定期送上世界各地最新、最地道嘅旅遊資訊!

【印度必買】印度自由行購物篇 — 十大必買印度手信攻略 + 講價貼士!

去到充滿神秘感嘅印度自由行,梗係要掃返一堆富有民族色彩嘅手工藝品同特產先得啦!喺印度買嘢價廉物美,而且四周圍都係特色市集,名符其實係購物天堂!不過!喺市集買嘢,除咗要識揀,仲要識講價!今次就等小編推介十大必買印度手信比大家,仲教埋你講價貼士𠻹!

 

印度必買|十大必買印度手信|大吉嶺紅茶

大吉嶺紅茶
@Pinterest

印度人鍾意飲茶嘅程度絕對唔輸蝕於中國人同英國人,印度最盛產就係有紅茶之皇美譽嘅大吉嶺紅茶,所以嚟到印度就當然要買返最純正頂級嘅大吉嶺紅茶啦!去超市買預先已經入哂盒嘅茶包固然方便,但其實識買一定係去傳統市集,又或者喺茶店買按重量秤嘅茶葉!一嚟價錢平一半以上,二嚟茶葉品質比較高!如果用嚟送禮,茶店一般都會提供印有名勝嘅特別包裝,同嚟送禮至啱!

 

印度必買|十大必買印度手信|香料

印度手信_香料
@fooding

平日喺香港,可能食嚟食去嘅印度菜,都係不外乎咖喱,但其實印度菜非常多元化,而印度人擅長使用香料,令印度菜更添色彩!雖然大家未必係印度菜專家,但不妨買返啲唔同嘅香料,發揮吓創意,自己配搭出唔同嘅印度口味!除咗咖喱粉、豆蔻、肉桂、丁香、茴香粉呢啲常見香料,記得要買印度人至愛嘅Masala呀!

 

印度必買|十大必買印度手信|Kama Ayurveda香薰油

Kama Ayurveda香薰油
@KamaAyurveda
佛手柑香薰精華油 ₹595INR/12ml

印度位於熱帶,有豐富嘅天然植物資源,而印度人除咗擅用各種香料,仲擅於用植物提煉精油同香薰!而Kama Ayurveda就係印度最人氣嘅香薰品牌!Ayurveda其實係印度早在6000年前已經有記載嘅草本醫療系統,而呢個品牌就係根據Ayurveda製作出各種對身體有益嘅香薰油同護膚品。人氣必買就係佢地嘅佛手柑香薰精華油,有放鬆身心同提神嘅功效,啱哂生活壓力大嘅都市人!

 

印度必買|十大必買印度手信|紡織品

印度手信_紡織品
@pinterest

印度係出產棉花嘅大國,所以紡織品工業發展得非常蓬勃,加上印度人出神入化嘅手藝,令佢地嘅紡織品風摩全世界!嚟到印度,又點可以唔買返啲充滿傳統印度風嘅紡織品呢?最靚最吸睛嘅當然係印度傳統服飾Sari,不過買咗平日又唔會著,得個睇字!但其實佢地嘅紡織品由手袋、精品、床單、到披肩,乜都有!總之一定有嘢啱大家心水!

 

印度必買|十大必買印度手信|Himalaya Herbals護膚保養品

Himalaya Herbals護膚保養品
@HSBCSmartPrivileges

喺印度各大超市,藥妝店都一定會見到Himalaya Herbals呢個牌子嘅產品。Himalaya Herbals係印度一個專賣純天然草本製品嘅品牌,由沐浴露、洗頭水、牙膏到護膚品,所有產品都係100%採用喜馬拉亞山稀有植物製成,有信心保證!建議大家可以一到埗就立刻去超市搜羅佢地嘅產品,然後即刻試用返幾日,覺得好用就可以大買特買啦!

 

印度必買|十大必買印度手信|首飾

印度手信|首飾
@OutofTownBlog

印度街頭遊走都一定會見到,差唔多每一個印度女性都會戴著各種色彩鮮豔同鑲滿寶石嘅首飾!愈浮誇佢地就愈鐘意,由頭飾、耳環、頸鏈、手鏈、腳鏈等等,全部一次過戴哂上身!亦因為佢地對首飾嘅熱愛,令印度首飾店開到成行成市!佢地嘅首飾蘊含著印度傳統工藝,而且款式獨特,其他地方唔易搵到!唔買一定會後悔!

