定期送上世界各地最新、最地道嘅旅遊資訊!

【芽莊4日3夜】越南芽莊景點、餐廳、美食攻略懶人包!

想快閃旅行充充電?大部分香港人都會選擇東南亞地區,近近哋玩返幾日又平又正呀嘛!而近年就多咗人選擇去芽莊4日3夜喇,而家香港已經有直航去越南芽莊,非常方便。今次小編就精選咗幾個必去嘅芽莊景點,芽莊餐廳,一於去hea返幾日享受陽光與海灘、玩吓水上活動、嘆芽莊美食、浸泥漿浴,體驗越南芽莊嘅慵懶假期!

 

📖延伸閱讀:【芽莊自由行】芽莊住宿景點攻略 2018(連芽莊 Villa、芽莊酒店推介)

 

越南芽莊景點推薦|芽莊海灘

芽莊海灘@travelcompany.online

芽莊海灘可以話係芽莊最熱門嘅旅遊景點,綿延6公里長嘅海岸線,水清沙幼,嚟到越南芽莊一定唔可以錯過呀。無論係嚟睇日出日落嘅美景、海灘漫步、曬太陽、定係玩各式各樣嘅水上活動,呢到都滿足到你嘅要求。而因為附近有海景酒店,沙灘上仲有免費提供嘅太陽傘同躺椅添!

芽莊海灘_2@katrinavaa

芽莊海灘以水清沙幼同超長海岸線聞名,係小編心目中嘅No.1嘅芽莊景點,就算咩都唔做看吓海都夠寫意,而且大家會發現芽莊海灘有好多俄羅斯人添。

 

芽莊海灘
地址:68 Trần Phú, Tp. Nha Trang, Khánh Hòa 650000, Vietnam (顯示地圖)
交通:距離芽莊城區南北走向的主路很近,大約步行2分鐘

 

越南芽莊景點推薦|珍珠島主題樂園

珍珠島主題樂園@alichka_gribanova

珍珠島樂園 Vinpearl Land Amusement Park係芽莊入面最大型嘅主題公園,有「芽莊迪士尼」嘅稱號!Vinpearl其實是Vietnam同Pearl兩個字加起嚟嘅,意思係「越南海上嘅一顆明珠」。珍珠島樂園建於竹島之上,需要搭超過三公里嘅跨海纜車前往,大家可以喺高空上欣賞芽莊嘅美景添。

@Chibasik

樂園佔地超過二百萬呎,水上樂園、機動遊戲、水族館、住宿、購物、餐飲應有盡有,無論係情侶出遊、一家大細或者成班friend嚟玩都啱曬呀!園內有多個水上玩樂設施、刺激嘅機動遊戲同精彩嘅海洋表演,可以玩足全日絕對值回票價!

@peacchypics

樂園位於竹島嘅一座度假村內,搭纜車入去嗰陣仲可以欣賞到咁靚嘅景色㖭!

 

珍珠島主題樂園
地址:Vinh Nguyen, Thành phố Nha Trang, Khanh Hoa Province 650000, Vietnam (顯示地圖)
交通:到竹島乘搭纜車入場
開放時間:08:30 – 21:00
入場費用(只供參考):成人800,000VND;小童700,000VND
官網:http://nhatrang.vinpearlland.com/en/

 

 

越南芽莊餐廳推薦|Let It Be Cafe

Let It Be Cafe@nhatrang-travel.com

講到越南,又點少得越南咖啡?呢間cafe嘅老闆係一對兄弟,熱愛攝影同蒐集古董相機,而且一聽個名就知佢哋係Beatles嘅粉絲啦!Let It Be喺芽莊年輕人當中都幾受歡迎㗎,間唔中會有駐場樂隊演出添,一邊聽歌一邊嘆咖啡,爽呀!

 

Let It Be Cafe
地址:118 Bạch Đằng, Phường Tân Lập, Thành Phố Nha Trang, Tỉnh Khánh Hòa, Vietnam (顯示地圖)
交通:由市區搭的士大約5-10分鐘車程
開放時間:11:00 – 21:00

 

越南芽莊景點推薦|跳島

越南芽莊@brebrezhneva

跳島遊,其實即係一次過去幾個小島精華遊。喺東南亞嘅群島國家,幾乎都有跳島遊呢個節目。而喺越南芽莊就係從中挑選四個島,進行一日遊,係必去嘅芽莊景點之一。跳島遊係好多第一次去芽莊嘅人必備嘅行程,至於去邊四個島就要睇你報咩團喇,記得向導遊查詢清楚呀。

@doctor_egoryev
隔住個mon都感受到啲水有幾清呀,潛水一流!

