定期送上世界各地最新、最地道嘅旅遊資訊!

【東京親子遊2019】最新Top 6東京近郊親子景點推薦 — 交通、住宿、在地美食總整理!

東京有咁多主題公園、樂園、農場同水族館,絕對係帶小朋友出遊嘅最住地點!2019仲接二連三咁有樂園開幕,今個暑假,一於嚟個東京親子遊啦!小編已經嚴選出2019年Top 6東京近郊親子景點,仲整理好各個景點嘅在地美食、交通同親子住宿攻略,等各位家長可以輕輕鬆鬆帶埋小朋友玩餐飽!

 

📖延伸閱讀:【去旅行用日本app】超實用!日本旅遊app + 日本交通app推薦
📖延伸閱讀:【東京文青快閃旅行地點】想搵東京Cafe、咖啡店?即睇東京Blue Bottle Coffee潮聖攻略地圖!

 

東京親子遊2019|Top 6東京近郊親子景點推薦|流光森林 – 森林家族樂園

流光森林 - 森林家族樂園
@facebook

距離東京大概1小時火車程,位於茨城懸嘅流光森林係一個農場公園。公園嘅理念係想提供比生活喺大城市嘅小朋友一個同大自然接觸嘅機會。小朋友可以親身體驗擠牛奶,餵兔仔同騎馬,仲有爬繩網、空中滑翔、天鵝船等等嘅遊樂設施,玩足一整日都未必玩得哂!

流光森林 - 森林家族樂園_2
@観光いばらき

流光森林嘅重點其實係2018年6月先至建成嘅森林家族公園!森林家族嘅公仔人物可愛生動,由1985年誕生之後就一直大眾歡迎,唔單止係小朋友,就連大人都被精緻嘅公仔屋同各式各樣嘅迷你家品吸引,成為森林家族收藏家!而呢個森林家族公園就將故事內嘅場景,以真人比例帶到現實世界,等一眾森林家族迷可以親身走入故事當中!

流光森林 - 森林家族樂園_3
@flickr

由內到外嘅裝飾同傢俬同非常精緻,就連唔係森林家族迷嘅小編都少女心大爆發,完全滿足到細個同公仔玩煮飯仔嘅心願!

 

流光森林自助燒烤

流光森林自助燒烤
@facebook

流光森林入面設有自助燒烤場,食物同燒烤用具都有提供,唔洗自己提早預備,非常方便!就算帶住小朋友,都可以輕鬆享受BBQ嘅樂趣!燒烤場仲有瓦遮頭,唔使怕日曬雨淋,而且可以容納超過700人!只要提早一日去官網預約就可以㗎啦!

流光森林自助燒烤_2
@ibaraido

大家可以揀唔同嘅燒烤套餐,一份基本套餐都已經有當地農場出產嘅蔬菜,雞肉同牛肉。如果覺得唔夠,可以另外再加其他配料。

 

流光森林 – 森林家族樂園
地址:茨城県稲敷市上君山2060-1(顯示地圖)
交通:乘坐JR常磐線到牛久站,再去東號出口5第6號車站轉坐公園免費接駁巴士
營業時間:每日 10:00-17:00 ※會因季節而有所調整
入場費用 (只供參考):成人 ¥1,500;中小學生 ¥1,100
網址:https://www.ibaraido.co.jp/

 

東京親子遊2019|Top 6東京近郊親子景點推薦|三鷹之森吉卜力美術館

三鷹之森吉卜力美術館
@flickr

一講到行美術館,小朋友未必好有興趣!不過呢個由宮崎駿親手打造嘅三鷹之森吉卜力美術館,絕對會令小朋友玩到樂而忘返!三鷹之森吉卜力美術館位於三鷹市嘅井之頭恩賜公園內,係一座被藤蔓包圍嘅3層高美術館,入面展示咗宮崎駿製作動畫嘅過程、經典場景實體化、小劇場,仲有動畫內嘅道具同模型,等大家可以更深入了解宮崎駿嘅動畫世界!

