定期送上世界各地最新、最地道嘅旅遊資訊!

【日本薰衣草特集】北海道薰衣草、東京薰衣草景點懶人包 (連影相App推薦)

日本可以講得上係香港人最鍾意嘅旅遊地點,除咗因為吃喝玩樂夠哂精彩之外,日本一年四季都有唔同嘅特別節目,令人無論咩季節都想去日本玩返轉。而6月尾至8月,就正正係日本薰衣草盛開之時,所以夏季遊日本又點可以錯過賞薰衣草嘅機會呢?

 

北海道富良野向來有「花都」之稱,亦都係北海道薰衣草嘅最佳觀賞地,絕對係必到打卡點!但大家又知唔知,其實東京都可以欣賞到薰衣草呢?小編已經整合好一個日本薰衣草特集,推介北海道同東京薰衣草景點比大家,仲話埋你知邊個影相App,可以令手殘族都幫你影到零失敗嘅靚相!快啲訂機票同酒店,嚟返個夏日浪漫賞花之旅喇!

 

📖延伸閱讀:【北海道攻略】熱辣辣去北海道?北海道夏天行程大解構!(連北海道住宿推薦)

 

日本薰衣草特集|北海道薰衣草景點|富良野富田農場

@富田農場官網

北海道薰衣草最出名嘅景點,非富良野富田農場莫屬!富良野富田農場佔地極廣,淨係花田都有成13個,薰衣草種植面積有成20公頃!仲有14個唔同主題嘅花之舍,包你喺到玩足一日都玩唔哂!

 @富田農場官網

當中最唔可以錯過嘅係薰衣草東部同傳統薰衣草花田,呢兩塊花田分別號稱為「日本面積最大薰衣草田」同「日本歷史最悠久薰衣草田」,去北海道玩必定要拜訪一次!喺傳統薰衣草花田內,盛開嘅薰衣草鋪滿成個山坡,山坡嘅起伏令整片花田非常有氣勢!而薰衣草東部雖然較為平坦,但人煙較少,以薰衣草花量取勝!大家仲可以坐薰衣草巴士,一邊賞花,一邊享受微風吹過同濃濃嘅花香!

@富田農場官網

呢到除咗薰衣草,亦都種植咗好多唔同品種嘅花!大家記得去探訪埋以薰衣草為主,再加上滿天星、罌栗紅同小町草等等多種唔同嘅花組成嘅彩色花田呀!


富良野富田農場
地址:北海道空知郡中富良野町基線北15號
交通:乘坐JR富良野線,喺薰衣草花田車站落車,步行約7分鐘
營業時間:5、6,9月,星期一至日 08:30-17:00; 7月及8月,星期一至日 08:30-18:00 (*唔同季節,花田同花舍都有唔同開放時間,詳情要留意官方網站)
網址:http://www.farm-tomita.co.jp/cn/


📖延伸閱讀:【玻利維亞天空之鏡 – 亞洲版】走進不一樣的日本秘境—三大必去日本天空之鏡!


日本薰衣草特集|東京薰衣草景點|玉原薰衣草園

@Facebook

喺日本想睇薰衣草,除咗北海道,其實關東地區都有靚到不得了嘅薰衣草花田㗎!位於東京西北面群馬縣嘅沼田市,就有整個關東地區最大嘅薰衣草園 – 玉原薰衣草園。呢度種植咗多達5萬棵薰衣草,成個薰衣草園係一整片連綿紫色花海,一望無際!今年嘅6月30日至9月2日仲會舉行薰衣草祭,當地人都會紛紛嚟到群馬縣參與呢個賞花盛事㗎!


@Tambaratokyuresort

而呢度嘅一大特色,就係可以坐全長700米嘅纜車,以唔同嘅角度去賞花!試問呢個世界有幾多地方嘅花園,可以比你可以係空中賞花呢?大家真係唔可以錯過坐纜車嘅機會呀!由於呢到嘅纜車唔會好高,所以就算小朋友都唔怕坐㗎!

@玉原薰衣草園官網

除咗薰衣草,呢度仲有向日葵同油菜花田,同埋以薰衣草為主嘅彩色花丘,大家可以瘋狂打卡喇!

