龍蝦、象拔蚌等等你諗得出嘅海鮮都可以搵到。不過最有當地特色嘅,就係老闆親自由泗灣島引入嘅琵琶蝦同海螳螂!老實講,港一活海鮮喺吉隆坡算係貴價海鮮餐廳,但貴得絕對有道理!重點係同樣嘅價錢,喺香港根本無可能食到咁高級嘅海鮮!

One Seafood Restaurant港一活海鮮_2
@facebook
桃太郎冰飽魚 每客RM33

其實港一每一道菜都好出色,但要講到最令人印象深刻嘅就一定係桃太郎冰鮑魚。次次食鮑魚,最怕就係好韌,咬極都咬唔開。但港一嘅冰鮑魚肉質爽口彈牙,而且鮮味無比,配上獨特嘅秘製醬汁,有一種酸酸甜甜嘅味道。再加埋襯底嘅西瓜,成道菜感覺好清新!淨係前菜都咁有心思,唔怪得連馬來西亞皇室同周杰倫都係呢度嘅座上客啦!

 

港一活海鮮 One Seafood Restaurant
地點:118, Jalan Bukit Bintang, Imbi, 50200 Kuala Lumpur, Wilayah Persekutuan Kuala Lumpur (顯示地圖)
營業時間:每日 11:30 – 15:00,17:45 – 22:30
網址:http://oneseafoodkl.com/

 

吉隆坡美食2019|3大隱世吉隆坡必食海鮮餐廳|Just Seafood

Just Seafood
@facebook

除咗去酒樓食,原來吉隆坡近年仲興起美式手抓海鮮,而Just Seafood就係最受當地人歡迎嘅手抓海鮮店喇!手抓海鮮其實就係將各式各樣嘅海鮮混合一齊煮,然後混入濃郁嘅醬汁,再直接將海鮮倒喺枱上,客人直接用手食!雖然同中式食法講求保留海鮮原味好唔同,但呢種食法勝在夠惹味,而且可以不顧儀態,直接用手剝蝦拆蟹,別有一番風味!

Just Seafood_2
@facebook

餐廳已經為食客配搭好海鮮,大家只需要按照人數去點幾多份,然後揀醬汁就可以喇!雖然係美式食法,但傳到入馬來西亞,都加入咗亞洲風味。醬汁選擇除咗有蒜香、咖喱呢啲常見口味,居然仲有鹹蛋黃同榴槤味!榴槤味小編就唔敢挑戰啦,不過強烈推介大家必食鹹蛋黃味!鹹蛋黃同蝦蟹就不嬲都好夾,但估唔到配青口同蜆一樣可以咁出色!餐廳仲一啲都唔孤寒,醬汁多到可以食完海鮮再用麵包沾嚟食,記得唔好嘥呀!

 

Just Seafood
地點:A-9-G, No. 2 Jalan PJU5/14 PJU5, Dataran Sunway, 47810 Petaling Jaya, Selangor (顯示地圖)
營業時間:每日 12:00 – 22:00

 

📖延伸閱讀:【吉隆坡自由行攻略2019】吉隆坡3日2夜自由行-必去景點懶人包!
📖延伸閱讀:【吉隆坡自由行】亞羅街夜市、茨廠街必食懶人包!馬來西亞吉隆坡美食特集
📖延伸閱讀:【檳城美食地圖】當地人教路:檳城美食、檳城壁畫打卡點、熱門檳城景點推薦!
📖延伸閱讀:【檳城必買】檳城手信特集!嚴選超人氣檳城白咖哩麵、檳城蝦麵!

 

Hotels.com酒店優惠Hotels.com酒店優惠