定期送上世界各地最新、最地道嘅旅遊資訊!

【台灣櫻花2019】嚴選台北櫻花景點 + 陽明山櫻花私藏IG拍攝地!(連台北賞櫻必備小物)

賞櫻邊個話一定要去日本同韓國?其實近近哋去轉台北賞櫻都一樣咁正!台灣櫻花花季每年由1月下旬開始到3月下旬左右,而台北櫻花最盛開嘅日子大約係2月中旬到3月中旬。除咗台北賞櫻勝地陽明山,要欣賞台北櫻花,其實仲有好多景點。以下就係小編私心推薦嘅賞櫻景點,大家不妨bookmark定帶去台北賞櫻!

 

台北櫻花景點推介|陽明公園

陽明公園
@taipei.gov.tw
陽明公園係陽明山國家公園嘅一部份,園入面種咗山櫻、八重櫻、昭和櫻同吉野櫻4種櫻花,成為當地人同旅客嘅追櫻熱點。由於種植咗唔同種類櫻花,陽明山櫻花花季比較長,由1月就開始山櫻就開花,但百櫻齊放嘅畫面,就要等到2月,其餘3種日本櫻花都綻放先可以欣賞到。要同陽明山櫻花影呃like靚相,可以去呢官方推薦嘅影相位:陽明公園蔣公銅像區、噴水池、櫻花溪流區、第二停車場水簾洞區、湖山綠地同埋遊客中心旁邊。


陽明公園_2@mitter.tw
陽明公園噴水池附近嘅櫻花

陽明公園_3
@陽明山花季Facebook
陽明公園湖山綠地都有好多櫻花樹

 

陽明公園
地址:台北市北投區湖山路二段26號
入場費用 (只供參考):免費
交通:乘捷運淡水線到劍潭站,轉乘紅5公車到總站;或到台北車站轉乘260公車。

 

台北櫻花景點推介|平菁街42巷

平菁街42巷
@cxlan.tian.yam.com
平菁街係近幾年最受歡迎嘅賞櫻熱點,位處陽明山一帶,去完陽明公園追櫻半日,都可以順便嚟呢邊影靚相。每年2月到3月,緋紅嘅櫻花都會喺平菁街盛開,成條街即刻變得好浪漫,最啱情侶或者文青影相,而42巷兩旁就種咗最多櫻花,亦係最多人會選擇喺度影IG呃like相。

 


@money9992
平菁街42巷民宅裏面嘅櫻花

呢度嘅櫻花都係由居民親自栽種,常見品種包括八重櫻同緋寒櫻。要留意嘅係,平菁街一帶多民居,賞花同影相嘅時候唔好嘈親人喇!

 

平菁街42巷
地址:台北市士林區平菁街42巷
入場費用 (只供參考):免費
交通:乘捷運淡水線到劍潭站,轉乘303號公車到「倫仔尾」站落車。

 

台北櫻花景點推介|北投復興三路

北投復興三路
@vivianchen_jigme
櫻花隧道
另一個台北櫻花打卡勝地,就係位於復興三路(白宮山莊對出)嘅「櫻花隧道」。復興三路兩旁幾百棵櫻花樹一齊開花,都幾壯觀㗎!可以喺呢度搵到嘅櫻花包括山櫻、重瓣櫻花同埋吉野櫻。

北投復興三路_2
@mobile01.com
入黑後,復興三路仲有機會點燈,可以欣賞夜櫻美景,不過有機會受交通管制影響,去之前記得check下交通資訊。時間許可嘅話,你仲可以順便去埋附近嘅陽明公園或者凱達格蘭文化館。

 

北投復興三路「櫻花隧道」
地址:台北市北投區復興三路(白宮山莊對出)
入場費用 (只供參考):免費
交通:乘捷運淡水信義線到北投站,轉乘新北投支線到新北投站,再轉乘「小6公車」。

 

台北櫻花景點推介|淡水天元宮

淡水天元宮
@jhong_dennis
想影吉野櫻,就要去天壇對出位置

淡水係台北必去地區之一,呢度嘅天元宮亦係台北賞櫻熱點。天元宮有寒櫻、山櫻同吉野櫻等,花季橫跨1至3月,但要睇吉野櫻嘅話就要等到2月中旬至3月先有喇。

淡水天元宮_2@淡水天元宮花況報導Facebook
想影寒櫻同埋山櫻,可以去後山

天元宮地方大,環境優美,點影啲櫻花都好似postcard咁靚!每逢賞櫻季節,都有好多人慕名而來,所以出發當日記得先睇清楚有冇實施交通管制,如果有就搭接駁車啦!

