定期送上世界各地最新、最地道嘅旅遊資訊!

坐定定睇好戲:提供免費迷你戲院嘅五大酒店

你有冇試過,你喺海外旅遊期間完全融入當地文化,但成日喺出面玩咗咁耐之後,返到酒店最想做嘅,就係狂煲Netflix節目,翻睇再翻睇自己最鍾意嘅電影,#尋找真我﹖好似你咁樣嘅人大把,你哋有可能喺外面吸收太多異地文化營養消化不良啦。


好彩而家唔少酒店都為賓客行多一步,務求營造賓至如歸嘅感覺,包括設置迷你戲院或者露天戲院,畀賓客免費入場睇戲。喺我哋以下介紹嘅五間酒店,毋須離開酒店範圍半步,就可以舒舒服服坐低欣賞闊銀幕大電影。

 

適合舊片發燒友:愛爾蘭戈爾韋Glenlo Abbey Hotel

Glenlo Abbey Hotel本身已經係歷史悠久嘅建築物,酒店裡面嘅Abbey Movie Theatre更加係極盡豪華,睇落就好似90年代富貴人家嘅經典家庭戲院一樣。戲院裡面設有紅絨座椅、桃花心木牆身同埋柔和燈光,營造一片舒適典雅嘅感覺。電影每日場次係下午3點同埋晚上10點。戲院只會上映舊片,包括《亂世佳人》同埋賓客至愛嘅《東方快車謀殺案》。

 

適合荷里活大片癡:美國波特蘭Hotel deLuxe

如果你咁啱好彩撞正,你可以睇到Hotel deLuxe著名嘅Pop-up Cinema播放經典荷里活電影。呢項即興放映活動通常喺一個月內特定星期日舉行,放映地點係酒店裡面嘅典雅放映室,室內設有16呎闊銀幕同埋金光閃閃嘅布幕。

 

適合浪漫一族:摩洛哥阿斯尼Kasbah Tamadot

摩洛哥酒店Kasbah Tamadot四周被阿特拉斯山脈包圍,景致瑰麗奪目,係布蘭森爵士嘅平靜隱居地。酒店舉行嘅電影放映晩會喺戶外進行,設有多個舒適帳篷,畀賓客成雙成對攬埋一起喺星空下欣賞電影。泳池旁設有大型投影機播放電影,全部都係以摩洛哥為主題嘅電影,其中之一就係浪漫片中嘅經典《北非諜影》。

 

適合小朋友:奧地利米特爾貝格Kinderhotel Alphotel

歐洲各地都有適合一家大細入住嘅酒店Kinderhotel,裡面嘅室內娛樂場Smileyplexx只限細路進入,畀佢哋成日大玩特玩之後靜靜地坐低欣賞各式卡通片同埋兒童電影。呢個度假村酒店可謂老少咸宜,無論係家長定係子女,都會喺酒店搵到豐富節目,過一個輕鬆愉快嘅假期。

 

適合潮人:美國聖迭戈The Pearl Hotel

The Pearl Hotel每個星期都會舉行一場「深潛電影院」電影放映聚會,地點就係池邊休息室旁邊嘅戶外空地。喺絕佳嘅氣氛之下,賓客可以隨意搵張池邊座椅坐低瞓低,或者攞住杯飲品一邊同人傾偈一邊欣賞賣座電影或者舊片,即使已經睇過好多次都唔介意再睇多次。即將放映嘅電影包括《哭泣的玫瑰》、《油脂》同埋《不日成名》。

 

查看更多