芽莊附近幾個較大同熱門嘅有妙島(Hon Mieu)、木島(Hon Mun)、燕島(Hon Yen)、竹島(Hon Tre)、第一島(Mot Island)、銀島(Tam Island)。大家可以參加local tour,每個團行程同埋去嘅島都會有唔同,記得揀清楚先報名呀。

而當中要數木島最受歡迎,木島離芽莊大約45分鐘船程,屬於越南嘅珊瑚保護區,水質清徹能見度非常高,可以欣賞超過350種珊瑚品種㗎,係芽莊熱門潛水勝地,熱愛水上活動嘅人千祈唔好錯過呀!

 

跳島遊
交通:會有專車接送來回酒店
遊覽費用(只供參考):15,000VND – 30,000VND之間 (不包括水上活動及浮潛用具)

 

 

越南芽莊景點推薦|I-resort泥漿浴

泥漿浴@I-resort官網

想鬆一鬆relax吓,除咗做spa,仲可以浸泥漿浴!泥漿浴係芽莊最有特色嘅項目,成人都係300,000VND就可以浸喇!因為越南好多礦場,而芽莊人就一直都有用礦泥浸浴嘅習慣,就好似浸溫泉咁。泥漿含有大量礦物質,據聞可以改善膚質,有美白功效㗎,女士們唔好錯過!

泥漿浴_2@beeasaur

泥漿暖暖哋,好幼滑,小心啲會坐唔穩呀。浸大約20分鐘店員就會提醒你起身,去沖身之後就可以繼續享用其他設施喇。

I-resort@I-resort官網

想體驗地道泥漿浴,I-resort就啱曬你喇。I-resort比較新淨,設施齊全又高質,係好多旅客嘅心水選擇。入面設有獨立池,店員會幫每位客人換新一批水同泥漿嚟浸浴,夠曬衛生。Resort內仲有好多其他設施㗎,有溫泉池、按摩池,另外仲有Spa服務,浸完泥漿浴再做返個越式按摩先夠嘆!

 

I-resort泥漿浴
地址:Tổ 19, thôn Xuân Ngọc, Vĩnh Ngọc, Thành phố Nha Trang, Khánh Hòa, Vietnam (顯示地圖)
交通:市區搭的士大約200,000 – 300,000VND
開放時間:08:00 – 20:00
參考費用:普通泥漿浴 (20分鐘) 成人300,000VND;小童150,000VND
官網:http://www.i-resort.vnl

 

 

越南芽莊餐廳推薦|Nha Hang Yen’s Restaurant

Nha Hang Yen’s Restaurant@tripyum

餐廳環境非常唔錯,佈置裝潢都非常有心思,每到晚市時間都人頭湧湧㗎!除左環境出色,呢到嘅食物亦都絕對唔會令你失望。

海鮮火鍋

餐廳主打越式海鮮火鍋,配料非常豐富,魷魚,大蝦,石斑魚等等⋯⋯令個鍋鮮味十足!

越式春卷
@ami__ys

越式春卷亦都唔可以錯過,春卷皮以米漿製造,配以鮮蝦,豬肉,蔬菜等作為餡料,包住生菜,點少少魚露一啖放入口,真係好滿足!

 

Nha Hang Yen’s Restaurant
地址:73/6 Trần Quang Khải, Thành phố Nha Trang, Khánh Hòa, Vietnam (顯示地圖)
交通:位於Havan Hotel大堂
營業時間:10:30 – 22:30
官網:https://www.havanhotel.com/yensrestaurant.html

 

越南芽莊餐廳推薦|Mix Restaurant

Mix Restaurant@fog0418

Mix Restaurant 喺當地人氣爆燈,基本上晚晚都要等位,但食完就會知道絕對係值得排隊嘅一間餐廳!無論海鮮定肉類,店家都烹調得十分有水準,入口肉質唔會乾,保持到濕潤有彈性,性價比十足!

海鮮拼盤, 烤肉拼盤@heileychau

呢到食物唔只好食,價錢仲平到你唔信,份量十足。小編推介Mix海鮮拼盤同Mix烤肉拼盤,寫住一人份但份量足夠兩個人share!

