定期送上世界各地最新、最地道嘅旅遊資訊!

【上海必食之選】上海美食隱藏版!Top 6上海餐廳推薦大全!

去上海當然要品嚐正宗本幫菜,勁食小籠包、生煎包啦!小編搜羅咗幾間正宗百年老字號上海餐廳同隱世上海菜小店,真係嚟上海必食㗎,跟住呢個上海美食隱藏版搵食就實冇錯喇。

 

上海必食之選|老半齋

老半齋
@kings_n_

如果你想體驗正宗嘅老上海味道,咁就一定要嚟朝聖零差評百年老店,老半齋!老半齋於光緒三十一年開業,最早期叫半齋總會,後來改名做老半齋酒樓以示正宗,直到而家老半齋依然保持住古樸陳舊嘅門面。呢間聞名上海嘅老字號淮揚菜,品種齊全,價格實惠,水晶肴肉、蘿蔔絲餅、清燉蟹粉獅子頭都係必點之選。

老半齋_2
@hidekimatsumoto3

而刀魚汁麵就係佢嘅招牌菜,由於刀魚喺每年三月先會上市,數量有限,淨係會賣一兩個月,真係可遇不可求㗎!被譽為最美味嘅刀魚汁麵,再配一塊入口即溶嘅特色餚肉,一試難忘!

 

老半齋
地址:上海市黃浦區福州路600號 (顯示地圖)
交通:地鐵1,2, 10號線於南京東路或人民廣場下車步行3分鐘
營業時間:06:00-14:00 / 17:00-20:30

 

上海必食之選|德興館

德興館
@koospick

呢間本幫菜老字號創於光緒九年,有說德興館係上海本幫菜嘅發源地,以做麵起家,至今仍然保留清朝嘅門面,匾額上黑底金字寫上「百年老店創建於1878年光緒年間」。

德興館_2
@jolli316

德興館價格親民,係當地人用餐勝地之一。佢哋嘅燜蹄麵一直被上海人視為「上海第一麵」,鬆軟嘅燜肉好入味,澆頭與湯麵融為一體,鹹中帶甜,甜中帶鮮。上海人食麵,講究澆頭,亦即係配料,除咗燜蹄仲可以放上排骨、獅子頭、或熏魚塊等等。

 

德興館
地址:上海市黃浦廣東路471號 (顯示地圖)
交通:地鐵1,2,8號線到大世界站2號出口
營業時間:06:15 – 21:30

 

上海必食之選|王寶和

王寶和
@fernangelkuok

老上海人都知道王寶和一年四季都有特色蟹品供應,係上海好出名嘅品蟹之地,啱曬各位蟹迷。王寶和於清朝乾隆九年開業,至今已經有二百六十幾年歷史,是上海最有名氣嘅老店之一,以專營清水大閘蟹及王寶和老酒聞名。

王寶和_2
@terutsugutakano

去王寶和食大閘蟹非常講究,佢哋會提供一套名為「蟹八件」嘅食蟹工具,高手可以將蟹肉拆完之後砌返做一隻完整嘅蟹!

 

王寶和
地址:上海市黃浦區福州路603號 (顯示地圖)
交通:人民廣場往福州路方向步行5 分鐘
營業時間:11:00-13:30 / 17:00-21:00

 

上海必食之選|沈大成

沈大成
@maying1023

同樣係百年老店嘅沈大成喺1875年開業,係上海知名嘅老字號糕餅店,經常都大排長龍,有好多傳統糕點美食,非常值得一試。

沈大成_2
@vakeup_foodie

雙釀團、青團、頭條糕都係必食,外皮好煙韌有彈性,餡料有唔同選擇,例如鹹蛋肉鬆、豆沙、黑芝麻等等。當中鹹蛋肉鬆青團係最受歡迎嘅,好多人都係一盒一盒咁掃貨㗎。

 

沈大成
地址:上海市黃浦區南京東路636號 (顯示地圖)
交通:南京東路地鐵站1號出口
營業時間:07:00 – 00:00

上海必食之選|逸桂禾

逸桂禾
@twins_kitchen

介紹咗咁多間知名嘅百年老店,係時候介紹返隱世上海小店喇。呢間係本地人之中好有口碑嘅小店,不論裝潢定菜式都係非常傳統嘅老上海本幫味道,打卡一流。最出名係味道正宗嘅上海傳統陽春麵,比起其他麵店略貴,但係依然人流不絕。

逸桂禾_2
@maxxieou90

一入到去基本上都係上海人,人人面前都有一碗麵。陽春麵湯頭清澈,散發出陣陣豬油香,麵條較硬身有咬口,一試就知道功夫好!

