定期送上世界各地最新、最地道嘅旅遊資訊!

【USJ Fast Pass】大阪環球影城交通遊玩攻略 (連必備大阪環球影城App)

大阪自由行,食買玩當然係行程嘅重點,玩嘅部分,識去一定係去大阪環球影城啦!但係入場門票最平都要成五百幾蚊,仲要買埋四百至五百蚊嘅Express pass,分分鐘要成千蚊!唔想咁肉赤,小編為特別為精打細算嘅你哋送上大阪環球影城攻略,去環球影城,唔洗Express Pass一樣可以玩到盡!

 

📖延伸閱讀:【香港假期好去處】2019公眾假期請假攻略 (連長短線旅遊地點推薦)

 


大阪環球影城攻略一買飛前睇下樂園人數預測!

喺買入場門票前一定一定一定(因為好重要所以要講三次)要睇下樂園人數預測!呢個網唔單只會影響你洗唔洗買Express pass,亦會影響入場門票嘅價錢。因為當日愈多人,門票價錢都會愈貴,想慳番啲錢喺樂園入面買紀念品就一定要睇啦!
呢個樂園人數預測有分五種顏色,大空 空き 平常 混雑 大混 超混。只要你見到當日人潮係「平常」以下,都可以好輕鬆咁玩哂成個園區,完全唔洗同人逼,門票都會平啲!黃色粉紅色就會多人少少,唔買Express pass都可以玩哂成個樂園,但係就要預咗要排隊架啦!如果係橙色紅色就一定要買Express pass,如果唔係排隊排到天光都未有得玩啦!如果你去果日真咁啱係橙色紅色,都唔洗咁灰住,繼續睇埋落去,點樣唔洗買Express pass都玩得哂成個樂園啦!
大阪環球影城攻略二|下載大阪環球影城App 各遊戲排隊時間一目了然
為分秒必爭嘅你送上最實用嘅大阪環球影城攻略-出發之前記得download定大阪環球影城App,就可以清楚知道每個遊戲嘅等候時間,唔洗專登行去到每個遊戲門口到睇啦!只要有一App在手,就算冇Express Pass都可以輕鬆玩盡所有遊戲啦!
大阪環球影城攻略三|飛奔去霍格華滋的魔法世界!

@usj.co.jp
必玩哈利波特禁忌之旅,真心超正

點樣唔洗買Express pass,唔洗拎整理券就可以入去「哈利波特魔法世界」化身做妙麗/哈利兼勇闖魔法世界?環球影城多數都會比預定嘅開放時間提早開門,最早果一批人就可以不洗排隊、不洗攞籌直接入去園區,之後人流開始多,就會用整理券去限制入園區嘅人數。仲有一點要注意,就係環球影城每日嘅開放時間都唔一樣,記得要check清楚,到時早啲去到樂園門口,準備飛奔去魔法世界啦!

 

大阪環球影城攻略四|未出發先興奮! Minions Parks三大賣點
圖片來源:usj.co.jp
要數近期至hit嘅環球影城園區,緊係Minions Park啦!大阪環球影城Minions Park喺4月21日隆重登場,等我哋先睹為快,睇下Minions Park入面到底有咩遊玩攻略啦!首先,想同Minions有進一步嘅接觸,就一定唔好錯過每日都有嘅「迷你兵團調皮百厭時間」(Minions Show),把握機會同造型趣怪嘅Minions影番張Selfie,post上網一定吸哂啲Like!「迷你兵團百厭乘車遊」係園區最受歡迎嘅機動遊戲,次次起碼要排两個鐘以上先玩到,所以入到園區就要第一時間去排隊玩啦!最後,想帶走美好回憶,極度推薦買Minions造型嘅爆谷桶!帶佢返香港,每日見到佢心情都靚啲!但係記得一入Minions Park就要買,因為佢勁受歡迎,手快有手慢無,隨時「兩手空空得個吉」!

 

大阪環球影城攻略五|識住一定住環球影城附近

想一早起身去樂園排隊,直奔哈利波特魔法世界,又想玩到最後一刻即刻食個飯就返酒店休息?計我話,識住一定揀大阪環球影城附近嘅酒店!大阪環球影城附近環境清幽,相比市中心少啲熙熙攘攘嘅街道,多一份悠閒感,係大阪住宿嘅好地方。

 

📖延伸閱讀:【日本冬天好去處】五大日本滑雪酒店推薦

 

 

大阪環球影城附近酒店推薦|京阪環球塔酒店
呢間酒店交通方便,行五分鐘就到環球影城!酒店唔單只有得買USJ門票,連大阪周遊卡都有,非常方便,坐船去天保山玩都好方便架!另外呢間酒店有提供四至五人房,最啱一家大細/一大班朋友一齊住!浴室同廁所係分開嘅,咁就唔怕要爭廁所用啦!

