定期送上世界各地最新、最地道嘅旅遊資訊!

【Hotels.com大使推介】和歌山行程懶人包—帶你食盡各大和歌山美食、水果!

大阪旅行,多數都會一次過玩埋鄰近城市,例如奈良京都等等。其實和歌山同樣位於近畿, 大阪過去都只係一個鐘車程左右,交通非常方便。和歌山背臨大海,得天獨厚,風景優美之餘,加有多個名勝古蹟,仲可以去浸溫泉,係一個深度旅遊嘅好地方!今次Hotels.com大使就為大家送上和歌山行程懶人包,為你精選各大必去景點同埋美食!

 

和歌山行程懶人包:和歌山必去景點

和歌山城

Flickr

每個地方都有個代表性嘅建築物,而講到和歌山嘅標誌性建築就一定非和歌山城莫屬!和歌山城喺1585年建成,係當時豐臣秀吉平定紀州之後叫佢細佬秀長所建,以防禦外敵。今時今日,和歌山城已經變咗呢度嘅地標,更加係賞楓葉同櫻花嘅勝地,你亦都可以登上天守閣,一覽和歌山嘅美景。

 

和歌山城

地址:日本和歌山縣和歌山市一番丁3(顯示地圖
交通:於JR和歌山站乘搭巴士在「公園前」落車
開放時間:09:00 – 17:00

 

那智瀑布

@ bigboysgotravel

那智瀑布係日本三大名瀑之一,高133米、寬13米。那智瀑布就喺莊嚴嘅熊野那智大社隔離,可以一次過參觀哂兩個景點。那智瀑布有60多條溪流,自古以嚟就係佛教、神道嘅修行要地,所以喺日本人心目中,那智瀑布係一個非常神聖嘅地方。由下望上去,你會覺得瀑布係由雲彩間流出嚟,加上瀑布位於深山之中,睇上去增添幾分壯觀!

 

那智瀑布

地址:日本和歌山縣那智勝浦町那智山(顯示地圖
交通:喺JR「紀伊勝浦」站轉乘開往「那智山」嘅熊野交通公車,喺「瀧前」落車再步行5分鐘

 

白濱

@ rinaoraxx

和歌山背臨大海,係浸溫泉嘅勝地之一,冬天去到和歌山,當然唔少得要去浸下溫泉啦!白濱係日本有名嘅溫泉區,亦都係日本三大古泉之一。呢度最出名嘅溫泉就係「崎之湯」,有超過140年歷史,係一個露天溫泉。你可以一邊浸溫泉,一邊欣賞一望無際嘅太平洋海景,再聽住海浪拍打崖邊嘅聲音,真係寫意至極!

@milky_aya

對住呢個無敵大海景浸溫泉,真係咩煩惱都通通無哂啦!

 

白濱崎之湯

地址:日本和歌山縣西牟婁郡白濱町湯崎 1668 (顯示地圖
交通:JR白濱(浜)站乘坐明光巴士,於「湯崎」下車再步行3分鐘

 

和歌山冒險世界

@daodao421x99

除咗欣賞自然美景,其實和歌山都有個主題樂園—和歌山冒險世界和歌山冒險世界集主題樂園、野生動物園、水族館等於一身,係一個合家歡嘅景點!呢度仲可以睇到大熊貓同海豚表演,相信小朋友嚟到一定玩到樂而忘返!

@haccy_miyakke

話明冒險世界當然唔少得驚險刺激嘅機動遊戲啦!

 

和歌山冒險世界

地址:日本和歌山縣西牟婁郡白濱町堅田2399 (顯示地圖
交通:白濱車站搭乘巴士前往
開放時間:09:30 – 17:00

 

黑潮市場

@Flickr

去到日本就緊係要去下海鮮市場,品嚐新鮮美味嘅壽司同刺身啦!黑潮市場雖然唔算好大,但麻雀雖小,五臟俱全,三文魚刺身、拖羅、壽司同各式各樣嘅海產都可以喺度買得到!而且呢度仲有鮪魚解體秀表演,每日有三個時段,睇完仲可以即場買嚟食添!

@immjamieeee

鮪魚解體秀係黑潮市場嘅重頭戲,去到記得唔好錯過喇!

 

黑潮市場

地址:日本和歌山縣和歌山市毛見1527番地(顯示地圖
交通:從JR和歌山站乘坐和歌山巴士,於「遊艇城」下車
開放時間:10:00 – 17:00

 

和歌山行程懶人包:和歌山美食

中華麵


@Flickr

去到日本又點可以唔食拉麵呢!日本每個地區都有自家特製嘅拉麵,而和歌山最出名嘅就係中華麵。中華拉麵主要有兩種湯底:醬油湯底同埋豚骨醬油湯底,而一般配料包括青蔥、筍乾、叉燒肉、魚板(蒲鉾)。

 

和歌山水果:溫州蜜柑

@Flickr

蜜柑係和歌山嘅特產,10月至12月係盛產時期,如果適逢呢幾個月去和歌山,可以去果園即摘即食,蜜柑多汁又鮮甜,非常解渴!

 

紀州梅

酸梅乾係日本人非常喜愛嘅食物之一,日本人甚至會將酸梅加入到飯團入面一齊食!而紀州梅就係當中最出名嘅種類之一,其實和歌山縣以前係稱為「紀州」,而紀州梅就係和歌山最高級嘅梅子品種,去和歌山旅行,處處都可以買到紀州梅嘅製品,當中最受遊客歡迎嘅就係梅子酒同酸梅乾!

 

和歌山行程懶人包:和歌山酒店住宿推介

和歌山天然溫泉多米高級旅館

@mysecretwakayama

去到和歌山就緊係要入住溫泉酒店,嘆下純正嘅溫泉啦!和歌山天然溫泉多米高級旅館係一間三星級嘅溫泉酒店,房間面積比較大,而且去邊都好方便,同多個和歌山熱門景點都相當之近。最貼心嘅係每晚九點之後,酒店都會送上每位一碗拉麵做宵夜,浸完溫泉食個宵夜,真係一流嘅享受!

 

🏩和歌山天然溫泉多米高級旅館

地址:3-36 Misono-cho, 和歌山, Wakayama-ken, 640-8331, 日本(顯示地圖

 

Hotels.com 酒店優惠

睇到呢度,喺咪想即刻book酒店去和歌山呢?點樣先可以用至抵價錢book酒店?上Hotels.com攞我哋最新嘅優惠代碼啦!只需要click入去呢個網站https://zh.hotels.com/jiu-dian-you-hui/coupon/再copy優惠碼,然後喺付款頁面貼上優惠碼,就可以享用折扣優惠㗎啦! 仲有好多超筍酒店優惠同埋精選酒店神秘優惠價,快啲上Hotels.com用至抵價錢訂房啦!