定期送上世界各地最新、最地道嘅旅遊資訊!

【台北一人遊2018】獨遊台北玩法大解構(連台北一人住宿推薦)

「個個都一個人去旅行,唔通個個都想一個人去旅行咩」,嗱嗱嗱,如果咁諗就錯喇,其實獨遊都可以好多樂趣!獨遊可以隨心所欲,行程自己話事,食咩自己話事,連想幾點起身都可以自己決定!Hotels.com Blog為獨遊人士打造全新嘅獨遊系列,為你解構一個人旅行嘅各種玩法!第一站率先為你送上獨遊台北攻略,台北一人餐廳、景點、住宿,一一為你折解!

 

📖延伸閱讀:【台灣手信2018購物清單】Top 10 台北手信2018必買推介!
📖延伸閱讀:【台北親子遊】帶著全家去旅行!台北親子酒店、餐廳、景點推薦

 

台北一人遊 2018|獨遊台北大解構|台北一人景點

台北一人遊 2018|獨遊台北景點推薦|美堤河濱公園


@Flickr

香港城市化,郊野範圍越嚟越少,周日想親親大自然都人山人海,感覺侷促。反觀,台北城市規劃做得唔錯,環境綠化、自然環境都保育得好好,獨遊台北去郊外呼吸一下新鮮空氣,其實都係一個唔錯嘅選擇。美堤河濱公園位於台北中山區,公園入面有一大片草地,帶張野餐墊鋪一鋪,野餐、瞓晏教、睇書都冇問題!公園內亦有規劃完善嘅單車徑,租架單車吹下海風都幾寫意!動、靜態活動呢度通通都有,一個人都唔會悶!

 

美堤河濱公園
地址:台灣台北市中山區北安路400110號 (顯示地圖)
交通:捷運西湖站步行20分鐘

 

台北一人遊 2018|獨遊台北景點推薦|北投一日遊

相信大家對九份、十分都唔陌生,今次小編推介嘅地方,係相對比較少香港人去嘅北投!北投係台灣嘅溫泉勝地,冬天可以去浸返個暖笠笠嘅溫泉之外,其實仲有好多其他景點可以去埋。

台北一人遊 2018|獨遊台北景點推薦|地熱谷


@Flickr

第一站你可以去地熱谷,佢係北投溫泉嘅主要源頭之一,水溫高達90度,入到去煙霧瀰漫,好似去咗仙境一樣!呢度亦有「地獄谷」之稱,但小編就覺得白煙處處,加上泉水清澈呈湖藍色,非常之靚,完全冇地獄嘅感覺!

 

地熱谷
地址:台北市北投區中山路 (顯示地圖)
交通:捷運新北投站步行15分鐘

 

📖延伸閱讀:【台北溫泉旅行】六大必去台北温泉酒店推薦(含陽明山、北投溫泉酒店!)
📖延伸閱讀: 【快閃台北三日兩夜2018】台灣3日2夜食、玩、訓行程懶人包,酒店500蚊有找!

 

台北一人遊 2018|獨遊台北景點推薦|北投圖書館


@Flickr

第二站可以去北投圖書館,北投圖書館係全台灣第一個綠建築圖書館。圖書館被樹木包圍,放眼望出去都係一片綠悠悠,隨處搵個位影相打卡都好靚!而且圖書館有好多環保綠化設施,例如屋頂有太陽能光電板發電,貫徹環保嘅理念。

 

北投圖書館
地址:台北市北投區光明路251號 (顯示地圖)
交通:捷運新北投站步行6分鐘

 

台北一人遊 2018|獨遊台北景點推薦|溫泉博物館


@Flickr

最後一站緊係要去溫泉博物館,了解北投溫泉嘅歷史同埋知識,獲!以前博物館係一個浴場,當時參照日本靜岡縣伊豆山溫泉浴場而建成,亦係全台灣最大嘅公眾浴場。後嚟浴場冇再經營,1997年被定為三級古蹟,裝修之後就成為而家嘅溫泉博物館喇。

 

溫泉博物館
地址:台北市北投區中山路2號 (顯示地圖)
交通:捷運新北投站步行10分鐘

 

📖延伸閱讀:【台北親子景點】台北近郊茶園親子遊3日2夜行程及住宿推薦
📖延伸閱讀:【台北自由行】仲睇旅遊書?當地人話你知—最hit台北新景點 2018!

