定期送上世界各地最新、最地道嘅旅遊資訊!

【九州攻略大全】最強九州自駕遊行程懶人包!福岡‧鹿兒島‧熊本‧長崎‧宮崎‧大分必去景點逐個數!

 

唔少人去九州,都會選擇租車自駕遊,因為交通唔算繁忙,自駕又可以更有彈性,更方便!重點係九州風光明媚,遊車河都已經係一種享受!今次就等小編幫大家整理一個最強九州自駕遊行程懶人包,推介一個10日九州行程,玩盡福岡、長崎、熊本、大分、宮崎、鹿兒島,仲話埋你知九州自駕tips𠻹!

 

九州攻略大全|自駕遊路線

自駕遊路線
@wow-j
建議大家可以由北九州嘅福岡為起點,一路玩到落南九州嘅鹿兒島作結。

 

第1及2日:福岡太宰府天滿宮、博多運河城
第3日:長崎豪斯登堡
第4日:熊本城
第5及6日:大分由布院金鱗湖、別府地獄
第7及8日:宮崎高千穗峽、鵜戶神宮
第9及10日:鹿兒島櫻島、屋久島白谷雲水峽

 

九州攻略大全|福岡景點推介|太宰府天滿宮

太宰府天滿宮
@flickr

太宰府天滿宮係福岡非常著名嘅神社,裏面供奉咗學問之神菅原道真。其實日本都有好多座學問之神神社,但天滿宮先係菅原道嘅埋葬地,加上相傳菅原道真生前愛梅花,梅花喺佢離世後飛到九州。因為呢個飛梅傳說,令天滿宮更有靈氣,成為日本指定文化財產!除咗去天滿宮,旁邊嘅表參道亦係買特產同地道小食嘅好地方,仲有由建築大師隈研吾設計嘅Starbucks,記得唔好錯過! 

 

太宰府天滿宮
地址:〒818-0117 福岡県太宰府市宰府4丁目7−1 (顯示地圖)
網址https://www.dazaifutenmangu.or.jp/

 

📖延伸閱讀:【福岡必買手信】福岡4日3夜行程+最強購物攻略 (連博多住宿推薦)

 

九州攻略大全|福岡景點推介|博多運河城

博多運河城
@canalcity_hakata

去日本玩,又點可以唔shopping? 嚟到九州最大城市福岡,一定要去購物天堂博多運河城!博多運河城係集合咗商店、食肆、遊樂場、劇場嘅大型綜合商場,有超過250間商店,精品、服裝、家品、電器…咩都有得賣!仲有好多人氣食店𠻹!商場中間由一條運河貫穿,夜晚仲有得睇噴水池show,無理由唔嚟啦! 

 

博多運河城
地址:〒812-0018 福岡県福岡市博多区住吉1丁目2 (顯示地圖)
營業時間每日10:00-21:00
網址https://canalcity.co.jp/zh-tw

 

九州攻略大全|長崎景點推介|豪斯登堡

豪斯登堡
@huistenbosch_official

長崎以充滿歐陸風情以聞名,喺呢度可以搵到好多歐洲風格嘅建築同主題公園,而當中最深得小編心嘅,一定係參照荷蘭17世紀街道同建築造景而成嘅豪斯登堡。豪斯登堡唔單止有迷人歐洲建築、夢幻花卉、藝術公園,仲有好多遊樂設施,例如VR過山車、顫憟城、冒險公園等等。建議大家留到夜晚,欣賞埋夜景同幻燈show,又或者喺豪斯登堡嘅酒店住一晚都好正㗎!

 

豪斯登堡
地址:〒859-3292 長崎県佐世保市ハウステンボス町1-1 (顯示地圖)
營業時間每日09:00-22:00
入場費用 (只供參考)成人 ¥7,000;高中生 ¥6,000;中小學生 ¥4,600
網址https://www.huistenbosch.co.jp/

 

📖延伸閱讀:【長崎自由行】終於可以直飛長崎!4日3夜長崎景點行程+必食餐廳+住宿懶人包!
📖延伸閱讀:【長崎必食】又有新航線!編輯嚴選三大長崎美食餐廳!

 

九州攻略大全|熊本景點推介|熊本城

熊本城
@kumamoto-guide

日本三大名城之一嘅熊本城係熊本嘅地標,熊本城由戰國武將加藤清正建造,已經有超過400年歷史,而且城內種咗好多銀杏樹,所以又有銀杏城之稱。整座城除咗極具歷史意義,四周環境亦美不勝收!好可惜喺2016年發生咗一場大地震,所以熊本城仍在修復中。雖然唔可以進入城內,但係喺附近嘅加藤神社有觀景台可以望到熊本城風光,仲可以去埋櫻之馬場城彩苑到買熊本名產同參加歷史文化體驗設施㗎!

 

熊本城
地址:〒860-0002 熊本県熊本市中央区1丁目1 (顯示地圖)
網址https://kumamoto-guide.jp/kumamoto-castle/

 

📖延伸閱讀:【熊本自由行】4日3夜熊本景點行程懶人包 (連熊本必食餐廳推薦)

 

九州攻略大全|大分景點推介|由布院金鱗湖

由布院金鱗湖
@lifetour

去大分縣就唔洗諗,一定要去由布院啦!由布院有仙景一樣嘅金鱗湖,每年9月至3月期間,清晨時分都會因為湖水同四周環境有溫差而出現水霧迷離嘅幻境,但其實無論係任何季節去,都有唔同嘅絕景,係一生人必去一次嘅地方!金鱗湖附近亦有好多特色景點,例如童話村Yufuin Floral Village同湯之坪街道都好值得去,仲有好多人氣甜品店𠻹!

