定期送上世界各地最新、最地道嘅旅遊資訊!

【台灣小琉球自由行】五大必去小琉球景點、小琉球潛水攻略 (連小琉球民宿推薦)

台灣大家就去得多,但真正識玩就梗係要去吓台灣唯一一個珊瑚島 — 台灣小琉球啦!鐘意陽光與海灘嘅你,不如嚟一個小琉球自由行啦!小編已經幫大家精選出五大必去小琉球景點,仲推介埋超正嘅小琉球民宿,仲教埋你小琉球潛水攻略,即刻睇啦!

 

📖延伸閱讀:【香港假期好去處】2019公眾假期請假攻略 (連長短線旅遊地點推薦)

 

台灣小琉球自由行|小琉球潛水攻略

去到小琉球,潛水就梗係指定動作。小琉球有多個潛水點,所以第一件事就係要物色一間好嘅潛水店!當中比較出名嘅係以下兩間:

 

台灣小琉球自由行|小琉球潛水店推介|小琉球悠遊潛水

@Facebook

教練出哂名經驗豐富同超nice,而且教練最擅長尋找各種唔同嘅海洋生物,想有不一樣嘅體驗就可以試下呢一間。

 

小琉球悠遊潛水
地址:屏東縣琉球鄉天福村信義路17號 (顯示地圖)
Facebook專頁:小琉球悠遊潛水

 

台灣小琉球自由行|小琉球潛水店推介|小琉球綠蠵龜潛水

@Facebook

呢間名氣同規模都比較大,而且位置喺白沙尾漁港同花瓶岩附近,所以都好受歡迎!

 

小琉球綠蠵龜潛水
地址:屏東縣琉球鄉三民路198-7號 (顯示地圖)
官網:http://www.g-s-t.tw/

 

小貼士:體驗潛水價錢每間都係大概NT$2500,而浮潛就大概NT$400,大家可以因應裝備價錢同潛水地點去選擇適合自己嘅潛水套餐。

 

📖延伸閱讀:【玩轉台灣外島】仲夏台灣綠島潛水之旅行程懶人包!(連綠島景點、住宿推薦)

 

台灣小琉球自由行|必去小琉球景點|白沙尾漁港


白沙尾漁港碼頭
@Facebook

由屏東碼頭坐船到達小琉球,落船嘅地點就係白沙尾漁港,亦都係小琉球最熱鬧嘅地方。呢度之所以熱鬧,唔單止係因為來回嘅船,遊客同埋漁民,而且呢度特色咖啡店林立,再加上聚集咗各式各樣嘅餐廳、小食檔同商店,成為小琉球最繁華嘅地方!

白沙灣漁港景色
@Facebook

白沙尾漁港停泊咗大大小小嘅船,再加上湛藍清澈嘅海水同色彩繽紛嘅建築物,喺呢度漫步,欣賞景色,行到攰又可以坐低嘆杯咖啡,爽呀!

 

台灣小琉球自由行|必去小琉球景點|花瓶岩


花瓶岩
@Flickr

小琉球最出名嘅景點一定係非花瓶岩莫屬。呢度之所以咁特別就係有一塊巨型珊瑚礁岩,經過海水不斷嘅沖刷,形成咗好似花瓶嘅形狀,係小琉球一大地標。除此之外,呢度有唔少珊瑚礁群,亦有好多海洋生物聚集,所以都係一個浮潛嘅熱點!


小琉球浮潛
@Facebook

如果想喺呢度浮潛就一定要趁住漲潮期間,咁就有更大嘅機會睇到小琉球最出名嘅綠蠵龜同小丑魚!

 

台灣小琉球自由行|必去小琉球景點|美人洞


美人洞步道
@Facebook

小琉球有好多浮出海面上,由珊瑚礁所形成嘅洞穴,美人洞就係其中非常有名氣嘅洞穴。美人洞嘅珊瑚礁形狀奇特,而且呢度嘅行人步道分唔同段落,有時望山,有時望海,沿途都非常精彩,可以親身穿梭於由石灰岩形成嘅獨特地形。

望海亭景觀
@Flickr

美人洞入面亦都包括咗多個唔同嘅景點,例如:曲徑探幽、情人坪、仙人洞、望海亭等等都係必去。喺望海亭就可以欣賞到小琉球嘅海崖,由高空俯瞰海入面嘅珊瑚群礁!