 

台北一人遊 2018|獨遊台北景點推薦|淡水


@Flickr

去過台北嘅人,相信都去過淡水,但你又試過喺淡水睇日落未呢?淡水有多個隱世地方睇日落都好靚,最經典嘅日落地點就係漁人碼頭嘅情人橋,情人橋對住個無敵大河景,夕陽西下,橙黃色嘅光線灑落喺海面上同橋上,超級浪漫!另外,小編大推去Ancre Café克黑咖啡度睇日落,Café窗口對正淡水河景,嘆住咖啡再欣賞日落,真係冇得輸!對住個美景一路食下午茶一路等日落,享受美好嘅獨遊台北時光!

@instagram
對住個美景一路食下午茶一路等日落,享受美好嘅一個人時光!

 

Ancre Café克黑咖啡
地址:台灣新北市淡水區中正路233-3號 (顯示地圖)
交通:於捷運淡水站步行16分鐘或乘住客運於小白宮下車再步行前往

 

台北一人遊 2018|獨遊台北大解構|台北一人美食

台北一人遊 2018|獨遊台北景點推薦|基隆廟口夜市


@Flickr

去台灣點可以唔去夜市食盡台灣美食呢!士林夜市、饒河夜市可能你已經去過,今次推薦畀獨遊人士,係遠離台北市中心嘅基隆廟口夜市!正正係因為基隆夜市唔喺台北市中心,呢度相對冇咁多遊客,唔會人頭湧湧,但美食一樣多不勝數!喺九份有客運可以直接去到基隆,去完九份、十分一日遊,只須1個鐘車程就可以去到,亦都有客運直接返去台北,交通都非常方便!

 

基隆廟口夜市
地址:台灣基隆市仁愛區仁三路 (顯示地圖)
交通:九份坐基隆客運788於基隆火車站落車

 

📖延伸閱讀:【文青必去台北景點】打卡必去台北cafe、台北市集、旅店特集!

 


台北一人遊 2018|獨遊台北景點推薦|夏季三角景觀咖啡廳

@Facebook

獨遊台北最適合就緊係去睇靚景啦!台北新竹縣嘅夏季三角景觀咖啡廳,開業至今大受歡迎!餐廳有一大片草地,餐廳喺草地設置用餐區,坐喺草地用餐就好似去野餐咁,勁chill!另外,亦有室外露天用餐區同室內用餐區,每個位置都可以欣賞到怡人嘅景色!呢度更加係睇日落、夜景嘅好地方,獨遊台北必去啊!

 

夏季三角景觀咖啡廳
地址:台灣新竹縣湖口鄉長安路361巷 (顯示地圖)

 

台北一人遊 2018|獨遊台北景點推薦|天喜迷你小火鍋

天喜迷你小火鍋@Facebook

台北嘅天喜迷你小火鍋係提供一人一火鍋,店中間有張U字型餐枱,就好似日式迴轉壽司、鐵板燒咁。點餐方面,只係需要同店員點湯底同拼盤,額外嘅配料就好似迴轉壽司咁,唔同顏色嘅碟就代表唔同嘅定價,可以自由揀選自己鍾意嘅配料。香港人咁鍾意打邊爐,一人一鍋對於一人遊嚟講,簡直就係獨遊必食之選啦!

