定期送上世界各地最新、最地道嘅旅遊資訊!

【台北手作體驗】文青必去!3大台北手作市集 + 推薦台北體驗手作玻璃DIY!

台北除咗美食多,仲有大大小小嘅市集,加上近年大吹文青風,使台北手作市集發展更蓬勃。小編就為你精選3個文青必去台北手作市集,同埋手作玻璃DIY體驗班,bookmark定遲啲去一轉文青之旅啦!

 

📖延伸閱讀:【台灣購物2018】小編私藏台北買衫地圖!台北古著二手店尋寶地圖連講價貼士!

 

台北手作市集推介 | 西門紅樓創意市集

西門紅樓創意市集
@alvinabalastone

講到台北手作市集,西門紅樓創意市集可以話係最具規模嘅一個。西門紅樓創意市集每逢星期六、日舉行,有多個台灣本土手作攤位同藝術單位進駐,深受當地文青同旅客歡迎。市集不時都會訂下特色主題,帶嚟更多新鮮感,之前就試過以意大利市集同埋運動市集為主題。市集開放時間去到夜晚,食完晚飯都可以再嚟慢慢尋寶!

 

西門紅樓創意市集
地址:台北市萬華區成都路10號 (顯示地圖)
營業時間:星期六 14:00-22:00、星期日 14:00-21:30,暑假期間(6-8月):星期六 15:00-22:00
網址https://redhouse.taipei

 

台北手作市集推介 | 天母生活市集

天母生活市集
@hamoicher

天母生活市集係台北最有個性嘅手作市集之一,逢星期五、六、日喺天母商圈舉行,主打創意手作產品同埋二手舊物,深受當地文青歡迎。創意區有唔少台北手作愛好者擺檔,售賣自己手作嘅產品,主要都係飾物、小擺設等。呢度亦都好自然咁成為文青嘅聚腳點,台灣人一向好有創意,天母生活市集就正正體現到呢點。

而二手區就好有歐洲古玩市集嘅feel,賣嘅嘢好多元化,有復古擺設、外國紀念品、精品、古著等,係尋寶嘅好地方。

天母生活市集_2
@bobo.rone

逢星期六、日,天母生活市集都會開到夜晚九點甚至十點,入黑後,大家不妨學吓一眾台北文青,用電筒照明,繼續搵心頭好。要留意嘅係,市集起碼下午兩點後先開始有攤檔營業,如果想一次過行曬大部份地攤,小編就建議下午四點後先入場。

 

天母生活市集
地址:台北市士林區中山北路7段與天母東、西路交叉口 (顯示地圖)
營業時間:星期五16:00-22:00、星期六09:00-15:00、16:00-22:00、星期日15:00-21:00
網址http://weekendtianmu.blogspot.com/

 

台北手作市集推介 | 東西好文創市集

東西好文創市集
@song_shan_cultural_park

東西好文創市集位於松山文創園區,匯聚多個台灣本土手作攤位,而且全部都經過主辦機構精挑細選,所有參加單位都極具質素,成為當地文青另一個打卡熱點。東西好文創市集兩旁都有樹蔭,環境優美,值得你花一個下晝喺呢度閒逛尋寶,遠離台北市嘅煩囂。

行完東西好文創巿集,可以順便去埋松山菸廠文化創意園區。喺手作巿集附近嘅誠品松菸店,仲有玻璃DIY體驗。

 

東西好文創市集
地址:台北市信義區光復南路133號 (顯示地圖)
營業時間:星期六、日12:00-19:00
網址http://goodsmarkettaipei.blogspot.com  

 

📖延伸閱讀:【台北文青景點】打卡必去台北文青Cafe、台北市集、旅店特集!

