定期送上世界各地最新、最地道嘅旅遊資訊!

【台灣必食餐廳精選】當地人推介Top 10台灣地道小食!

去台灣旅行,梗係想食到有咁盡得咁盡啦!今次介紹比大家嘅十間小店,全部都開到深夜時分,咁大家就可以食足早、午,晚三餐,再嘆埋宵夜!食到夠本先返香港!

 

士林夜市 – 士林生炒羊肉

@flickr

士林夜市係台灣旅行必去嘅搵食好地方,但唔知大家又知唔知呢度隱藏咗一間超受當地人歡迎嘅生炒羊肉店呢?每晚深宵時分,呢度都會大排長龍,大家為嘅就只係一碟生炒羊肉配白飯。對於食羊肉,可能唔係所有人都覺得咁吸引,因為有啲人同小編一樣都好怕羊羶味。不過!士林生炒羊肉店嘅羊肉非常嫩滑多汁,配上特製醬汁,完全冇羊羶味!就算本身唔太食羊肉嘅人,試過都話正!呢間士林隱藏小店每晚凌晨時分先開檔,唔係本地人推介,都未必識搵㗎!

 

士林夜市 – 士林生炒羊肉

地址:台北市士林區大東路21-3號  (顯示地圖)
營業時間:每日凌晨00:00 – 03:30

 

萬國滷味 – 鹽水雞

@flickr

雖然呢間小店主要係以滷味為主,但其實萬國滷味最正嘅係鹽水雞。萬國滷味嘅鹽水雞皮爽肉嫩,一啲都唔鞋口,一咬落去非常有口感,重點係佢嘅調味!有好香嘅蒜同胡椒味,重口味必食!鐘意食辣既朋友不妨挑戰下大辣,刺激下味蕾!唔食得辣嘅朋友都唔洗怕,係有得揀唔辣㗎!除咗鹽水雞之外,仲有唔同配料比你選擇,小編推介一定要試下腰花,同埋要配青瓜減低油膩感。因為萬國滷味實在太受歡迎嘅關係,老闆娘仲提供即買即場真空包裝比你拎走嘅服務,咁大家就可以帶埋返香港請屋企人同朋友食啦!

 

萬國滷味

地址:台北市漢中街48號 (顯示地圖)
營業時間:14:30 – 23:15

 

金佳阿圖麻油雞


@flickr


@flickr

天氣開始轉涼,去到台灣,不如食返碗麻油雞暖下身啦!食麻油雞就一定要去金佳阿圖麻油雞!一入到店內,其實已經有濃濃嘅麻油香。小編覺得食麻油雞,酒嘅香味係非常重要,有好多地方嘅麻油雞,都因為煮到過咗火,而令到米酒完全散發哂,冇咗酒香。阿圖麻油雞就做到保持酒香,但又唔會因為落太多酒而變得苦澀!一碗麻油雞入面,雞脾肉嘅份量居多,但就算係雞胸肉都唔會好似「乾柴」咁,肉質都係一樣咁鮮味滑溜,非常好食!而湯頭聞吓都覺得香到暈,飲一啖成個人即刻暖笠笠,好舒服,好滿足,簡直係冬天宵夜嘅最佳選擇!除咗麻油雞之外,麻油乾麵線,乾米血糕同麻油赤肉湯都係非常之唔錯㗎,大家不妨試下!

 

金佳阿圖麻油雞

地址:台北市林森北路552-2號 (顯示地圖)
營業時間:星期一至六 11:00 – 23:00

 

阿財虱目魚肚

@flickr


@flickr

講到西門町食宵夜嘅地方,好多台灣人都會推介阿財虱目魚肚。其實小編從來都冇食過虱目魚,所以聽到食虱目魚肚湯真係超級好奇!阿財虱目魚肚每日夜晚十點開門,但未夠十點就已經有人開始係門口排隊啦!呢度嘅虱目魚肚湯,驟眼睇落去,只係一大塊魚肚肉浸喺一碗清湯入面,冇咩特別。但飲一啖湯就會知原來唔簡單,一碗清澈嘅魚肚湯,非常鮮味清甜,一試難忘!呢間被稱之為「西門町傳奇宵夜店」,唔單止虱目魚肚做得出色,佢地嘅魯肉飯同三杯蛤都非常美味,必食!

