定期送上世界各地最新、最地道嘅旅遊資訊!

【福岡必食推薦】久留米一日遊 — 久留米景點行程 + 美食餐廳 + 高質住宿推薦!

 

福岡
久留米位於福岡縣南部,係福岡必遊城市之一,就等小編幫你plan吓久留米一日遊嘅行程,盤點唔可以錯過嘅久留米景點同埋福岡必食美食啦!久留米市係日本第一批成立嘅城市,人口係福岡縣第三多。久留米市附近嘅柳川市有日本威尼斯嘅美譽,風光非常優美,旅人通常會久留米同柳川兩個市夾埋一齊玩。

 

📖延伸閱讀:【去旅行用日本app】超實用!日本旅遊app + 日本交通app推薦
📖延伸閱讀:【福岡必買手信】福岡4日3夜行程+最強購物攻略 (連博多住宿推薦)

 

久留米一日遊 | 久留米景點推介 | 水天宮

水天宮
@kotaro_hig

去日本總要去吓神社或者寺廟參拜,嚟到久留米,不妨去環境清幽嘅水天宮散散步,慢活一下。水天宮以河而建,供奉多個與水有關嘅神,保佑居民平安。久留米有好多有關河童嘅傳說,所以都有居民會按傳統去水天宮參拜,祈求出入平安。水天宮有多個鳥居,大家不妨去租一套和服,再嚟呢度影呃like打卡相,神社加埋和服簡直係絕配!另外,一年四季水天宮都有唔同祭典,大家可以夾吓時間,感受吓典禮氣氛!

 

水天宮
地址:〒830-0025 福岡縣久留米市瀨下町265 (顯示地圖)
開放時間:星期一至日 08:00-17:00

 

久留米一日遊 | 久留米景點推介 | 久留米美術館、石橋文化中心

久留米美術館、石橋文化中心
@kurume_girls_trip

無論你對藝術有冇興趣,小編都推薦你嚟久留米藝術館,以及同一園區內嘅石橋文化中心,因為呢度除咗收藏好多藝術作品畫作同書法外,美術館外嘅公園同庭院都非常靚,撞正波斯菊盛開嘅話,就可以欣賞一片壯觀嘅花海。

 

久留米美術館
地址:〒839-0862 福岡縣久留米市野中町1015 (顯示地圖)
開放時間:星期二至日 10:00-17:00、星期一休息
網址:www.ishibashi-bunka.jp  

 

久留米一日遊 | 久留米景點推介 | 柳川泛舟

柳川泛舟
@julianjowise

柳川市就喺久留米市附近,搭西鐵電車15分鐘左右就到,小編極度推薦你順便玩埋呢度。柳川有好多人工小河,就好似威尼斯咁,所以有人叫佢做日本威尼斯。泛舟遊河喺嚟到柳川旅行嘅指定動作!船夫會一邊慢慢咁撐住船,一邊介紹柳川市種種故事,甚至唱一啲傳統民謠助興,微風吹過,真係好有寫意。沿河風景會隨住四季變遷,夏天可以欣賞楊柳,秋天就睇紅葉、春天當然就係賞櫻啦!大部份游河路線都會經過柳川城下町,同埋水上商店。

 

柳川觀光船集合點
地址:〒832-0826 福岡縣柳川市三橋町高畑329 (顯示地圖)
營業時間:星期一至日 09:30-16:30

 

福岡必食 | 久留米美食推介 | 久留米拉麵元祖店「大砲拉麵」(大砲ラーメン)

久留米拉麵元祖店「大砲拉麵」(大砲ラーメン)
@guitar_becky

九州拉麵中最受歡迎嘅派別可以話係豬骨濃湯拉麵,而久留米正係豚骨拉麵其中一個發祥地!要食最正宗嘅久留米拉麵,就一定要去已有66年歷史嘅大砲拉麵。呢度嘅豚骨拉麵唔花巧,堅持使用有幾十年歷史嘅食譜熬製濃郁豬骨湯底,每啖都係令人滿足嘅豬油香味。日式叉燒肥瘦適中,陣陣油香,同豬骨濃湯完全係絕配呀!

 

大砲拉麵本店
地址:〒830-0005 福岡縣久留米市通外町11-8 (顯示地圖)
營業時間:星期一至日 11:00-21:00

 

📖延伸閱讀:【日本拉麵篇】十大日本米芝蓮拉麵推介2019!

