定期送上世界各地最新、最地道嘅旅遊資訊!

【香港文青必去】美荷樓青年旅舍住宿報告 (連四十一冰室必點美食推薦)

無咁多假去外地旅行,其實本地遊都有好多選擇。保存別具歷史同建築價值嘅美荷樓,結合咗青年旅舍、生活館同四十一冰室,呈現出一個個舊香港嘅故事。今次小編會提供青年旅舍住宿報告比大家參考吓啦!

 

香港文青系列 | 美荷樓青年旅舍的故事

想當年,喺1953年嘅聖誕夜,石硤尾一場大火,令到差不多近58,000居民無家可歸。當時嘅政府開展咗興建公共房屋計劃,為災民提供臨時居所。而美荷樓就係首批嘅公屋,亦係香港僅存嘅第一代「H型」徙置大厦。係2010年,美荷樓更被古物諮詢委員會評為「二級歷史建築」。


@美荷樓青年旅舍Facebook

2009年發展局將擁有「H」形設計特色,同獨特歷史背景嘅美荷樓列入「活化歷史建築伙伴計劃」,活化成如今嘅美荷樓青年旅舍,係2013年正式開幕。

 

香港文青系列 | 美荷樓青年旅舍住宿報告

旅舍總共有提供129間房間,有好多房種選擇,有雙人房、三人房、家庭房、八人房,另外仲有以60至70年代嘅公屋為主題嘅主題房等。


房內有保險箱、茶包同電熱水壺提供,不過無牙膏牙刷,所以記得要自己帶。總括嚟講,房間唔算細,而且非常乾淨企理!

 

香港文青系列 | 美荷樓青年旅舍設施

作為青年旅舍,有好多背包客入住,所以共用空間同設施都相對好重要。


荷樓共用空間嘅環境充滿懷舊氣息,有提供共用廚房、雪櫃、微波爐、洗衣機同儲物櫃,設施算齊備同好乾淨。另外仲有平台花園,相當舒適。

香港文青遊必去 | 細味美荷樓生活館


@香港青年旅舍協會Facebook

美荷樓青年旅舍入面設立咗美荷樓生活館,展示咗香港50至80年代公屋嘅發展過程同歷史,紀錄咗嘅唔只係香港昔日嘅居住環境、社會文化,亦記載咗幾代香港人嘅集體回憶。美荷樓生活館可以稱得上係公屋博物館。


@香港青年旅舍協會Facebook

館內擺放咗過千件附有香港歷史嘅物品,又複製咗當時嘅居住環境單位,浴室、廚房、睡房等。生活館亦展示咗唔少昔日嘅圖片,加上多段口述歷史訪問,了解到嘅唔單單係公屋當時嘅生活環境,仲有舊時艱難嘅生活點滴,然後你可能會反思依家嘅物質其實真係好豐裕。

 

香港文青遊必去 | 美荷樓四十一冰室


@香港青年旅舍協會Facebook

美荷樓除咗有青年旅舍、生活館,仲有一間「四十一冰室」,裝潢繼續採用大量香港元素。食物方面以西式為主。冰室以社企模式經營,價錢相當貼地。


@香港青年旅舍協會Facebook

推介其中以健康為題嘅「特式雙層芝士豆腐漢堡」,食落有少少食肉嘅質感,但唔肥膩,健康得嚟又好食!

 

YHA美荷樓青年旅舍
地址:九龍深水埗巴域街70號石硤尾邨41座 (顯示地圖)
星級 | ★★★☆☆  
位置 | ★★★☆☆  
設施 | ★★★☆☆  
環境 | ★★★★☆
價格 | 查看價格

 

Hotels.com酒店優惠