定期送上世界各地最新、最地道嘅旅遊資訊!

【以色列自由行】朝聖之路!以色列耶路撒冷景點行程攻略懶人包!(連耶路撒冷住宿推薦)

以色列以耶路撒冷為中心聖城,每年都吸引咗好多基督教、伊斯蘭教同猶太教教徒嚟朝聖。耶路撒冷嘅宗教歷史悠久,城內有好多考古遺跡同文化遺產,係當地嘅旅遊重點,亦係令以色列舉世聞名嘅重要地方!今次小編為大家準備咗以色列耶路撒冷旅遊懶人包,想去以色列自由行兼朝聖,就要留意嚟緊介紹比大家嘅以色列景點行程同其他資訊喇!

 

以色列自由行|以色列耶路撒冷景點行程推薦|聖墓教堂 Church of Holy Sepulchre

聖墓教堂 Church of Holy Sepulchre@miss_m_arika

充滿宗教歷史遺蹟嘅耶路撒冷舊地入面有間教堂叫聖墓教堂,聖墓教堂被稱為係耶路撒冷最神聖嘅地方,係去到耶路撒冷絕對唔可以錯過嘅教堂之一。據說聖墓教堂就係耶穌被釘十字架嘅地方!

聖墓教堂 Church of Holy Sepulchre_2@agibal

聖墓教堂陡斜台階嘅禮拜堂入面,係當年耶穌被剝去衣服,準備受十字架刑罰嘅地方。

聖墓教堂 Church of Holy Sepulchre_3@artirinaa

耶穌被釘十字架嘅位置,就係今日嘅教堂聖壇。而耶穌嘅聖墓,同復活嘅地方,都係喺聖墓教堂內。

 

聖墓教堂 Church of Holy Sepulchre
位置:耶路撒冷 (顯示地圖)
開放時間:05:00-21:00 (四月至九月);04:00-19:00 (十月至三月)

 

以色列自由行|以色列耶路撒冷景點行程推薦|西牆 /哭牆 Western Wall

西牆 Western Wall@krawcio86

西牆,又稱哭牆,高 32 米,位於耶路撒冷嘅聖殿山山下。係環繞第二聖殿嘅古城牆,喺公元 70 年,第二聖殿被羅馬人摧毀咗,剩低聖殿庭院古城牆西面嘅殘存部分,留下嘅部份就被後人稱為西牆。之後經常都有猶太人嚟到西牆,悼念消失嘅聖殿,同堆為悲慘嘅歷史而哭訴祈禱,所以亦有哭牆呢個名。

西牆 Western Wall_2@mr_andrew_gough

時至今日,西牆被劃分為比男性同女性祈禱嘅兩個區域,男性喺左邊,而女性就喺右面。遊客都可以依性別去西牆祈禱,體驗下猶太人嘅宗教文化。不過留意返,安息日期間係唔准拍照,其他日子都冇特別限制。同埋男性要戴帽,女性就要著得比較端莊保守,簡單講最好就係長衫同長褲,唔好著無袖或者低領嘅衫,以示尊重。

 

西牆 /哭牆 Western Wall
位置:耶路撒冷 (顯示地圖)
開放時間:24小時開放

 

以色列自由行|以色列耶路撒冷餐廳推薦|Hahatzer

Hahatzer@natalyzaken

以色列係位於中東,所以以色列嘅飲食文化同阿拉伯國家都好相似。不過隨住歐洲移民愈嚟愈多,漸漸以色列嘅菜式都變得好多元化。Hahatzer係一間提供傳統以色列、地中海同猶太菜嘅餐廳,喺以色列耶路撒冷非常有名嘅餐廳。餐廳命會有提供Kosher食物,即係用上符合猶太教飲食規定嘅食材同烹煮投巧。

 

Hahatzer
地址:7 Bethlehem Road, Jerusalem, Israel (顯示地圖)
營業時間:星期日至星期四12:00pm – 11:00pm;星期五12:00pm – 2:00pm (星期六休息)

 

 