 

福岡必食 | 久留米美食推介 | 「串燒鐵砲」(焼とり 鉄砲)

「串燒鐵砲」(焼とり 鉄砲)
@makotomatsuo

除咗豚骨拉麵,久留米仲係日本嘅串燒之都,你好容易就可以搵到大大小小嘅串燒店。嚟到已經開業40年嘅串燒鐵砲,點可以唔叫久留米名物烤雞串燒呢!久留米嘅串燒有別於同其他地方,就係鍾意捲住嚟燒,據說串燒露筍煙肉捲就係由串燒鐵砲發明。所有串燒現場即叫即燒,炭香四溢,怕熱氣?梗係叫噃杯當地啤酒啦!呢度串燒種類繁多,有種多種內臟選擇,仲有少見嘅食材,例如馬肉、牛心等。溫提:呢度下晝5點先開門,通宵營業至到凌晨4點,所以唔好咁早嚟呀!

 

焼とり 鉄砲 久留米本店
地址:〒830-0017 福岡縣久留米市日吉町107-2 (顯示地圖)
營業時間:星期一至日 17:00 – 04:00

 

福岡必食 | 久留米美食推介 | 「茶房古蓮」手作抹茶綿花冰

 「茶房古蓮」手作抹茶綿花冰
@kileem6

食咗久留米拉麵同埋串燒咁多鹹味嘢食,梗係要食噃啲甜品中和一下。茶房古蓮係一間已經開業70年咁耐嘅手作雪糕店,一直屹立久留米,深受當地人歡迎。茶房古蓮提供多款手作雪糕同綿花冰,招牌味道就係抹茶味。招牌抹茶綿花冰賣相已經贏曬,除咗主角綿花冰,仲有抹茶雪糕球、小丸子同埋紅豆蓉。抹茶味道甘香濃郁,唔會得個甜字,抹茶控千祈唔好錯過!

 

茶房古蓮久留米站店
地址:〒830-0032 福岡縣久留米市東町上天神田316−2 (顯示地圖)
營業時間:星期一至日 10:30 – 21:00

 

久留米酒店推介 | 西鐵久留米站東口東橫INN

西鐵久留米站東口東橫INN

東橫INN位置非常方便易搵,位處於西鐵電車久留米站,對即日往返久留米市同柳川市嘅旅客嚟講,住喺呢度就最適合不過。久留米市中心嘅酒店大多數都唔係好豪華,呢間亦都唔例外,但勝在配套設施好,客房大小都夠寬敞,而且附近有好多出名嘅久留米餐廳同商場,搵食同買手信都好方便。

 

西鐵久留米站東口東橫 INN
地址:JPN久留米3-93-4, Tenjim-machi (顯示地圖)
星級 | ★★★☆☆  
位置 | ★★★★★  
設施 | ★★★☆☆  
環境 | ★★★☆☆  
價格 | 查看價格  

 

柳川酒店推介 | 奧哈納酒店 (柳川藩主立花邸御花)

奧哈納酒店 (柳川藩主立花邸御花)
@tachibanateiohana

奧哈納酒店 (又稱柳川藩主立花邸御花) 提供傳統日式住宿體驗,酒店仲有一個環境清幽嘅日式庭園連小池塘,你可以坐喺客房嘅露台,呷著清酒,悠閒咁欣賞庭園。酒店嘅位置雖然比較唔算就腳,但幽靜嘅環境,俾你真正放鬆身心,讓心境靜落嚟。

奧哈納酒店 (柳川藩主立花邸御花)_2
@酒店官網

客房方面,你可以揀入住傳統日式榻榻米房間,或者有睡床嘅普通客房,所有房間都有貼心嘅設施,酒店亦都提供地道日式早餐同晚餐,用嘅都係當地時令食材。

 

奧哈納酒店 (柳川藩主立花邸御花)
地址:〒832-0069 福岡縣柳川市新外町1 (顯示地圖)
星級 | ★★★☆☆  
位置 | ★★★☆☆  
設施 | ★★★★☆  
環境 | ★★★★★  
價格 | 查看價格  

 

📖延伸閱讀:【九州溫泉推薦特輯】日本九州溫泉一泊兩食酒店推介!(連浸溫泉注意禮儀)
📖延伸閱讀:【福岡必買手信】福岡4日3夜行程+最強購物攻略 (連博多住宿推薦)
📖延伸閱讀:【九州自由行】鐵道遊九州景點全攻略 (連福岡、熊本住宿推薦)
📖延伸閱讀:【名古屋自由行】名古屋必買—長島三井Outlet、土岐Outlet攻略 (連Top 3名古屋必食餐廳推薦)

 

 Hotels.com酒店優惠 Hotels.com酒店優惠