 

玉原薰衣草園
地址:群馬縣沼田市上発知町350-1
交通:乘坐JR上越線,喺沼田站落車,再轉乘巴士去到玉原(*巴士係每年7至8月嘅限期營運)
營業時間:6月30至9月2,星期一至日 08:30-17:00 (*唔同季節,都有唔同開放時間,詳情要留意官方網站)
網址:https://www.tambara.co.jp/lavenderpark/tw/

 

📖延伸閱讀:【日本文青必到】十大特色日本Starbucks特輯 (東京、鎌倉、神戶、京都Starbucks齊上榜)

 

日本薰衣草特集|影相App推介|SOVS

@Sovsofficial

對著咁靚嘅花海,梗係想影返一千幾百幅靚相喇!但如果旅伴係手殘族,影相唔係「鬆郁濛」,就係影到你「矮短肥」,咁點算好呢?唔洗怕!近期韓國大熱嘅影相神App – SOVS幫到你!SOVS呢個App之所以風靡整個韓國 ,全因佢比你預先設定好拍攝嘅構圖同甫士,就算係一個人旅行,想拜託路人幫手影相,都可以影到你想要嘅效果!

用法好簡單!第一件事就係先設定好身高。然後你就可以利用預攝功能,將你鐘意嘅背景構圖,同人形公仔,影一張半透明嘅相。之後就可以將電話交比幫你影相嘅人,只要跟住半透明相對齊!就可以影到你想要嘅構圖㗎喇!

除咗預設構圖,仲可以用埋佢內置嘅濾鏡,連執相都唔洗,夠哂方便!

 

📖延伸閱讀:【大阪親子遊】夏日大阪岬公園遊玩指南2018!(大阪水上樂園+動物園+睇海豚4合1)

 

日本薰衣草特集|富良野酒店住宿推介|富良諾納圖魯賓館

富良諾納圖魯賓館, 富良野, 酒店入口

富良諾納圖魯賓館位於富良野市中心,隔離就係富良野JR站,由酒店去富田農場、富良野神社,葡萄酒園等等景點都非常方便!酒店四同靜中帶旺,附近亦有好多餐廳,位置無得輸!

富良諾納圖魯賓館, 富良野, 標準雙床房, 非吸煙房, 客房

酒店設計時尚而富有現代感,以黑白色為主調,比人一種型格嘅感覺!房間簡約舒適,乾淨整齊!玩完一日返到酒店仲可以享受酒店內嘅SPA,夠哂梳乎!

 

富良諾納圖魯賓館
地址:JPN富良野1-35 Asahi-cho (顯示地圖)
星級 | ★★★★☆  
位置 | ★★★★☆  
設施 | ★★★☆☆  
環境 | ★★★☆☆  
價格 | 查看價格

 

📖延伸閱讀:【日本airbnb下架】編輯推薦五大高CP值東京平酒店!(連東京住宿方便選區指南)

 

日本薰衣草特集|玉原高原酒店住宿推介|寶川溫泉汪泉閣酒店

寶川溫泉汪泉閣酒店, 水上, 酒店正面

由東京去玉原薰衣草園車程需要2個小時以上,為咗慳返啲時間,大家可以入住呢間距離薰衣草園大概8公里嘅寶川溫泉汪泉閣酒店。呢間酒店充滿傳統和式風情,酒店亦位於河川之上,景色四季各有特色,一樣都係靚到不得了!由於酒店位於山上較高位置,所以氣溫較低,即使係夏天,都不妨試下呢到嘅露天風呂喇!

寶川溫泉汪泉閣酒店, 水上

傳統日式酒店最正就係可以試下瞓榻榻米,係充滿和式風格設計嘅房間內,體驗日本懷舊生活,真係別有一番風味!

 

寶川溫泉汪泉閣酒店
地址:JPN水上Tone-gun1899 Fujiwara (顯示地圖)
星級 | ★★★☆☆  
位置 | ★★☆☆☆  
設施 | ★★☆☆☆  
環境 | ★★★★☆  
價格 | 查看價格  

 

 

Hotels.com酒店優惠