 

Mix Restaurant
地址:77 Hùng Vương, P, Thành phố Nha Trang, Khánh Hòa 650000, Vietnam (顯示地圖)
營業時間:11:00 – 22:00 (星期三休息)
官網:https://www.mix-restaurant.com/

 

 

越南芽莊餐廳推薦|Nhat Phong 3 Seafood Restaurant

Nhat Phong 3 Seafood Restaurant@Tripadvisor

要數芽莊美食又點少得海鮮?Nhat Phong 3 Seafood Restaurant 位於著名嘅海鮮排檔一條街,係最受歡迎嘅芽莊餐廳之一。

Nhat Phong 3 Seafood Restaurant海景@jiangxintongjasmine

餐廳樓高三層,如果有幸可以係最頂層用餐,就可以一邊欣賞美麗嘅海景一邊食飯喇!

龍蝦@ln.khanhvy

呢到出名海鮮品種最齊全最豐富,無論係巨型嘅海蟹、拳頭禁大嘅海膽、抑或係最新鮮嘅龍蝦都可以一次過喺呢度食到!

 

Nhat Phong 3 Seafood Restaurant
地址:63B Cù Lao Trung, Vĩnh Thọ, Thành phố Nha Trang, Khánh Hòa, Vietnam (顯示地圖)
開放時間:09:00 – 23:00

 

越南芽莊景點推薦|Dam Market

Dam Market@andyn_81

嚟到芽莊點可以唔行地道市場?Dam Market位於城北,係芽莊最大嘅市場,係體驗當地文化嘅好地方。樓高兩層嘅古典環形嘅建築,見到CHO DAM就冇去錯喇!

@mwenpau

市場入面咩都有,新鮮蔬果海鮮、海味乾貨、服飾雜貨等等,有齊日常生活所需,熙熙攘攘相當之熱鬧,典型嘅越南舊式市集,夠曬地道!當地人平日都周不時嚟入貨,而家仲愈嚟愈多遊客去參觀同買手信添!留意返佢哋對遊客開價會較高,買嘢記得要講吓價喇。呢到除咗有得買,仲有得食,有唔少平民熟食檔可以醫肚,體驗地道芽莊風味。


@yurlov

推薦大家買蝦米等乾貨做手信,又平又正。

 

Dam Market
地址:Vạn Thạnh, Thành phố Nha Trang, Khanh Hoa Province 650000, Vietnam (顯示地圖)
交通:由市區搭的士大約10分鐘車程
開放時間:05:00 – 18:30

 

 

越南芽莊自由行住宿推薦|芽莊波賽頓酒店

芽莊波賽頓酒店@zenhotels.com

酒店位置便利,周圍已經有好多餐廳同Spa,想食嘢定按摩都好就腳!而且酒店距離海灘只係5分鐘路程,啱曬鐘意陽光與海灘嘅朋友仔,想去沙灘漫步定玩水上活動都好方便㗎。

芽莊波賽頓酒店_2@poseidonnhatranghotel.com

房間光猛企理,空間感唔錯,房間窗戶仲可以望到海,夠曬寫意!

 

芽莊波賽頓酒店
地址:VNM芽莊30 Tran Quang Khai (顯示地圖)
星級 | ★★★★☆
位置 | ★★★★★
設施 | ★★★★☆
環境 | ★★★★☆
價格 | 查看價格  

 

 

越南芽莊自由行住宿推薦|越南之珠富國島 2 號探索酒店

越南之珠富國島 2 號探索酒店@weekendhk.com

真心推介呢間超豪華resort,一棟棟白色別墅裝修非常華麗!成個渡假村係好大㗎,有專人揸哥爾夫球車接送,而且附近就係珍珠島樂園,玩完一日返酒店嘆到盡呀!

越南之珠富國島 2 號探索酒店_2@weekendhk.com

房間極大,行出少少已經係海灘,180度咁望住個咁靚嘅海景,真係冇得輸呀!房間仲包埋1次免費spa,加分!

 

越南之珠富國島 2 號探索酒店
地址:Bai Dai Area, Ganh Dau Commune, 富國, Kien Giang, 越南 (顯示地圖)
星級 | ★★★★★
位置 | ★★★★☆
設施 | ★★★★☆
環境 | ★★★★★
價格 | 查看價格  

 

 

📖延伸閱讀:【越南下龍灣實地考察】包住包食套票二千蚊有找!入住越南郵輪有咩玩?
📖延伸閱讀:【河內自由行】平民價位嘆越南美食!河內3大越南法國菜餐廳及附近住宿推薦!
📖延伸閱讀:【越嚟越舒服】越南按摩邊度有?Top 5 必住越南 Spa Resort!
📖延伸閱讀:【胡志明市美食特集】嚴選高汁文青feel!打卡必去越南咖啡室列表 (連西貢必食推介)

 

 

Hotels.com酒店優惠Hotels.com酒店優惠