 

印度必買|十大必買印度手信|Pashmina喀什米爾羊毛頸巾

Pashmina喀什米爾羊毛頸巾
@MapsofIndia

羊毛製品一向價錢都唔平,但印度係盛產喀什米爾羊毛製品嘅國家,所以相對嚟講,價錢就會平好多啦!眾多羊毛製品當中,最受歡迎嘅就係頸巾,因為喀什米爾羊毛非常纖細,保暖效果好之餘,非常柔軟又唔會扎到皮膚唔舒服!而且喺印度仲可以買到好多特色花紋圖案嘅羊毛頸巾,用嚟送比身邊重要嘅女士就最貼心又得體啦!

 

印度必買|十大必買印度手信|傳統刺繡鞋 Juttis

傳統刺繡鞋 Juttis
@Tripoto

鐘意民族風嘅朋友,一定唔會抗拒到印度傳統刺繡鞋Juttis嘅吸引力!Juttis完全係將印度人紡織同製作首飾精湛手藝嘅集大成之作!一般Juttis都係真皮製,鞋面設計以紡織刺繡,加上亮片同閃石為主!小編覺得用嚟襯窄腳牛仔褲加件T-shirt就最啱!一對搶眼嘅Juttis可以提升整個原本casual嘅造型,仲要舒適好著!必買!

 

印度必買|十大必買印度手信|Parle-G餅乾

印度手信_Parle-G餅乾
@yaoindia
Parle-G餅乾 ₹57/800g

Parle-G係有超過80年歷史嘅印度品牌,亦係全印度銷量最好嘅餅乾,可以講得上係陪住印度人長大嘅零食!餅乾係全麥加上牛奶同葡萄糖製成,成份都好健康,大人細路到啱食!而餅乾除咗健康,最重要係奶味夠濃,又夠脆,配印度茶非常適合!所以買印度茶之餘,記得買返幾包印度人至愛嘅Parle-G餅乾呀!

 

印度必買|十大必買印度手信|Haldiram’s Moong Daal綠豆零食

印度手信_Haldiram’s Moong Daal綠豆零食
@w-foods.com
Haldiram’s Moong Daal ₹40INR/150g

大家都知豆係印度人嘅主食之一,除咗要去當地試吓佢地嘅豆糊Dhal,千祈唔可以錯過呢款Haldiram’s Moong Daal綠豆零食!將脫咗殼嘅綠豆黃,好簡單用油炸之後再加鹽,食落去脆卜卜,口感非常特別,而且雖然係油炸,但又唔會好油膩!食吓食吓,隨時一個人唔小心清哂一包!

 

印度購物講價貼士
去印度買嘢,除咗商場內嘅店鋪,一般都可以講價!講價可以稱得上喺呢到消費嘅文化!通常印度人見到你係遊客,一般都將貨品價錢提高3-4倍,有啲商家甚至獅子開大口,會提高到10倍以上!所以唔洗怕醜,一定要講價!而喺印度講價有以下幾個貼士:

1. 第一件事就係貨比三家,大概心裏有個底,知道同一樣嘅商品價位係幾多。
2. 而講價嘅時候唔洗怕唔好意思,一開就可以至少壓至半價!
3. 印度人精打細算,口才好,只要對方不停還價,而唔係一口拒絕,咁就代表你有機會可以用心目中嘅價錢買到貨品!
4. “計仔”唔怕舊,最緊要受!如果商家唔願意減到你心目中嘅價錢,不妨真係出絕招,扮走人!多數呢個時候,商家都會妥協!

 

📖延伸閱讀:【2018最強旅行手信特輯】韓國、德國、俄羅斯、新加坡、泰國手信一次過話你知!
📖延伸閱讀:【土耳其必買】十大土耳其手信一文睇哂!土耳其咖啡、無花果、軟糖、玫瑰水…
📖延伸閱讀:【摩洛哥必買】十大摩洛哥手信一文睇哂!摩洛哥堅果油、家品、銀飾、皮革…
📖延伸閱讀:【尼泊爾自由行】新手遊尼泊爾 — 加德滿都景點、美食、住宿、禁忌​懶人包!

 

Hotels.com酒店優惠Hotels.com酒店優惠