以色列自由行|以色列交通攻略

以色列巴士@israelmega.com

去以色列自由行通常都有幾種交通方法,包括公共交通工具、租車、包車同搭的士。如果想慳返啲budget好多人都會選擇搭公交。其實以色列嘅交通都唔算難搭,而好令人振奮嘅消息,前往耶路撒冷嘅機場火車喺2018年9月開通咗喇,由機場去耶路撒冷依家只需要24分鐘就到!想搭巴士都可以坐機場巴士485去耶路撒冷,車程45分鐘左右。

以色列巴士_2@Kanise Yan

以色列地方小,有好多來往城鎮嘅巴士,幾乎都係由Egged巴士公司營運,可以喺官網上面搵到唔同嘅巴士路線同埋班次。而喺耶路撒冷內觀光,基本都係途踄或者坐地面輕鐵去到唔同區內嘅景點。

@backpackers.com.tw

另外順帶一提,喺以色列自由行,可以買埋Rav-Kav交通卡,就好似香港嘅八達通。Rav-Kav卡可以喺火車話、巴士櫃位買到。而且有咗Rav-Kav卡先可以買到唔同嘅一日票,即係一個價嘅車票可以無限次剩坐公交,好方便。

 

Egged巴士官網:http://www.egged.co.il
有關Rav-Kav卡嘅資訊:http://www.trans-reform.org.il/docs/english.pdf

 

 

以色列自由行|以色列耶路撒冷住宿推薦|艾倫比 2 酒店

艾倫比 2 酒店

艾倫比2酒店地理位置好好,距離中央車站非常近,只需要行5分鐘就會到。酒店房價平均嚟講唔貴,仲要包埋早餐,性價比好高!酒店入面有個花園,環境不錯,坐喺花園食早餐好寫意。

 

艾倫比 2 酒店
地址:Allenby Square 2, 耶路撒冷, 以色列 (顯示地圖)
星級 | ★☆☆☆☆  
位置 | ★★★★☆  
設施 | ★★☆☆☆  
環境 | ★★★☆☆
價格 | 查看價格  

 

以色列自由行|以色列耶路撒冷景點行程推薦|旅遊注意事項

以色列文化遺產@tokyocannibalism

以耶路撒冷為首都嘅以色列,建國歷史長達三千年以上,呢個地方擁有唔少神話傳說、考古遺跡、文化遺產、宗教故事,因此被人稱為神秘國度。呢度嘅官方語言係希伯來文,但係喺大部份地區,特別係遊客區,英文都係通用嘅,所以香港人去到以色列旅遊都唔需要太擔心溝通嘅問題。

以色列@yichunr

以色列屬於地中海氣候,夏天炎熱乾旱,冬天就寒冷多雨,最好就係當地春天嘅時候去,即係2-3月份去最為理想。不過有一樣事項要留意返,以色列雖然比起其他中東國家較為開放同自由,女性可以自由著裙喺街上行,但係去到啲宗教景點,最好都係避免穿無袖背心、短褲、裙等過於暴露嘅衣著。可以隨身帶條絲巾,有需要時,可以拎出嚟遮吓都得啦。

另一樣好多人外遊時會留意嘅,就係簽證問題。只要係持有有效香港特區護照或者英國國民海外(BNO)可免簽證逗留以色列唔超過90日,不過要確保護照有效期為6個月以上呀!

 

 

📖延伸閱讀:【歐洲上網卡推介】歐洲電話卡大評比2018!邊隻歐洲Sim Card最抵?!
📖延伸閱讀:【土耳其自由行】9日8夜土耳其景點行程攻略 (連遊覽土耳其安全小貼士)
📖延伸閱讀:【波蘭自由行】從維利奇卡鹽礦、奥斯威辛集中營探索東歐歷史
📖延伸閱讀:【克羅地亞遊記自由行】8日7夜玩轉克羅地亞遊記攻略!必去克羅地亞景點逐個數!
📖延伸閱讀:【杜拜自由行】Top 6特色杜拜手信購買攻略+杜拜旅遊注意事項
📖延伸閱讀:【摩洛哥自由行】10日9夜摩洛哥景點行程懶人包 (日落撒哈拉沙漠、IG大熱摩洛哥藍色小鎮)

 

Hotels.com酒店優惠Hotels.com酒店優惠