定期送上世界各地最新、最地道嘅旅遊資訊!

【京阪神自由行】京阪神5天4夜自駕遊景點攻略 + 餐廳美食推薦

京都、大阪、神戶一向都係日本旅遊最熱門嘅路線,因為好多人氣景點都集中晒喺市內,去觀光同玩都非常方便,之不過其實喺近郊地區同埋周邊縣市嘅景色仲更多迷人,更有魅力,絕對不容錯過!小編已經為大家整合好一篇京阪神5日4夜自駕遊攻略,推介最好玩、最有特色嘅京阪神景點同埋美食畀大家,嚟個不一樣嘅京阪神自由行

 

京阪神自由行|京阪神5天4夜自駕遊景點|美山茅草屋之里

美山茅草屋之里
@gooshuo

美山茅草屋之里係位於京都南丹市嘅一條古老村落,所有房屋都係擁有超過150年歷史嘅茅草屋,佢哋同世界遺產白川鄉合掌村以及福島大內宿並稱「日本三大茅草屋聚落」。呢度嘅茅草屋唔單止保留住江戶時代嘅風貌,就連居民都依舊維持古樸嘅鄉村生活模式,係最能夠體現日本傳統嘅地方!呢度一年四季嘅景色都美不勝收,林蔭山谷同埋古色古香嘅茅屋互相映襯,如詩如畫,毫無疑問係旅程嘅最佳起點!

 

地址:〒601-0712 京都府南丹市美山町北

 

京阪神自由行|京阪神5天4夜自駕遊餐廳美食推薦|美山牛乳工房

美山牛乳工房
@kyotomiyama

嚟到美山村,又點可以錯過美山村盛產嘅牛乳製品?美山牛乳工房係美山牛乳嘅直銷處,呢度所售賣嘅產品,無論係牛乳、布丁、芝士、乳酪等都係以最天然純正嘅牛乳製作㗎!

美山牛乳工房_2
@facebook

呢度最受歡迎嘅產品係牛乳雪糕,雪糕嘅牛奶味濃郁,而且非常滑溜,係人氣票選嘅「關西第一名雪糕」!另外,呢度仲有唔同口味嘅意式雪糕,總有一款啱你口味!

 

地址:下-23 美山町安掛 南丹市 京都府 601-0722
營業時間:每天 10:00 – 16:00
電話:+81 771-75-0815

 

京阪神自由行|京阪神5天4夜自駕遊景點|嵐山竹林

嵐山竹林
@flickr

離開美山茅草屋之里之後,揸車向京都市方向行駛,下一個目的地就係嵐山喇!沿途風光明媚,特別係進入嵐山範圍所經過嘅渡月橋、保津川、桂川兩岸風光都係絕景,而當中最令人印象深刻嘅當然係嵐山竹林啦!一條300米長嘅小徑,兩旁長滿咗筆挺嘅青竹,一走入去彷如置身喺電影場景之中,靚到令人覺得不可思議!就連荷里活電影《藝妓回憶錄》同埋《臥虎蔵龍》都曾經喺度取景拍攝,梗係要嚟朝聖啦!

 

地址:〒616-0007 京都府京都市右京区

 

京阪神自由行|京阪神5天4夜自駕遊景點|日清泡麵發明紀念館

日清泡麵發明紀念館
@allomamantoutvabien

睇完好山好水,嚟到大阪不如去拜訪一下日本偉大發明即食麵嘅發源地——安藤百福發明紀念館,亦即係日清泡麵發明紀念館。紀念館裡面展示咗即食麵嘅發明歷史同製作方法,仲有超過800種曾經推出過或者宜家仍然發售緊嘅杯麵口味!唔親身去睇過,真係唔知道咁簡單嘅即食麵背後,原來係花咗咁多心血先成功研製得到!

日清泡麵發明紀念館_2
@flickr

館內設有唔同嘅體驗區,而最特別嘅就梗係可以親手製作獨一無二嘅杯麵啦!製作完成之後,你仲可以喺杯麵盒上面設計圖案添!

 

地址:〒563-0041 大阪府池田市満寿美町8−25
營業時間:星期三至一 09:30 – 16:30
電話:+81 72-752-3484

 

京阪神自由行|京阪神5天4夜自駕遊餐廳美食推薦|道頓堀肉劇場

道頓堀肉劇場
@beautiful.mook.k

丼飯同埋燒肉都係嚟到日本唔可以錯過嘅地道美食,想一次過滿足晒兩個願望,咁就要嚟大阪呢間道頓堀肉劇場,品嚐全大阪最具人氣嘅燒肉丼飯喇!

道頓堀肉劇場_2
@yutaro.10.17

大劇場丼係呢度嘅人氣招牌菜,牛背肉、橫膈膜、雞脖肉同埋豬外脊肉4種燒肉滿滿鋪喺丼飯上面,每一種肉都燒得啱啱好。燒肉醬嘅味道亦唔會過濃,唔怕會覆蓋咗肉味,再配上香噴噴嘅米飯,真係大滿足啊!另外,大劇場丼嘅肉量超多,仲會附送芽菜同埋湯,性價比極高! 

 

地址:〒542-0071 大阪府大阪市中央区道頓堀2丁目2−2
營業時間:每日 11:00 – 23:00
電話:+81 6-6214-2951

 

京阪神自由行|京阪神5天4夜自駕遊景點|六甲山

六甲山
@facebook

最後一站就係神戶六甲山喇!六甲山位於瀨戶內海國立公園,喺山頂可以俯瞰神戶灣同埋大阪灣嘅壯觀景色,而且呢度嘅夜景醉人,更曾被列為日本三大夜景之一,所以唔少人都會慕名而來!另外,山上仲有唔同嘅設施,包括高山植物園、高爾夫球場、自然體感展望台等,係一個包羅萬有嘅觀光勝地!

六甲山_2
@facebook

呢度最夢幻嘅就係坐落喺針葉林裡面嘅音樂盒博物館,館內不時會有音樂盒演奏會,展示出一個超巨型嘅音樂盒。另外,大家仲可以親手製作音樂盒,係一次非常獨特嘅體驗嚟㗎!有興趣參加嘅朋友,記得提早預約工作坊體驗,咁就唔怕會錯過啦!

 

地址:日本〒651-1401 兵庫縣神戶市北區有馬町

 

Hotels.com酒店優惠Hotels.com酒店優惠