 

小貼士

堂食要等得比較耐,而且勁大油煙味,大家可以叫外賣,買返酒店食,又快好舒服好多!

 

阿財虱目魚肚

地址:台北市萬華區內江街53號 (顯示地圖)
營業時間:星期一至六 22:00 – 05:00

 

 

🏨Top10台北人氣酒店住宿推介HK$444起 *安心價格保證*
[德立莊酒店HK$444起,富驛時尚酒店台北南京東路館HK$472起,台北西門町意舍HK$751起]

 

饒河街觀光夜市 – 金蛋爆漿玉子燒


@flickr

饒河街觀光夜市入面有一間金蛋爆漿玉子燒非常之有名氣,就連⟪康熙來了⟫都有介紹過。賣玉子燒都可以出名到上台灣最紅嘅綜藝節目,嚟到台灣,唔係唔試呀?佢地最人氣嘅係明太子爆漿玉子燒,所以第一次去食,就試下佢有幾特別啦。玉子燒嘅上面鋪滿咗木魚絲,明太子同沙律醬,賣相已經好吸引,切開咗發覺入面原來仲有超多明太子!食落去啲蛋呈現半熟狀態,有少少流心,入面除咗有拉絲芝士,店主仲專登加咗粟米粒,食落冇咁膩,仲有粟米甜味!好味到癲!爆漿玉子燒絕對唔係浪得虛名!

 

饒河街觀光夜市 – 金蛋爆漿玉子燒

地址:105台北市松山區饒河街 (顯示地圖)
營業時間:每日17:00 – 00:30

 

劉媽媽涼麵


@flickr

位於市民大道上嘅劉媽媽涼麵,每晚都會聚集咗唔少夜貓係度食宵夜。呢一間冷麵店,賣嘅冷麵一啲都唔花巧,仲要係純芝麻醬冷麵,一碗麵只加咗醬汁同青瓜絲,但居然吸引到好多人幫襯,橫跨三個鋪位都唔夠位比客人坐。咁簡單嘅冷麵,吸引到咁多人食,除咗係因為麵質夠彈牙,亦都係因為醬汁做得夠出色,芝麻味夠濃之餘,仲加入咗大量嘅蒜蓉,所以唔洗太多嘅配料都好夠味,如果食得辣嘅仲可以加少少辣醬,令味道更加豐富。嫌就咁食麵有啲寡?可以叫埋三合一頁丸,蛋花味噌湯,要幾豐富有幾豐富呀!

 

劉媽媽涼麵

地址:台北市市民大道五段37號 (顯示地圖)
營業時間:星期三至一 21:30 – 05:00
高家莊米苔目

@flickr


@flickr

高家莊係中山區一間專賣米苔目嘅四十年老店。其實米苔目即係台語嘅銀針粉,又或者叫老鼠粉。呢度嘅米苔目夠彈牙,唔會較落成口粉都不在話下,佢地嘅紅燒大腸同沙拉魚卵都做得非常出色。紅燒大腸滷得好入味,爽滑有口感,配米苔目一流!而沙拉魚卵就好特別,啲魚卵好扎實,咬落去唔會散開哂,配上沙律醬又出奇地夾,不過唔配米苔目,就咁單點嘅話,食食下就會有少少乾啦,但呢種食法好新奇,都幾值得大家試下。

 

高家莊米苔目

地址:台北市中山區林森北路279號 (顯示地圖)
營業時間:星期一至六 18:00 – 04:30

 

🏨Top10捷運中山站人氣酒店住宿推介HK$204起 *安心價格保證*
[台北捷運棧 – 士林小棧 HK$204起,台北中山意舍酒店 HK$729起]