 

逸桂禾
地址:上海市吉安路290號 (顯示地圖)
交通:老西門地鐵站步行3分鐘
營業時間:06:30 – 21:00

 

上海必食之選|萊萊小吃湯包館

萊萊小吃湯包館
@hongkong.foodie

去上海當然係要怒食小籠包,特別係遊客區名店非常多,相信大家都試過。今次小編推介大家去呢間小店,地點唔算好就腳,位處南京東路同人民廣場之間,因此亦都唔多遊客去。

鋪面好平凡,好容易就會錯過呢間隱世美味小籠包。小籠包即叫即蒸,落完單就會攞去大門外嘅石油氣蒸爐蒸熟,非常有風味。品種唔多,只有鮮肉、蝦仁、蟹粉同蟹膏四款。鮮肉小籠包皮薄餡靚,清甜多汁,完全唔油膩。

萊萊小吃湯包館_2
@duncan.lau

蟹粉小籠包鮮甜嘅蟹味令味道再昇華,蟹粉湯汁爆棚,隔住塊皮都見到充滿住金黃色嘅湯汁,一人一籠係基本!

 

萊萊小吃湯包館
地址:上海市黄浦區天津路504號 (顯示地圖)
交通:人民廣場地鐵站步行8分鐘
營業時間:08:00 – 14:00 / 16:00 – 19:30

 

上海住宿推薦|上海豫園萬麗酒店

上海豫園萬麗酒店
@上海豫園萬麗酒店官網

上海豫園萬麗酒店係屬於萬豪集團旗下,座落喺市中心,同著名景點豫園、老城廂、外灘、新天地等等非常近,只係幾分鐘路程。酒店距離豫園地鐵站只有100米,交通好便利。

上海豫園萬麗酒店_2
@上海豫園萬麗酒店官網

酒店房間設計較現代化,感覺明亮,仲有落地玻璃窗,景色唔錯。酒店其中一個 selling point 係 無邊際泳池,泳池雖然唔算好大,但依然好吸引,就算唔游水喺到欣賞夜景都好正!。

 

上海豫園萬麗酒店
地址:上海市河南南路159號 (顯示地圖)
星級 | ★★★★★
位置 | ★★★★★
設施 | ★★★★☆
環境 | ★★★★☆
價格 | 查看價格 

 

上海住宿推薦|上海索菲特海侖賓館

上海索菲特海侖賓館
@上海索菲特海侖賓館官網

上海索菲特海侖賓館位於上海市中心地段嘅商業區,擁有絕佳嘅地理位置,一出去就係南京步行街,去外灘、人民廣場同其他著名景點都好方便,亦都好近地鐵站。附近有好多百貨公司、餐廳、特色小店,行街食飯都好就腳,慳返唔少交通時間。

上海索菲特海侖賓館_2
@上海索菲特海侖賓館官網

重新設計同翻新過嘅酒店,質素方面當然唔錯,設計新穎大方,住得舒適。酒店亦有齊Spa、Gym等設施,整體嚟講係CP值非常高嘅上海酒店 。

 

上海索菲特海侖賓館
地址:上海市南京東路505號 (顯示地圖)
星級 | ★★★★☆
位置 | ★★★★☆
設施 | ★★★★☆
環境 | ★★★★☆
價格 | 查看價格 

 

📖延伸閱讀:【上海好去處】上海文青必到打卡位!6間型格上海cafe連文青住宿推薦!
📖延伸閱讀:【上海酒吧推薦】遊走於上海弄堂間—六大上海新天地、田子坊潮聖打卡點!
📖延伸閱讀:【高鐵旅遊】品味潮汕風味原產地!汕頭美食、潮州美食特集!
📖延伸閱讀:【金門自由行】快閃金門一日遊!景點、交通、餐廳、住宿懶人包!(廈門去金門交通攻略)

 

Hotels.com酒店優惠Hotels.com酒店優惠