 

更多文青台北手作體驗 | 坤水晶台北 玻璃DIY

坤水晶台北 玻璃DIY
@坤水晶Facebook

除咗去上面介紹嘅台北手作市集搜羅手作精品,你仲可以試下親自手作玻璃!坤水晶位於誠品生活松菸店,提供吹玻璃班,由專業嘅導師以小班教學形式,教你吹玻璃嘅唔同步驟,包括上色、燒製、吹出玻璃形狀等。留意返,啱啱燒好嘅玻璃要一日時間去冷卻,要第二日返去自取製成品,所以唔建議將玻璃DIY排喺行程最後一兩日。呢個玻璃DIY體驗嘅費用視乎你想整嘅款式同埋花紋,課程大約需時30-45分鐘,仲歡迎5歲以上嘅小朋友參加㗎!

 

坤水晶
地址:台北市信義區菸廠路88號2F (顯示地圖)
營業時間:星期一至日11:00-22:00
網址www.kun.com.tw

 

📖延伸閱讀:【台北新酒店】周邊配套超好!台北新酒店推介列表 (超近台北超市、便利店、捷運站!)

 

文青台北住宿推介 | 町.記憶旅店 (Cho Hotel)

町.記憶旅店 (Cho Hotel)
@酒店官網

町.記憶旅店嘅大堂充滿古早味,重現舊西門町嘅氛圍,走入旅店嘅時候,帶俾人一種回到學生時代嘅感覺!

町.記憶旅店 (Cho Hotel)_2
@酒店官網

驚喜出現了!旅店嘅店長柴柴親自出嚟迎接你!

 町.記憶旅店 (Cho Hotel)_3
@酒店官網

不過,客房嘅主調並非走復古風,而係現代簡約風,善用淺色系色調,極富空間感,同大堂嘅裝潢形成強烈對比。旅店地段優越,西門站就喺步行範圍之內,附近有好多餐廳,亦都鄰近西門町,去完西門紅樓創意市集同夜市掃街都可以安全方便咁行返旅店。

 

文青台北住宿推介 | 町.記憶旅店 (Cho Hotel)
地址:台北萬華區昆明街 119 號 (顯示地圖)
星級 | ★★★☆☆  
位置 | ★★★★☆  
設施 | ★★★☆☆  
環境 | ★★★★☆  
價格 | 查看價格

 

文青台北住宿推介 | 二十輪旅店大安館 (Swiio Hotel Daan)


@chankingshing

二十輪旅店大安館由外牆到客房,都用咗文青至愛嘅白色,成為台北火紅火熱嘅文青酒店。酒店設計非常有個性,隨便影都可以影好多打卡相。客房亦都貫徹呢種強烈嘅文青元素,大走簡約風。

二十輪旅店大安館 (Swiio Hotel Daan)_2
@lllrobibi

房間主色調固然都係白色,望到都覺得舒服,同時帶有型格時尚嘅感覺。所有設施都非常新淨,非常適合打卡呃like!酒店位置方便,鄰近捷運站,雖然唔近主要景點,但淨係以文青風為設計主軸呢點,已經足以成為你文青之旅嘅住宿首選!

 

文青台北住宿推介 | 二十輪旅店大安館 (Swiio Hotel Daan)
地址:台北大安路一段 185 號 (顯示地圖)
星級 | ★★★★☆  
位置 | ★★★☆☆  
設施 | ★★★★★  
環境 | ★★★★☆  
價格 | 查看價格

 

📖延伸閱讀:【台北新酒店】周邊配套超好!台北新酒店推介列表 (超近台北超市、便利店、捷運站!)
📖延伸閱讀:【落雨有咩好怕】台北4日3夜親子遊2018!四大台北室內景點 + 台北市中心親子酒店推薦
📖延伸閱讀:【米芝蓮追星地圖】台北米芝蓮星級餐廳潮聖攻略2018
📖延伸閱讀:【台北晚餐篇】秋冬之選!超人氣台北火鍋推薦 + 回本必食菜式!

 

Hotels.com酒店優惠Hotels.com酒店優惠