 

京阪環球塔酒店
地址:6-2-45, Shimaya, Konohana-ku, 大阪, Osaka-fu, 554-0024, 日本 (顯示地圖)
星級 | ★★★☆☆  
位置 | ★★★★★
設施 | ★★★★★  
環境 | ★★★☆☆
價格 | 查看價格

 

大阪環球影城附近酒店推薦|環球影城港口酒店 

呢間酒店大堂以Minions做主題,最岩Minions迷!房間好整潔同埋都算大。最驚喜係廁所提供有清涼足貼,去完玩成日之後貼就啱哂啦!

 

 

環球影城港口酒店
地址:1-1-111 Sakurajima, Konohana Ku, 大阪, Osaka-fu, 日本 (顯示地圖)
星級 | ★★★★☆  
位置 | ★★★★★
設施 | ★★★★☆
環境 | ★★★★☆
價格 | 查看價格

 

大阪環球影城附近酒店推薦|日本環球影城®園前飯店

環球迷嚟到呢間一定會尖叫! 大廳同公共空間充滿咗好多經典嘅電影元素。行一分鐘就到達環球影城大門,係最近環球影城嘅酒店! 樓下都有好多餐廳、便利店、紀念品專門店、甜點cafe同埋藥妝店等,去完環球影城玩夜晚仲可以行街!

 

日本環球影城®園前飯店
地址:6-2-52 Shimaya Konohana-ku, 大阪, 554-0024, 日本 (顯示地圖)
星級 | ★★★☆☆  
位置 | ★★★★★
設施 | ★★★★★  
環境 | ★★★☆☆
價格 | 查看價格

 

大阪環球影城附近酒店推薦|日本環球影城天空 SPA 獨特酒店™


日本環球影城天空 SPA 獨特酒店又係另一間好近JR站嘅酒店,而價錢上,比其他附近酒店都較優惠。

雖然房間比較起上嚟冇其他咁大,但係勝在於設施,例如頂樓嘅Spa就係呢間酒店嘅賣點之一,而且浸住個Spa仲有個海景睇。呢種享受真係唔係度度搵到!

 

日本環球影城天空 SPA 獨特酒店™
地址:6-2-25 Shimaya, Konohana-ku, Osaka, Japan (顯示地圖)
星級 | ★★★☆☆  
位置 | ★★★★☆
設施 | ★★★★☆  
環境 | ★★★★☆
價格 | 查看價格

 

大阪環球影城附近酒店推薦|環球維塔港酒店

環球維塔港酒店係一間好新嘅酒店,係第7間環球影城正式合作嘅酒店,2018年7月開幕。酒店裝潢用上好多鮮艷嘅色系,感覺令人非常開心同有活力!

而且酒店範圍入面例如入口嘅玻璃、電梯入面都會搵到好多Minions嘅踪影。整體感覺都會提升到你嘅入住體驗。

 

環球維塔港酒店
地址:Konohana, Shimaya 6-1-16, Osaka, Japan (顯示地圖)
星級 | ★★★☆☆  
位置 | ★★★★☆
設施 | ★★★★☆  
環境 | ★★★★☆
價格 | 查看價格

 

大阪環球影城交通攻略

要去大阪環球影城,識搭就一定係搭JR,事關JR係最方便可以去到大阪環球影城嘅交通。無論身處係大阪邊一個地方,都必定要搭到去JR「西九条」站,然後再轉乘去櫻島方向嘅櫻島線,搭多個站就會到歡樂嘅環球影城站 (ユニバーサルシティ,Universal City)喇。抵達環球影城站之後,再行大概5-10分鐘就會到大阪環球影城。

 

📖延伸閱讀:【大阪親子遊】大阪岬公園遊玩指南!(大阪水上樂園+動物園+睇海豚4合1)
📖延伸閱讀:【窮遊大阪-平價住宿篇】Top 5 大阪膠囊酒店!
📖延伸閱讀:【大阪二手店】大阪二手名牌邊度買?大阪中古店、古著店特集!
📖延伸閱讀:【你個野壞左】大阪難波夾龍蝦小店 (編輯推介大阪美食!)

 

Hotels.com 酒店優惠