定期送上世界各地最新、最地道嘅旅遊資訊!

【便利店掃貨攻略】十大台灣便利店必買小食、小物招逐個數!

小編去旅行就最鐘意去當地嘅便利店行吓,因為除咗方便同平,仲係發掘當地最受歡迎嘅小食同小物嘅好去處。台灣係其中一個便利店密集度超高嘅國家,行兩步就有間7-11、FamilyMart、萊爾富或者OK便利店。今次小編就為大家介紹十大台灣便利店必買嘅小食同小物,當中包括期間限定同台灣獨有精選,懶人必睇!

 

台灣便利店必買 | 小熊維尼蜂蜜牛奶

小熊維尼蜂蜜牛奶
@wowforfood
台灣7-11同蜜蜂工坊聯名推出咗小熊維尼系列嘅蜂蜜牛奶,將小熊維尼至愛嘅蜂蜜同牛奶結合。系列一共有小熊維尼、豬仔、跳跳虎同咿唷4個款,款款都超萌,必搶!

 

台灣便利店必買 | 波的多薯片 蚵仔煎口味

波的多薯片 蚵仔煎口味
@kate_0.0

去台灣就當然必食蚵仔煎啦,但蚵仔煎口味嘅薯片你又食過未?波的多呢款蚵仔煎口味嘅薯片暢銷30年,絕對係經典中嘅經典。一打開包薯片就聞到超濃郁嘅蚵仔煎香味,實在令人難以抗拒!由於蚵仔煎口味太受歡迎,波的多仲推出咗兩倍濃厚口味,諗起都流哂口水。薯片喺7-11獨家販售,記得買返幾包做手信!

 

台灣便利店必買 | 森永牛奶糖 梅事談戀愛

森永牛奶糖 梅事談戀愛
@konasung

想同鍾意嘅人表白但又唔夠膽講出口?不如試吓買森永呢款「梅事談戀愛」牛奶糖送俾佢,婉轉得黎又夠哂可愛。呢款牛奶糖混合咗日本紀州梅,口味酸酸甜甜。就好似盒背寫上嘅句子「吃一口遇見愛情的梅好」,收到嘅人一定會明白你嘅心意!

 

台灣便利店必買 | 卡滋爆米花 珍珠奶茶口味

 卡滋爆米花 珍珠奶茶口味
@popsmilepopcorn

台灣人愛珍珠奶茶究竟愛到咩地步,竟然連爆谷都要推出珍珠奶茶味?卡滋呢款珍珠奶茶味嘅爆谷,一上架就好快畀人搶哂,真係手快有手快無。一盒爆谷包含兩款口味,分別係錫蘭奶茶味同黑糖珍珠味。爆谷包裝可愛,做手信一流!

 

台灣便利店必買 | 爽爽貓蜜桃C軟糖

爽爽貓蜜桃C軟糖
@hinomoto211

貓控留意喇,呢包糖唔只係個包裝可愛,粒糖嘅形狀仲係小肉球,真係可愛到唔捨得食!軟糖口感勁QQ,蜜桃味又香又甜。另外,每粒糖嘅獨立包裝都充滿心思,有32款唔同嘅單字,可以用嚟表白㖭㗎!

 

台灣便利店必買 | 小時厚咖啡、奶茶、奶綠

台灣便利店必買 | 小時厚咖啡、奶茶、奶綠
@1107__omz

小時厚系列飲品,食字「小時候」,以台灣舊教科書風格作為包裝設計。因為包裝可愛,一推出就即刻成為人氣打卡商品。除咗咖啡同奶茶,最近仲推出咗奶綠口味,含乳量50%,飲落重奶味又帶點清新綠茶嘅味道,值得一試!

 

台灣便利店必買 | 冷壓鮮萃茶

冷壓鮮萃茶
@全家FamilyMart

呢款由台灣FamilyMart自家推出嘅冷泡茶,採用咗台灣「王德傳茶莊」嘅茶葉,成分只有茶葉同水,完全零添加、無調味。冷泡茶利用冷高壓技術,完整保存新鮮茶葉嘅味道同營養。每支都見到大量嘅新鮮茶葉係到漂浮,夠哂真材實料!

 

台灣便利店必買 | 森永巧克力球 x 蛋黃哥

森永巧克力球 x 蛋黃哥
@pcstore.com.tw

呢款零食其實啫係朱古力波波,因為推出咗蛋黃哥版本所以大受歡迎。每一盒巧克力球都會附贈一個蛋黃哥磁石,一共有6款,鐘意蛋黃哥嘅人千奇唔好錯過喇!

 

台灣便利店必買 | 阿華田朱古力布丁

阿華田朱古力布丁
@全家FamilyMart

又係由FamilyMart推出,只有台灣獨有嘅阿華田朱古力布丁。布丁一推出就掀起搶購潮,獲得大量好評,大家都激讚口感綿密,阿華田味濃厚。

 

台灣便利店必買 | 珍珠奶茶、鳳梨酥朱古力

珍珠奶茶、鳳梨酥朱古力
@全家FamilyMart

「台灣甜品」原來係由日本出產,喺日本大賣而再引入台灣。入面包括有珍珠奶茶同鳳梨酥2種口味嘅朱古力,而且真係可以食到粒粒珍珠。呢款零食咁有創意又可以代表到台灣,啱哂做手信!

 

Hotels.com酒店優惠Hotels.com酒店優惠