三鷹之森吉卜力美術館_2
@MATCHA

宮崎駿每一套作品背後都有發人深省嘅意思,故事嘅情節同畫風都有感動人心嘅力量,唔同年齡層嘅人去睇都有唔同體會,相信係大人同小朋友嘅共同回憶!而當中最令小編印象深刻就係天空之城嘅故事,見到美術館內嘅天空之城機械兵,猶如進入咗動畫世界,童年回憶返哂嚟!

三鷹之森吉卜力美術館_3
@吉卜力樂園

小朋友最鐘意一定係2樓嘅龍貓巴士!唔單止係觀賞㗎!係可以直頭走入去坐龍貓巴士!仲有好多宮崎駿動畫商品賣,無論係大人定細路都會沉醉喺呢個奇幻世界!

 

三鷹之森吉卜力美術館
地址:東京都三鷹市下連雀1-1-83 (顯示地圖)
交通:由新宿出發,乘坐JR中央線去到三鷹站,再步行大概15分鐘
網址:http://www.ghibli-museum.jp/
營業時間:每日10:00-18:00,逢星期二休息
※每日10:00 、12:00 、14:00 ,16:00 4個入場時段
入場費用 (只供參考):成人 ¥1,000;高中生 ¥700;小學生 ¥400
※門票需要預先喺Lawson便利店購買

 

東京親子遊2019|新宿親子住宿推介|東京新宿百日住宿

東京新宿百日住宿
@facebook

東京新宿百日住宿位於新宿市中心,一落樓下就係商店同食肆,而且鄰近JR山手線嘅大久保站,地理位置一流!酒店其實喺商住混合大樓嘅13-21樓,位置高就代表有更好嘅景觀同唔怕嘈啦!而且大部份房型都係以公寓式為主,最適合親子遊嘅旅客入住!

東京新宿百日住宿_2

酒店設備齊全,如果入住套房,仲有廚房同洗衣機!同小朋友出去玩,有個地方洗下衫同煮吓簡單嘅食物真係好重要㗎!

東京新宿百日住宿_3

室內設計簡單,不過就夠哂光猛同整潔!如果係大家庭,仲可以揀頂級套房,一次過住10個人都無問題!咁就可以盡享家庭樂啦!

 

東京新宿百日住宿
地址:JPN東京2-27-7 Hyakunincho, Shinjuku-ku (顯示地圖)
星級 | ★★★★☆  
位置 | ★★★★★  
設施 | ★★★☆☆  
環境 | ★★★★☆  
價格 | 查看價格  

 

東京親子遊2019|Top 6東京近郊親子景點推薦|龍貓森林

龍貓森林
@MATCHA

位於埼玉縣所澤市嘅狹山丘陵有豐富歷史遺跡同自然生態,四周圍都係綠樹林蔭,加上狹山湖同多摩湖嘅優美景色,令呢度成為日本重要嘅自然文化遺產。不過喺1960年代曾面臨開發危機,但慶幸因為宮崎駿深受狹山丘陵嘅景色吸引,以此地為靈感創作出動畫《龍貓》,引發當地居民保護呢個咁有意義嘅地方嘅意識,大家先至有機會探訪龍貓森林咋!

龍貓森林_2
@totoro.or

龍貓森林佔地極廣,而且有多條散步路線,大家可以預先睇吓龍貓的故鄉基金會官網所提供嘅路線地圖,然後精選出最想去嘅地點,計劃好路線先出發,就唔怕帶住小朋友會好狼狽啦。最熱門嘅路線就係先由西武球場為起點,途經龍貓森林1、3,15號地,穿過堀口天滿神社之後就會見到龍貓樹,去埋狹山湖邊散步,就會去到終點小黑炭之家!

龍貓森林_3
@Deskgram

小黑炭之家係一間超過100年歷史嘅明治時期建築物,入面擺放咗巨形龍貓公仔同好多龍貓故事人物嘅擺設,亦有售賣龍貓周邊商品,所有收益都會用嚟保育龍貓森林,大家記得支持吓呀!