 

天喜迷你小火鍋
地址:台北市大同區南京西路306號 (顯示地圖)
交通:捷運北門站,步行約10分鐘

 

獨遊台北大解構:台北一人住宿

睇完獨遊台北嘅景點、美食攻略之後,係咪好心動想即時買機票嚟返次「話飛就飛」嘅一個人旅行呢?睇埋台北一人住宿推介,睇下一個人喺台北住邊到至抵啦!

 

📖延伸閱讀:【米芝蓮追星地圖】台北米芝蓮星級餐廳潮聖攻略2018
📖延伸閱讀:【台北自由行】Top 10 最新台北民宿推薦2018!

 

台北一人遊 2018北一人住宿|路徒行旅(Roaders Hotel


@__chihi_ko__

呢間酒店位於台北市中心—西門町,交通四通八達,非常方便!而且西門町就好似香港嘅旺角一樣,幾夜都唔怕冇野食!酒店24小時接待客人,就算夜機去到台北都唔洗擔心!酒店有單人房提供,絕對係獨遊台北人士嘅好選擇!

路徒行旅
地址:台北中正區延平路 68 號 (顯示地圖)
星級 | ★★★☆☆  
位置 | ★★★★☆  
設施 | ★★☆☆☆  
環境 | ★★★☆☆
價格 | 查看價格  

 

北一人遊 2018|台北一人住宿|台北市太空艙旅舍(SPACE INN XINYI

@Facebook

太空艙係近年新興嘅住宿模式,簡直係為獨遊人士而設。台北市太空艙旅舍位於台北101附近,旺中帶靜,最重要價錢實惠,平均$200零蚊一晚! 

 

台北市太空艙旅舍
地址:台北信義區光復南路 549 號 (顯示地圖)
星級 | ★★☆☆☆  
位置 | ★★★★☆  
設施 | ★★☆☆☆  
環境 | ★★☆☆☆
價格 | 查看價格  

 

📖延伸閱讀:【台北酒吧推介】Top 3靚景台灣高空酒吧Rooftop bar!(含台北夜店推介)

 

台北一人遊 2018|台北一人住宿|東旅背包客 – 礁溪

東旅背包客 - 礁溪

有時獨遊人士都想喺旅程入面認識到唔同國家嘅人,而東旅背包客就有唔同人數選擇嘅共享房間,亦有專畀女性入住嘅房間,就算一個人獨遊台北都好易喺度認識到嚟自世界各地嘅朋友。設備方面亦算唔錯,床嘅大細比起其他同類住宿嚟講比較大;呢度亦有簡單早餐提供,仲有溫泉浸添,最重要係價錢夠平,啱晒一人遊啊!                                              

東旅背包客 – 礁溪
地址:台北礁溪礁溪鄉公園路 5 號 (顯示地圖)
星級 | ★★☆☆☆  
位置 | ★★★★☆  
設施 | ★★★☆☆  
環境 | ★★★☆☆
價格 | 查看價格  

 

台北一人遊 2018|台北一人住宿|東盒青旅 – 台北

東盒青旅 - 台北

東盒青旅位置好方便,好近捷運站之餘,仲有幾間便利店喺附近,夠哂方便。唔鍾意同人share一間房,酒店都有單人房提供,不過都需要共用洗手間,但廁所非常乾淨。不過記得帶個人用品,好似牙膏、牙刷、毛巾等等,因為酒店唔會提供。以青年旅館住單人房嚟講,東盒青旅價錢算係相對抵住!                                                                                                           

東盒青旅 – 台北
地址:台北大安區忠孝東路四段 162 號 12 樓 (顯示地圖)
星級 | ★★☆☆☆  
位置 | ★★★★☆  
設施 | ★★★☆☆  
環境 | ★★☆☆☆
價格 | 查看價格  

 

📖延伸閱讀:【台灣自由行遊記】平溪、九份,十分行程懶人包!
📖延伸閱讀:【台東自由行】台東景點懶人包!所有必去景點一次過話你知!
📖延伸閱讀:【台灣自由行】當地人推介Top 10 台灣必食地道小食

 

Hotels.com酒店優惠