定期送上世界各地最新、最地道嘅旅遊資訊!

【秋田溫泉篇】日本東北地區—乳頭溫泉鄉懶人包2018 (連日本溫泉禮儀Tips)

乳頭溫泉鄉位於秋田縣八幡平國立公園內嘅乳頭山山麓,係由七家溫泉旅館組成,每家溫泉旅館嘅溫泉都各有特色,各有風味,溫泉鄉內共有十幾種嘅溫泉,每種都有唔同功效,包你浸完肌膚白滑!值得一提係呢度嘅露天溫泉,溫泉鄉被山同樹林包圍住,你可以邊浸溫泉邊享受美麗景色,係咪好想即刻試下呢個深山秘境溫泉呢!

 

📖延伸閱讀:【北海道自由行】北海道溫泉特輯—2018春季露天溫泉食、玩、住全攻略!

 

秋田溫泉|乳頭溫泉鄉|乳頭溫泉|鶴之湯溫泉@nyuto-onsenkyo.com

鶴之湯溫泉係非常難預約嘅人氣旅館,亦係乳頭溫泉鄉最古老嘅溫泉,擁有300多年歷史。溫泉旅館保留咗傳統嘅茅草屋頂同江戶時期嘅風味,擁有濃濃嘅傳統日本溫泉特色。館內有四種泉質各異嘅溫泉,其中名最出名嘅露天溫泉「鶴湯」係男女混浴,如果怕醜嘅女士都可以選擇女性專用嘅露天溫泉,溫泉館內無男性專用露天溫泉,但有男性用嘅室內溫泉,功效一樣咁顯著。

 

鶴之湯溫泉
地址:秋田県仙北市田沢湖先達沢国有林50 (顯示地圖)
營業時間:10:00 - 15:00
交通方式:於巴士站「アルパこまくさ」下車轉搭免費專用接駁車或乘搭「湯巡り号」的接駁車
溫泉費用(只供參考):成人600日圓、兒童300日圓

 

秋田溫泉|乳頭溫泉鄉|乳頭溫泉|妙乃湯溫泉@nyuto-onsenkyo.com

以完善設施同貼心服務著名嘅妙乃湯溫泉,係十分受女性顧客青睞嘅秘湯,據聞呢度嘅溫泉唔單止可以促進健康,仲可以有養顏美容嘅效果!旅館嘅裝潢取自大量嘅木材同石材,坐擁獨特設計風格,館內亦散發著濃濃嘅木頭香氣,環境優美寧靜,係都市人「叉電」嘅好地方。妙乃湯溫泉有「金之湯」和「銀之湯」兩種唔同泉源,各自都有室內同露天溫泉,浸完溫泉仲可以享受地道嘅秋田鄉土料理㖭!

 

妙乃湯溫泉
地址:秋田県仙北市田沢湖生保内字駒ヶ岳2-1 (顯示地圖)
營業時間:10:00 - 15:00
交通方式:「羽後交通」巴士、「湯巡り号」於「妙乃湯溫泉前」下車
溫泉費用(只供參考):800日圓

 

📖延伸閱讀:【日本秘境溫泉絕密公開】四國溫泉+懷石料理推介,一泊兩食套餐大比併

 

秋田溫泉|乳頭溫泉鄉|乳頭溫泉|蟹場溫泉@nyuto-onsenkyo.com

蟹場溫泉位於山腳下,係日本人最受歡迎嘅旅館之一,室外露天混浴座落於森林入面,可以一邊溫泉、一邊感受大自然。蟹場溫泉除咗露天溫泉,仲有岩石同木頭嘅室內溫泉,據說可改善糖尿病,皮膚病等功效!如果怕醜唔想混浴但又想試下露天溫泉?女士可以趁晚上7點半至8點半入浴,因為呢段時間係女性專用時間呀!

 

蟹場溫泉
地址:秋田県仙北市田沢湖田沢字先達沢国有林 (顯示地圖)
營業時間:9:00 – 17:00
交通方式:乘搭「羽後交通」巴士、「湯巡り号」於「黑湯溫泉前」下車
溫泉費用(只供參考):600日圓

 

📖延伸閱讀: 東京近郊溫泉之旅:箱根溫泉酒店推薦

 

秋田溫泉|乳頭溫泉鄉|乳頭溫泉|黑湯溫泉@nyuto-onsenkyo.com

黑湯溫泉隱身於深山裡,以300多年歷史嘅茅草屋風情聞名。前往旅館嘅沿途山路崎嶇不平,落車後仲要挑戰一條好斜嘅小山路,所以比較少人會選擇入住。黑湯溫泉擁有簡約風格,客房嘅擺設唔多,有別於一般嘅旅館,連網絡都唔太穩定,令人暫時與外界斷絕,享受恬靜嘅一晚。館內有男女分開嘅露天、室內溫同混浴,怕醜嘅朋友就唔洗怕啦!

 

黑湯溫泉
地址:秋田県仙北市田沢湖生保内黒湯沢2-1 (顯示地圖)
營業時間:9:00 - 16:00 (4月中旬~11月上旬)
交通方式:乘搭「湯巡り号」於「黑湯溫泉前」下車
溫泉費用(只供參考):成人600日圓、兒童(小學生)300日圓

 

📖延伸閱讀:【京都自由行】春日京都和服攝影,秘密景點大公開!(連京都櫻花必買手信)

 

秋田溫泉|乳頭溫泉鄉|乳頭溫泉|日本溫泉禮儀

有唔少香港人去日本旅行嘅時候都浸過溫泉,但有時都會不知所措,始終因為唔太熟悉日本溫泉而犯禁,只要遵循以下3個Tips,無論係去邊個地區都可以安心浸溫泉,唔使驚尷尬啦!

 

日本溫泉禮儀 | 全身脫光光

日本大部分嘅溫泉都係裸湯,千其唔好著泳衣、內衣褲或圍浴巾進入泉池呀!旅館會提供大小毛巾,大毛巾係用黎抹身,小毛巾先可以帶入溫泉區。

 

日本溫泉禮儀 | 要洗乾淨身體、勿披頭散髮

進入泉池之前,周圍都會有淋浴處,大家記得要將全身洗得乾乾淨淨,免得污染泉水,因為溫泉係大家共享嘅泉池。女士如果係長頭髮嘅話,一定要紮起頭髮先好落水,頭髮係唔可以浸喺泉水度㗎!

 

日本溫泉禮儀 | 慢慢進浴池

由於溫泉嘅水溫平均都會高於人體,為左避免血壓因為溫差而急速上升,造成暈倒嘅風險,落水時要慢慢先浸半身,等身體適應之後再浸到肩膊。浸溫泉最多只可以浸30分鐘,但每個人嘅身體狀況都唔一樣,建議大家只要覺得唔舒服或無法忍受嘅時候,就要慢慢起身離開浴池休息。

 

秋田溫泉|乳頭溫泉鄉|乳頭溫泉|交通方法

秋田當地旅遊主要依靠嘅交通方式有秋田新幹線、JR線同秋田內陸線,旅客可以先搭JR秋田新幹線到田澤湖站,再搭羽後巴士前往乳頭溫泉鄉。羽後巴士約每小時就有一班,從「田澤湖站」開車約50分鐘就可抵達乳頭溫泉鄉。另外,租車自駕遊東北秋田都係個唔錯嘅選擇!

 

 

Hotels.com酒店優惠 

Cover @Flickr