 

📖延伸閱讀:【花蓮自由行】尋找花蓮海岸秘境—絕密花蓮景點大公開!

 

台灣小琉球自由行|必去小琉球景點|潮間帶


小琉球潮間帶
@Flickr

小琉球有豐富嘅海洋生態,所以一定要去潮間帶到睇下唔同嘅海洋生物例如海膽、海參、海星、寄居蟹等等。潮間帶其實係海水漲退時,潮漲會升到最高點,而潮退會退至最低點嘅區域。所以大家就可以喺潮退嘅時候,睇到露出水面嘅海岸同海洋生物。

潮間帶海洋生物
@Flickr

島上有好多唔同嘅導覽團會帶大家去潮間帶尋覓海洋生物,不過由於要保護海洋生態,呢度嘅海膽全部都唔可以食,亦都唔可以隨便觸碰海洋生物,而且有人流限制㗎。關於導賞團嘅資料只要問返住嘅民宿就有㗎啦!

 

台灣小琉球自由行|必去小琉球景點|落日亭

落日亭黃昏
@Flickr

落日亭顧名思義就要嚟呢度睇日落啦!落日亭四周圍都係廣闊嘅景色,冇建築物阻擋,只有無盡嘅天空同遼闊嘅海洋,所以喺呢度觀賞日落,望住太陽慢慢喺海岸線中消失,真係浪漫都不得了!


落日亭星空
@Flickr

落日亭除咗睇日落,大家不妨留夜少少睇埋星空。因為呢度光害極低,好大機會可以清晰咁睇到銀河!鍾意攝影嘅朋友,落日亭都係一個影星軌嘅最佳地方,千祈唔可以錯過!

 

📖延伸閱讀:【宜蘭親子遊】4日3夜短線行程!本地人推薦宜蘭必去、必食攻略!

 

台灣小琉球自由行|小琉球住宿推介|小琉球樂嶼海景民宿

@Facebook

嚟到小琉球呢個咁優美嘅小島,梗係要揀返一間環境夠寧靜,又有靚景睇嘅民宿住啦!小琉球樂嶼海景民宿位於龍蝦洞附近,遠離煩囂!而設計以藍白色為主調,富有希臘風格,超有渡假feel,淨係留喺民宿都已經係一大享受!

@Facebook

呢間民宿最大嘅優點係房間非常寬敞,樓底好夠高,極有空間感!而且乾淨整潔,包你住得身心舒暢!

 

小琉球樂嶼海景民宿
地址:TWN琉球三民路 1-61 號  (顯示地圖)
星級 | ★★★☆☆
位置 | ★★★☆☆
設施 | ★★★☆☆
環境 | ★★★★☆
價格 | 查看價格  

 

台灣小琉球自由行|小琉球住宿推介|小琉球快樂小屋民宿

@Facebook

快樂小屋2017年先至開幕,而且係獨立嘅小木屋,淨係呢兩點都已經夠哂吸引!地理位置亦好方便,鄰近杉福漁港潮間帶,去碼頭都只需要五分鐘!民宿最大特色係有一個好大嘅庭園,朝早可以喺度嘆早餐,夜晚又可以喺度睇星空,真係冇得輸!

@小琉球快樂小屋民宿官網

呢間民宿有好多房型選擇,由二人房去到六人以上嘅家庭客房都有,最適合大家庭入住!

 

小琉球快樂小屋民宿
地址:TWN琉球琉球鄉復興路 8 之 16 號  (顯示地圖)
星級 | ★★★☆☆
位置 | ★★★★☆
設施 | ★★★☆☆
環境 | ★★★★☆
價格 | 查看價格  

 

📖延伸閱讀:【台北自由行】仲睇旅遊書?當地人話你知—最hit台北新景點 2018!
📖延伸閱讀:【台東自由行】台東景點懶人包!所有必去景點一次過話你知!
📖延伸閱讀:【台北親子景點】台北近郊茶園親子遊3日2夜行程及住宿推薦
📖延伸閱讀:【台北天氣不似預期】落雨有咩好怕?四大台北室內景點推薦 (台北當代藝術館、寶藏巖國際藝術村)

 

Hotels.com酒店優惠