定期送上世界各地最新、最地道嘅旅遊資訊!

【台灣吃貨攻略】 比較六大台灣珍珠奶茶,實測邊款最好飲!

台灣有好五花八門嘅美食,但講到台灣嘅「國寶」,就一定非珍珠奶茶莫屬!但台灣珍珠奶茶店有咁多間,肚只得一個,應該點揀好?唔洗煩惱喇!今次精選咗六杯嚟自唔同大型連鎖店嘅珍珠奶茶作比較,就等小編化身為試食專員,為你實測邊一杯最好飲啦!

今次精選咗六間大型珍珠奶茶連鎖店,包括五十嵐春水堂喫茶趣迷客夏茶湯會同埋翰林茶館。今次會以珍珠Q軟度茶味同埋性價比作比較,不過事先聲明,口味呢家野因人而異,是次排名只作參考。


台灣珍珠奶茶排行榜

第六名:五十嵐
五十嵐遍佈台灣所有角落,無論你身在台北台中抑或台南,都可以見到佢嘅蹤影!其實五十嵐最初只係路邊一個攤仔,後嚟越做越好,台灣各地分店越開越多,而家已經成為台灣珍珠奶茶嘅龍頭之一。五十嵐嘅珍珠奶茶茶味唔會好濃,但亦都唔會好似水咁淡而無味,係帶少少清新嘅茶葉香同奶香,適合唔鍾意茶味太濃、味道太甜嘅人。而珍珠部分,五十嵐嘅珍珠比較細粒,Q軟度適中。一杯珍珠奶茶價錢係NT$35(中杯)、NT$50(大杯),非常抵飲。


珍珠Q軟度:★★★☆☆
茶味:★★★☆☆
性價比指數:★★★☆☆


第五名:茶湯會

茶湯會係另一間台灣大型手搖飲料連鎖店,台灣各地都可以見到佢嘅蹤影!截自2016年,全台灣已經有260間分店,但其實茶湯會喺2005年先正式創立,短短十多年間已經迅速擴展,一定有佢嘅過人之處!講返珍珠奶茶先,茶湯會嘅珍珠奶茶茶味偏濃,珍珠細細粒,不過或者珍珠比較細嘅關係,容易煮得Q軟,仲可以一啖吸入好多粒珍珠!價錢方面係NT$49一杯,22安士。

珍珠Q軟度:★★★★☆
茶味:★★★☆☆
性價比指數:★★★☆☆


🏨2017台灣自由行Top 10人氣酒店推介及台灣酒店優惠

第四名:迷客夏

引用台灣用語,要數近年最「夯」嘅台灣珍珠奶茶,迷客夏一定榜上有名!迷客夏喺2007年先成立,主打天然同手作!迷客夏嘅珍珠奶茶比起其他飲品店有少少唔同,係選用伯爵紅茶,茶味會比較濃郁,同時香味四溢,未飲聞到陣茶香已經令人垂涎三尺!另外,佢哋堅持用自家「牧場直營成分無調整」嘅鮮奶,奶味好香;而佢哋選用白珍珠,尚算Q彈,但小編比較鍾意黑珍珠,比較有咬勁。價錢方面,一杯珍珠紅茶拿鐵要NT$55(中杯)、NT$60(大杯)!

 

珍珠Q軟度:★★★☆☆
茶味:★★★★☆
性價比指數:★★★★☆


第三名:喫茶趣

相信大家對天仁茗茶都唔會感到陌生,而第五名嘅喫茶趣其實係天仁集團旗下嘅品牌,佢同天仁茗茶嘅分別係,天仁茗茶專賣飲料同茶葉,而喫茶趣就好似一間餐廳咁,除咗有飲料提供,仲有食物、甜品等等。台北、台中同高雄都有喫茶趣嘅分店,喫茶趣嘅珍珠奶茶茶味帶點清新感覺,味道並唔會好強烈濃郁,而且可以選擇少糖、半糖或者微糖,可以因應自己口味選擇甜度,非常貼心,抵讚!而珍珠方面,大小適中,非常有彈性!價錢都唔算貴,中杯要NT$50,而大杯就要NT$60。

 

珍珠Q軟度:★★★★★
茶味:★★★★☆
性價比指數:★★★★☆


🏨Top 10人氣台北酒店住宿推介HK$485起 *安心價格保證*
[東鑫商務旅館HK$485起, 洛碁大飯店山水閣館HK$540起, 台北俐仕商旅HK$605起]

第二名:春水堂

排名第二嘅春水堂茶湯會一樣都係嚟自春水堂集團嘅品牌,不過春水堂歷史更加悠久,早喺1983年經已成立,原名叫「陽羨茶館」,1988年先改名為「春水堂」,並沿用至今。春水堂嘅名堂早喺1990年代打響,佢哋聲稱係珍珠奶茶嘅創始者(春水堂同翰林茶館同樣聲稱係珍珠奶茶嘅始祖,更曾經入稟台灣法院,最後因為兩者都冇註冊商標權或申請專利權,而令到珍珠奶茶成為台灣嘅國民飲料)。不過亦都多得春水堂同翰林茶館,現今大眾先有口福可以品嚐到珍珠奶茶!春水堂對食材非常講究,首先佢哋用茶葉沖泡,唔係用茶粉代替。其次,珍珠以純天然樹薯粉製成,無任何防腐劑添加。茶味香濃,珍珠Q軟,小編誠心推介!一分錢一分貨,價錢方面略貴,而且唔同分店有唔同價錢,以北部為例,珍珠奶茶細杯要NT$85,中杯就NT$160。

 

珍珠Q軟度:★★★★★
茶味:★★★★★
性價比指數:★★★★☆


第一名:翰林茶館

翰林茶館係台灣珍珠奶茶嘅老字號,早於1986年已經創立,創立人當年喺市場見到白色粉圓,於是靈機一觸將粉圓加入奶茶之中,發明咗珍珠奶茶!提到翰林茶館最出名嘅飲料,就一定係熊貓珍珠(黑珍珠同白珍珠兩溝)。翰林茶館嘅茶都係由原葉沖泡出嚟,堅持唔用茶粉,亦都唔用來路不明嘅雜牌茶,所以茶味獨特又清新。翰林茶館同時提供黑珍珠同白珍珠,黑珍珠口感較Q軟彈牙,白珍珠比較軟身,「軟中帶Q」!價錢方面都唔太貴,大杯NT$65、特大杯NT$80,性價比高!

 

珍珠Q軟度:★★★★★
茶味:★★★★★
性價比指數:★★★★★


Hotels.com 酒店優惠

睇到呢度,係咪想即刻book酒店飛返轉台灣試曬上面六杯珍珠奶茶呢?點樣先可以用至抵價錢book酒店?上Hotels.com 攞我哋最新嘅優惠代碼啦!只需要click入去呢個網站https://zh.hotels.com/jiu-dian-you-hui/coupon/ 再copy優惠碼,然後喺付款頁面貼上優惠碼,就可以享用折扣優惠㗎啦! 仲有好多超筍酒店優惠同埋精選酒店神秘優惠價,快啲上Hotels.com用至抵價錢訂房啦!

Cover Photo: Freepik and Flaticon