 

由布院金鱗湖
地址:〒879-5102 大分県由布市湯布院町川上 (顯示地圖)

 

📖延伸閱讀:【九州秘境】湯布院由布院景點、餐廳、住宿懶人包!

 

九州攻略大全|大分景點推介|別府地獄

別府地獄
@flickr

大分縣嘅別府,係全日本最多溫泉嘅地方,亦有世界第2大嘅溫泉地熱系統。而呢度最著名嘅溫泉,居然唔係比人浸,而係用嚟觀賞!別府有8大溫泉,分別係海地獄、血之池地獄、白池地獄、鬼石坊主地獄、山地獄、灶地獄、鬼山地獄、龍卷地獄。因為溫泉冒出嘅蒸氣,就好似地獄嘅感覺,所以就合稱為別府地獄。每一個地獄都各有特色,當中景觀最靚嘅海地獄同紅色嘅血之池地獄最著名,不過既然一場嚟到,梗係買套票,睇晒全部啦!

 

別府地獄
地址:〒874-0000 大分県別府市鉄輪559-1 (顯示地圖)
營業時間每日08:00-17:00
入場費用 (只供參考)成人 ¥2,000;高中生 ¥1,350;中學生 ¥1,000;小學生¥900
網址http://www.beppu-jigoku.com/

 

九州攻略大全|宮崎景點推介|高千穗峽

高千穗峽
@kyz.x

宮崎秘境高千穗峽絕對係九州行程highlight!高千穗峽係由五瀨川流動侵蝕阿蘇火山熔岩而形成嘅峽谷,係難得一見嘅自然景觀,最正係唔單止可以喺岸旁觀賞,仲可以喺峽谷之間划船,置身於優美絕景!仲可以近距離睇到日本百大瀑布之一嘅真名井瀑布,非常壯觀!

 

高千穗峽
地址:〒882-1103 宮崎県西臼杵郡高千穂町向山 (顯示地圖)
划船費用 (只供參考)一艘船¥2,000/30分鐘,每艘船可以坐3個成人 ※每兩個5歲以下嘅小童當1個大人計

 

📖延伸閱讀:【宮崎親子遊行程】一家大細去宮崎!Top 3高千穗景點推薦 (連高千穗牧場交通攻略)

 

九州攻略大全|宮崎景點推介|鵜戶神宮

鵜戶神宮
@flickr

日本神社多不勝數,但最特別嘅莫過於係坐落於鵜戶崎岬斷崖嘅鵜戶神宮喇!相傳呢度係日本第一代天皇神武天皇父親嘅出生地,而且係保祐漁業同航海業嘅海神廟。朱紅色正宮建於洞穴之內,同四周嘅海浪、奇形怪狀嘅礁石群、特殊嘅地形互相影襯,成為九州最著名嘅觀光勝地之一!唔單止有眾多信徒嚟參拜,每年亦吸引唔少旅客慕名而來!

 

鵜戶神宮
地址:〒887-0101 宮崎県日南市宮浦3232 (顯示地圖)

 

九州攻略大全|鹿兒島景點推介|櫻島

櫻島
@flickr

櫻島係世上僅有嘅活火山島,亦係鹿兒島最具代表性嘅地標。由於係一個活火山,所以仍然可以見到火山頭噴出煙霧嘅情況,而且每一日都會有小型噴發,喺櫻島上嘅湯之平展望所,仲可以近距離觀賞火山口,雖然明知佢唔會突然爆發,但都真係會令人驚心動魄㗎!由於火山地勢,令島內都有唔少天然溫泉,不妨喺呢度搵間溫泉酒店住1晚!

 

櫻島
地址:〒891-1420 鹿兒島縣鹿兒島市櫻島赤水町 (顯示地圖)

 

九州攻略大全|鹿兒島景點推介|屋久島白谷雲水峽

屋久島白谷雲水峽
@japan-magazine

位於屋久島嘅白谷雲水峽,係面積超過424公頃嘅原生苔蘚森林,整個森林都被綠油油嘅植物覆蓋,加上有好多巨形岩石同川流,令呢度有種幽靜而神秘嘅感覺。連宮崎駿嘅動畫「幽靈公主」都喺呢度取景㗎!白谷雲水峽有幾條登山路線,如果體力好嘅,就挑戰一吓4小時來回嘅太鼓岩路線啦!

 

屋久島白谷雲水峽
地址:〒891-4200 鹿児島県熊毛郡屋久島町宮之浦 (顯示地圖)

 

九州攻略大全|自駕遊注意事項

  1. 租車時記得租埋GPS,雖然用Google map都得,但始於有時喺郊外地方,萬一電話收唔到就唔好啦!而且日本導航主要都係靠map code,非常準確,所以最好都係租當地GPS用啦!
  2. 租車一定要買全保險,始終10日行程,又唔係自己熟識嘅路,要保障返自己。
  3. 提早租車,因為就嚟踏入旅行旺季,想租到又平又啱心水嘅車,起碼要預早3星期訂呀。
  4. 日本好多高速公路都需要收費,大家可以喺租車時租定一張ETC卡,畀錢就方便得多。 

 

📖延伸閱讀:【九州溫泉推薦特輯】日本九州溫泉一泊兩食酒店推介!(連浸溫泉注意禮儀)
📖延伸閱讀:【久留米一日遊】久留米景點行程 + 美食餐廳 + 高質住宿推薦!
📖延伸閱讀:【Hotels.com大使推介】日本名古屋3日2夜行程懶人包!
📖延伸閱讀:【九州outlet比較】鳥栖PREMIUM OUTLET vs MARINOA CITY大比併!

 

Hotels.com酒店優惠Hotels.com酒店優惠