定期送上世界各地最新、最地道嘅旅遊資訊!

【窮遊大阪-平價住宿篇】Top 5 大阪膠囊酒店!

去shopping去到盡,緊係要儲定彈藥去掃貨啦!所以小編嚴選Top 5大阪膠囊酒店,慳番啲酒店錢,等你可以有多啲budget去掃貨,仲會教埋你用至抵價錢book酒店,再慳多啲!

 

  1. Top 5大阪膠囊酒店|WBF難波謝爾內爾酒店 (Shell-Nell namba by WBF)
呢間酒店嘅地理位置非常方便,行三分鐘就可以行到去黑門市場,唔洗十五分鐘就可以到達道頓崛,同埋大阪最出名抵食嘅居酒屋聚集地「裏難波」!行六分鐘就可以行到去地下鐵嘅日本橋站,啱哂要去心齋橋、梅田掃貨嘅你呀!五分鐘路程就到南海難波站直接去到關西機場,咁就唔洗拎住一袋二袋戰利品去轉車咁麻煩啦!

女性樓層限定嘅雙人膠囊,啱哂同姐妹一齊住,仲有大把位整理戰利品,超方便!
樓層方面,一樓係男性用,二樓係女性用,樓層嘅鑰匙完全唔一樣,安全措施好完善,唔洗擔心入錯異性樓層。男女樓層都各有六間淋浴間,每間都有一張大枱同足夠空間俾你擺嘢同換衫。除咗會提供沐浴露、洗頭水、毛巾外,女性樓層亦會提供卸妝水、化妝水、乳液等;男性樓層就會提供剃鬚膏、Hair gel等等,勁貼心!
呢到嘅浴室劃分為乾同濕兩個區域,咁就唔怕整濕啲衫啦!

WBF難波謝爾內爾酒店
環境:★★★★☆設施:★★★☆☆位置:★★★☆☆
地址:2-9-16, Nipponbashi Center Building, Nipponbashi, Chuo-ku,大阪, Osaka, 542-0073,日本
價錢:每晚HK$208

 

  1. Top 5大阪膠囊酒店|難波禦堂筋第一旅館 (First Cabin Midousuji-Namba)
呢到嘅房間相比起其他膠囊酒店大好多呀!

 

First Cabin 喺全日本有十三間分店,人氣勁高!佢哋以飛機頭等艙為設計概念,所以呢到嘅膠囊尺寸比其他更大更豪(2.1 x 2.1 x 2.1 m)絕對有頭等機艙果種奢華氣派呀!另外,呢到嘅膠囊只有一層,同一般上下舖嘅膠囊酒店唔同。呢度仲可以嘆埋桑拿同Spa,住膠囊住到咁豪,CP值超高!
 
難波禦堂筋第一旅館幾乎係直接連住地下鐵禦堂筋難波站!離南海難波站同近鐵阪神嘅大阪難波站都非常近,離心齋橋都好近,去邊到都勁方便。酒店都會提供唔同嘅日用品,好似指甲鉗,耳塞等等,好貼心。另外呢度所有地方包括浴室同洗手間都超級乾淨企理,值得一讚!
除咗會提供沐浴露、洗頭水、毛巾,都會有乳液,Hair gel等,夠哂方便!

難波禦堂筋第一旅館
環境:★★★★☆ 設施:★★★★☆ 位置:★★★★☆
地址: 4F Midousuji-Namba Bldg, 4-2-1 Namba, Chuo-ku,大阪, Osaka-fu, 542-0076,日本
價錢:每晚 HK$264

 

  1. Top 5大阪膠囊酒店|心齋橋生態立方體酒店 (Capsule Hotel B&S Eco-Cube Shinsaibashi)
呢一間膠囊酒店同美國村係喺同一條街,行去心齋橋站只需要六分鐘,行八分鐘就會到難波站,方便大家血拼!唔好以為呢間膠囊酒店價錢咁平,環境設備一定好舊,其實佢哋喺2013年就已經重新裝修,無論環境同被鋪都好新淨整潔㗎!
膠囊大小約1×1米、深2米
酒店會提供每人兩條毛巾、浴袍同埋牙刷;個人淋浴間入面有提供沐浴露同洗頭水,應有盡有。女性樓層位於二樓,三樓至五樓就係男性樓層。酒店周圍有好多開到好夜嘅鋪頭同餐廳,廿四小時行街食嘢都得,啱哂啲夜貓呀!

心齋橋生態立方體酒店
環境:★★★☆☆ 設施:★★★☆☆ 位置:★★★★☆
地址: 2 Chome-9-4 Nishishinsaibashi, Chuo- Ku,大阪, Osaka-fu, 542-0086,日本
價錢:每晚 HK$135

  1. Top 5大阪膠囊酒店|心齋橋大桑拿酒店 (Grand Sauna Shinsaibashi)
呢間酒店距離難波站同心齋橋,分別只係兩分鐘同五分鐘路程!雖然呢間酒店只有一樓係女性專用,其他樓層同設施都係男性專用,但係全部女性膠囊都係「個室」,好似一間細房仔咁,有齊桌椅同衣櫃,仲可以放埋行李喺房,夠哂安全同私隱!
都有男性專用嘅膠囊「個室」架,夠哂私隱呀!

心齋橋大桑拿酒店
環境:★★★☆☆ 設施:★★★★☆ 位置:★★★☆☆
地址: 2-8-12 Nishishinsaibashi, Chuoku,大阪, Osaka-fu , 542-0086,日本
價錢:每晚 HK$176

 

  1. Top 5大阪膠囊酒店|斯巴迪奧膠囊酒店 (Sauna & Capsule Spadio Hotel)
呢間膠囊酒店喺「櫻川」地鐵站七號出口,右轉行一分鐘就到,離道頓崛都係差一個站,旺中帶靜!呢到除咗係酒店,仲係一個好出名嘅溫泉浴場,所以酒店有按摩池、礦物池、桑拿等設施。喺心齋橋、道頓崛行完街,返到酒店有得浸下溫泉、叉下電、relax下,真係勁爽,齋係浸個溫泉都已經回哂本啦!

酒店嘅溫泉浴場

 

斯巴迪奧膠囊酒店 
環境:★★★☆☆設施:★★★★☆位置:★★★☆☆
地址:2-1-1, Sakuragawa, Naniwa-ku,大阪, Osaka-fu, 556-0022,日本
價錢:每晚HK$176

 

Hotels.com 酒店優惠