 

龍貓森林餐廳推薦|和田園製茶所

和田園製茶所
@banbi.tw
抹茶大福 ¥200

喺小黑炭之家旁邊有一間專賣狹山茶同抹茶嘅老店和田園製茶所,行完龍貓森林,就可以順便嚟呢度試吓埼玉名產狹山茶大福同抹茶雪糕!睇完咁靚嘅景色,尋找到可愛嘅龍貓,再嘆吓頂級茶葉製成嘅甜品,真係好療癒㗎!

和田園製茶所_2
@banbi.tw

除咗食甜品,仲有好多茶製食品手信賣,又得食又有得shopping!

 

和田園製茶所
地址:埼玉県所沢市三ケ島3丁目1157-3 (顯示地圖)
營業時間:每日 09:00-18:00

 

龍貓森林
地址:埼玉県所沢市三ヶ島三丁目1169-1(顯示地圖)
交通:由池袋出發,乘坐西武池袋線到西所澤站,轉坐狹山線去到西武球場前站落車。
營業時間:星期二、三,六 10:00-15:00
網址:http://www.totoro.or.jp/china.html

 

東京親子遊2019|Top 6東京近郊親子景點推薦|嚕嚕米公園 – 姆明主題公園

嚕嚕米公園 - 姆明主題公園
@tabirai

位於埼玉縣嘅嚕嚕米公園Metsa Village喺2018年搶先開幕,園內將北歐童話故事姆明內嘅場景一一呈現,例如森林之家,水中小屋同嚕嚕米屋敷,當時已經吸引大量人潮!但公園嘅重頭戲Moomin Valley Park終於喺今年3月正式面世,園內增設多個主題園區同遊樂設施,有每日上演姆明故事嘅Emma劇場、姆明屋、海之交響樂號,將大家帶入姆明奇幻世界!

嚕嚕米公園 - 姆明主題公園_2
@TheJapanTimes

公園內仲有姆明故事人物四處遊走同大家合照,又有好多姆明主題商品出售,仲有各式各樣嘅遊樂設施,無論係大人定唔同年齡層嘅小朋友,都一定啱玩!

 

嚕嚕米公園餐廳推薦|Cafe Puisto

Cafe Puisto
@facebook

玩到攰就可以園內嘅北歐風特色餐廳Cafe Puisto醫吓肚。Cafe呼應公園主題,整座建築物都係由木製成,加上不規則嘅窗門同樓梯,令成間餐廳都好有童話feel!餐廳有兩層高,有三分之一嘅範圍都劃分做兒童遊樂區,小朋友繼續放電,家長就可以趁呢個時候休息吓,嘆返杯靚咖啡!

Cafe Puisto_2
@facebook

餐廳採用嘅餐具都印有姆明故事人物,可愛度爆登!而食物都係以北歐料理為主,推薦大家一定要試吓佢地嘅水果撻,餐廳會因應季節,而採用當造新鮮水果,加上超香牛油味嘅撻皮,好味到暈!必食!

 

Cafe Puisto
地址:埼玉縣飯能市大字阿須893-1 (顯示地圖)
營業時間:每日9:00-16:00,逢星期一休息

 

嚕嚕米公園 – 姆明主題公園
地址:埼玉縣飯能市大字阿須893番地之1(顯示地圖)
交通:由池袋出發,乘坐西武池袋線電車去到加治站,落車後步行大概20分鐘。
營業時間:每日9:00-17:00,逢星期一休息 ※會因季節而有所調整
入場費用 (只供參考):成人 ¥1,500;中小學生 ¥1,000 ※園內設施需額外收費
網址:https://metsa-hanno.com/en/

 

東京親子遊2019|池袋親子住宿推介|陽光城市王子酒店

陽光城市王子酒店

陽光城市王子酒店係一間位於池袋市中心嘅4星級酒店,喺2018年完成全面翻新,每間房都增設咖啡機、22寸平面電視、高級被褥等等設備,務求令住客有最舒適嘅住宿體驗!酒店樓下就係大型商場Sunshine City Alta同埋J-World Tokyo主題樂園,行去JR池袋站都只係8分鐘!地理位置無敵!