 

台灣鹽酥雞創始店

@scontent

台灣食炸雞同雞扒,幾乎係指定動作。台灣炸雞有幾出名?你睇下豪大大雞排能夠由一間小販店,成為國際嘅炸雞店就知啦!不過今次唔係介紹雞扒,而係超人氣嘅鹽酥雞!台北大直嘅台灣鹽酥雞創始店係台灣人氣最高嘅鹽酥雞店。嚟到台灣,點都要去試一試究竟有幾好食。呢間鹽酥雞店除咗賣炸雞,仲有好多唔同種類嘅炸物,有八爪魚鬚、蟹、豬肉串、鱈魚球⋯⋯ 真係好想每一樣都試下!佢地嘅鹽酥雞係用十幾種唔同嘅醃料醃製過,然後先拎去炸,所以雞肉本身已經好有味,小編覺得唔洗額外加調味粉都好正!最令人驚喜嘅係啲雞嘅外層炸得非常酥脆,但又唔會有一層好厚嘅炸粉,仲要唔會食到成口都係油,真係諗下都流口水呀!

 

台灣鹽酥雞創始店

地址: 台北市中山區北安路530號 (顯示地圖)

 

金峰滷肉飯

@flickr


@flickr

去台灣旅行,無食過滷肉飯,就等如無去過台灣!台灣咁多地道小食之中,滷肉飯算得上係小編至愛之一!台灣賣嘅滷肉飯大多數都係細細碗,食嘅時候配上多款唔同嘅滷味,唔會好似係香港食嘅滷肉飯咁,一大碗食到勁滯。小編鐘意食肥膏比例多啲嘅滷肉,貪佢夠香,同白飯撈埋食真係不得了!中正紀念堂附近嘅金峰滷肉飯就最啱小編嘅口味啦!因為佢地嘅滷肉夠肥夠香,入口即化。仲要配合香菇同秘製滷汁,唔會淨係得好重嘅醬油味,亦都唔會太鹹,非常美味!

 

金峰滷肉飯

地址:台北市中正區羅斯福路一段10號 (顯示地圖)
營業時間:每日 08:00 – 01:00
京鼎樓 – 小籠包 @flickr

一講起小籠包,大家一定係諗到鼎泰豐,但原來台灣人票選嘅小籠包第一位,原來唔係鼎泰豐,而係位於中山區長春路嘅京鼎樓。其實京鼎樓同鼎泰豐嘅小籠包味道同品質都好相似,都係一樣咁皮薄餡靚,鮮味多汁,但京鼎樓比鼎泰豐優勝嘅地方,在於京鼎樓獨特嘅烏龍茶小籠包。京鼎樓嘅烏龍茶小籠包,外皮係翠綠色嘅,小編覺得可能係加咗茶落去個麵團到搓。而內餡嘅肉團係加咗茶葉,一咬落去已經滲透出濃濃嘅烏龍茶香,食起嚟啲湯汁夾雜咗肉香同茶香,非常獨特。可能日本人好鐘意茶關係,京鼎樓嘅烏龍茶小籠包深受日本人歡迎,喺日本已經開咗好多間分店啦!

 

京鼎樓

地址: 台北市中山區長春路47號1樓 (顯示地圖)
營業時間:星期二至六 11:00 – 00:00,星期一及日 11:00 - 22:00

 

Hotels.com 酒店優惠

睇到呢度,喺咪想即刻book酒店嚟返個台灣美食之旅呢?點樣先可以用至抵價錢book台北酒店?上Hotels.com攞我哋最新嘅優惠代碼啦!只需要click入去呢個網站https://zh.hotels.com/jiu-dian-you-hui/coupon/copy優惠碼,然後喺付款頁面貼上優惠碼,就可以享用折扣優惠㗎啦! 仲有好多超筍酒店優惠同埋精選酒店神秘優惠價,快啲上Hotels.com用至抵價錢訂房啦!