 

淡水天元宮
地址:新北市淡水區水源里北新路3段36號
入場費用 (只供參考):免費
交通:乘捷運淡水線到淡水站,轉乘接駁車前往;非交通管制時間也可駕車前往。

 

台北櫻花景點推介|東湖樂活公園

東湖樂活公園@waytogo.cc
東湖樂活公園內溝步道有櫻花有草地,最啱影IG相。

想近近哋留喺台北市中心,都有唔少賞櫻好地方,東湖樂活公園就係好例子。樂活公園就喺內溝溪旁邊,入面有條櫻花步道。喺當地義工幫手下,櫻花步道兩旁種咗近百棵寒櫻,2月花季開花時,就可以欣賞到一片粉紅色嘅花海,真係好浪漫。樂康步道、五分埤同埋內溝步道都係絕佳影相位。東湖樂活公園另一優勝之處就係週邊有好多餐廳,賞櫻之後唔怕搵唔到好嘢食。

 

東湖樂活公園
地址:台北市內湖區康樂街3號
入場費用 (只供參考):免費
交通:乘捷運文湖線到東湖站,沿東湖路步行約10分鐘。

 

台北賞櫻酒店或民宿推介
睇完一日櫻花,加埋瘋狂shopping,梗係想返酒店舒舒服服嘆番吓,所以小編就為你精選咗以下幾間酒店同民宿!


台北賞櫻酒店或民宿推介 |天閣酒店 (台北復興)

天閣酒店 (台北復興)
@天閣酒店台北復興官網

天閣酒店 (台北復興)_2
@天閣酒店台北復興Facebook

天閣酒店 (台北復興) 位於台北市松山區,酒店設計非常有個性,各種設備都糅合高科技,而且鄰近捷運站、商場同餐廳,去邊都好方便,性價比一流呀。

 

天閣酒店 (台北復興)
地址:台北市松山區復興北路147號 (顯示地圖)
星級 | ★★★★☆  
位置 | ★★★★★  
設施 | ★★★★★  
環境 | ★★★★☆
價格 | 查看價格  

 

台北賞櫻酒店或民宿推介 |台北中山意舍酒店

台北中山意舍酒店

台北中山意舍酒店_2

台北中山意舍酒店位於台北市中山北路,酒店地段優越,房間設計行簡約時尚,就連喺房都可以隨時影輯文青IG相!

 

台北中山意舍酒店
地址:台北市中山北路二段 57-2 號 (顯示地圖)
星級 | ★★★★☆  
位置 | ★★★★☆  
設施 | ★★★★☆  
環境 | ★★★★☆
價格 | 查看價格  

 

台北賞櫻酒店或民宿推介|門草行旅

門草
@kyomii_1107

門草_2
@門草行旅Facebook

如果想住喺較寧靜社區,可以揀離捷運站較遠嘅門草行旅。呢間民宿設計極具日本簡約風,大量運用白色,令人睇到都覺得好舒服。

 

門草行旅
地址:台北大同區安西街 23 號 (顯示地圖)
星級 | ★★★☆☆  
位置 | ★★★☆☆  
設施 | ★★★★☆  
環境 | ★★★★☆
價格 | 查看價格

 

台北櫻花景點推介|賞櫻必備小物或物品
賞櫻要盡興,就要做足準備。除咗帶相機,不妨帶埋以下呢小物。

食物同飲品
日本人賞櫻一定會坐低邊食邊賞,大家去台北賞櫻都不妨咁做。一邊食好嘢,一邊欣賞櫻花美態,咁先為之真正嘅賞櫻態度!

濕紙巾
賞櫻時候整污糟隻手或者衫都幾麻煩,如果帶定濕紙巾就可以好方便咁抹番乾淨。不過,抹完記得包好帶走,唔好留低垃圾!

後備膠袋
如果去到近郊地區賞櫻,要搵垃圾桶都未必咁容易。所以,你可以帶定一個膠袋,用嚟裝垃圾,記得要做個有公德心嘅旅人呀!

雨褸
賞櫻時候唔好彩落雨都幾煩,唔想拎住把遮咁煩,可以帶定一件雨褸。

 

📖延伸閱讀:【旅行青蛙去咗邊?】原來去咗睇日本櫻花!2018東京櫻花景點全攻略
📖延伸閱讀:【北海道櫻花景點】札幌櫻花邊度睇?本地人推薦賞櫻路線連櫻花品種大解構!
📖延伸閱讀:【日本櫻花2018】京都櫻花賞玩路線攻略 (最新櫻花花期公佈)
📖延伸閱讀:【首爾櫻花遊】首爾慶熙大學賞櫻攻略!(連首爾三清洞、仁寺洞咖啡室推薦)

 

 

Hotels.com酒店優惠Hotels.com酒店優惠