陽光城市王子酒店_2
@facebook

酒店其中最大賣點就係有各式各樣嘅主題套房,吸引好多動漫迷㗎!為咗響應新開幕嘅Moomin Valley Park,仲有姆明主題套房,一於提早訂好房,比個驚喜小朋友啦!

 

陽光城市王子酒店
地址:3-1-5 Higashi-ikebukuro, Toshima-ku, 東京, Tokyo-to, 170-8440 (顯示地圖)
星級 | ★★★★☆  
位置 | ★★★★★  
設施 | ★★★☆☆  
環境 | ★★★★☆  
價格 | 查看價格  

 

東京親子遊2019|Top 6東京近郊親子景點推薦|讀賣樂園

讀賣樂園
@東京攻略

有超過50年歷史嘅讀賣樂園,係東京迪士尼以外最大型嘅主題公園,位於川崎市內,由新宿去只係需要25分鐘火車程。比起迪士尼,讀賣樂園就更有日本風格,入面除咗有過山車、摩天輪、海盜船等等機動遊戲,仲喺2016年開設咗Good Joba園區,係以日本製造業為主題嘅職業體驗館,小朋友可以透過遊戲同DIY認識到唔同產業嘅運作!

讀賣樂園_2
@讀賣樂園

Good Joba園區分別有日清食品Food Factory、日產自動車Car Factory、World服飾集團Fashion Factory同文具商Kokuyo Bungu Factory。每一個Factory都有唔同嘅遊戲關卡。當中最唔可以錯過嘅就係Food Factory DIY杯麵同可以喺Car Factory內自己組裝專屬車款,然後再親身試車體驗!唔好話小朋友,其實連大人都玩得好開心!

 

讀賣樂園
地址:東京都稻城市 矢野口4015-1(顯示地圖)
交通:由新宿出發,乘坐JR京王線到京王讀賣樂園站,然後轉坐小田急巴士,大概5分鐘車程。
營業時間:星期一至五 10:00-17:00;星期六 10:00-20:00;星期日 09:00-20:00
※會因季節而有所調整
入場費用 (只供參考):一日暢遊卷 成人 ¥5,400;高中生 ¥ 4,300;小學生 ¥3,800
網址:http://www.yomiuriland.com/

 

 

東京親子遊2019|Top 6東京近郊親子景點推薦|藤子.F.不二雄博物館

藤子.F.不二雄博物館
@Fujiko-museum

川崎一向係東京親子遊嘅熱門地點,除咗有讀賣樂園,仲有多啦A夢嘅藤子.F.不二雄博物館!試問有邊個唔識呢隻藍色無耳機械貓?又有冇人會對多啦A夢嘅百寶袋無興趣?相信有好多家長去呢個博物館,會比小朋友仲更加興奮!

藤子.F.不二雄博物館_2
@Flickr

博物館展示咗作者藤子.F.不二雄創作多啦A夢嘅靈感同過程,仲有好多珍貴手稿,唔睇過都唔知,原來漫畫中嘅人物樣貌係經過多次嘅修改,而變成而家可愛嘅造型!整個博物館有3層高,多啦A夢人物公仔遍佈整個博物館!2樓仲設有兒童遊戲室同互動室!

藤子.F.不二雄博物館_3
@Fujiko-museum

喺3樓嘅空中花園仲可以搵到多啦A夢入面嘅經典空地水管場景𠻹!

 

藤子.F.不二雄博物館餐廳

不二雄博物館餐廳
@Fujiko-museum

好多時去主題樂園嘅餐廳都係又貴又唔好食!不過呢間博物館內嘅Cafe就好有驚喜!所有餐點都以多啦A夢人物樣貌做主題,真係令人不禁大叫「Kawaii」!最重要係連食物水準都好高,唔係得個靚字!

不二雄博物館餐廳_2
@Fujiko-museum
燉牛肉配記憶麵包 ¥1,500

有公仔拉花嘅咖啡當然係必點,而另一樣最人氣嘅就係燉牛肉配記憶麵包!香嫩嘅燉牛肉配上濃郁醬汁,加上超軟熟嘅記憶麵包沾醬嚟食,真係超開胃,小朋友一定食到停唔到口!

 

藤子.F.不二雄博物館
地址:川崎市多摩區長尾2丁目8番1號 (顯示地圖)
交通:由新宿出發,乘坐JR小田急線去到登戶站,喺生田綠地口出口轉坐多啦A夢穿梭巴士。
營業時間:每日10:00-18:00,逢星期二休息※每日分10:00 、12:00 、14:00 、16:00 入場時段
入場費用 (只供參考):成人 ¥1,000;高中生 ¥700;小學生 ¥500
※門票需要預先喺Lawson便利店購買
網址:http://fujiko-museum.com/tc/

 

東京親子遊2019|川崎親子住宿推介|馬力諾心百合酒店

馬力諾心百合酒店

馬力諾心百合酒店位於川崎市,距離讀賣樂園同多啦A夢博物館都係20分鐘車程之內,如果想一次過去哂呢兩個景點,呢間酒店絕對係最佳據點!而且酒店同讀賣樂園有合作,買入場票仲有優惠,記得預訂時要問吓酒店呀!

馬力諾心百合酒店_2

雖然酒店只係3星級,但設計比人一種好grand嘅感覺,而且房間內樓低高,令本身已經好寬敞嘅房間感覺更大!住過嘅旅客都話酒店床褥好舒適,提供嘅床上用品同梳洗用品都係高級品牌,完全有5星級嘅享受!5歲以下小童入住仲免費𠻹!性價比高!

 

馬力諾心百合酒店
地址:JPN川崎Asao-ku1-1-1 Kamiasao (顯示地圖)
星級 | ★★★☆☆  
位置 | ★★★★☆  
設施 | ★★★☆☆  
環境 | ★★★★☆  
價格 | 查看價格

 

東京親子遊2019|東京親子住宿推介|美滿如家飯店 東京上野NORTH

美滿如家飯店 東京上野NORTH

小編去旅行,一向都鐘意搵新酒店住,因為貪所有嘢都夠新淨!位於JR上野站附近嘅東京上野NORTH公寓酒店喺2018年先開幕,設計夠新潮現代化,服務好之餘所有設施都係最新,最乾淨!雖然唔喺東京最旺嘅區域,但勝在以家庭式酒店嚟講價錢唔算太貴,空間好夠大,又附有小廚房!而且附近就有機鐵直達成田機場,交通都好方便!

美滿如家飯店 東京上野NORTH_2

酒店室內設計混合咗北歐同和式風格,整體感覺好和諧同溫馨,房內仲有小餐枱,等小朋友瞓哂覺,大人想嘆吓宵夜,飲吓酒,relax吓都無問題!

 

美滿如家飯店 東京上野NORTH
地址:7-14-4 Ueno, Taito-ku, 東京, Tokyo, 110-0005, 日本 (顯示地圖)
星級 | ★★★☆☆  
位置 | ★★★★★  
設施 | ★★★☆☆  
環境 | ★★★★☆  
價格 | 查看價格  

 

📖延伸閱讀:【Hotels.com大使推介】日本東京親子遊行程懶人包(附親子景點、酒店推薦)
📖延伸閱讀:【外遊好去處】識去一定去日本郊區—東京清澄白河一日遊+景點+交通攻略!
📖延伸閱讀:【東京近郊】東京outlet交通遊玩攻略及折扣券領取貼士!
📖延伸閱讀:【日本airbnb下架】編輯推薦五大高CP值東京平酒店!(連東京住宿方便選區指南)

 

Hotels.com酒店優惠Hotels.com酒店優惠