定期送上世界各地最新、最地道嘅旅遊資訊!

【去富士山行山】入門級!富士山2日1夜登山路線、裝備、火山警戒須知!

富士山可以話係日本最有代表性嘅景點,每個去日本嘅人總會去一睹富士山嘅英姿!或者你早就欣賞過富士山,但去富士山行山你又試過未呢?上富士山山頂,唔單單可以喺山上俯瞰絕美嘅景色,更加可以感受大地在我腳下嗰種感覺,絕對係一生人要有一次嘅體驗!今次小編就為大家介紹富士山2日1夜登山路線,連埋行山須知一次過話你知!

 

富士山行山攻略|富士山登山路線簡介

喺小編介紹富士山登山路線之前,先講少少富士山嘅資訊。富士山高3,776公尺,係日本最高嘅山峯!富士山高聳入雲,山峯長期積雪,所以並唔係一年四季都可以去富士山行山,每年只會喺夏天(大概7至8月)嘅時份先開放登山,實際要視乎融雪情況。以下將會介紹四條行山路線,但每條路線所花嘅時間較長,建議想攻頂嘅朋友可以喺山上小屋住一晚,始終入夜後山路比較難行,亦都較為危險。

 

 

富士山行山攻略|富士山登山路線簡介|吉田線
如果你平時冇行開山,又或者自問體力並唔係好好,吉田線就適合第一次行富士山嘅人喇!呢條路線係最多人行嘅路線,亦都係四條登山路線中最簡單嘅一條。雖然呢條係最簡單嘅登山路線,但都唔好睇少!吉田線全長7.5公里,上山落山加埋都要接近9個鐘嘅時間㗎!

富士山行山攻略|富士山登山路線簡介|富士宮路線
呢條路線係四條路線中路程最短嘅一條,全長5公里,大約需要5個鐘先上到山,所以係繼吉田線後最受歡迎嘅一條登山路線。雖然呢條路線路程最短,但坡度較斜,所以走起上嚟係比吉田線更加吃力,不過沿途可以欣賞圍繞富士山嘅駿河灣,睇到嘅風景比起吉田線更加震撼!

富士山行山攻略|富士山登山路線簡介|須走線
須走線係四條登山路線之中最冷門嘅路線,路線全長7.8公里,大約要行6.5個鐘。須走線嘅起點喺富士山東面,沿途會經過一大片森林,所以可以欣賞到富士山唔同種類嘅動植物。由於呢條路線比較多樹蔭,光線會被樹木遮蔽,行嘅時候要份外小心。

富士山行山攻略|富士山登山路線簡介|御殿場路線
御殿場路線係四條路線中最高難度嘅路線,總長11公里,上山時間需要7.5個鐘。呢條路線當中有一大段路程都係冇山屋,所以記得帶備足夠嘅食水同乾糧。呢條行山路線唔單止距離最長,海拔落差亦都最大,所以適合行山經驗豐富者,如果想輕鬆行富士山或者唔係成日行山嘅人士,小編唔建議揀呢條路線。

 

富士山行山攻略|2日1夜登山住宿推薦|山上小屋

為咗方便登山者,富士山登山徑沿途都有好多小屋,為登山者提供基本食宿,等佢哋可以補充體力、休息一晚,再繼續行程。吉田線有最多山上小屋,總共有十幾間,以下會列出幾間比較熱門嘅山上小屋,如果要book建議盡早預約,因為通常山上小屋都好full,walk-in多數都會冇位。

1) 御來光館
網址:http://www.goraikoukan.jp/
2) 元祖室
網址:http://www.mfi.or.jp/fujisan/
3) 太子館
網址:http://www.mfi.or.jp/taisikan/
4) 蓬萊館
網址:http://horaikan.jp/

 

富士山行山攻略|2日1夜登山住宿推薦|富士中心 APA 酒店

山上小屋設備比較簡陋,如果你想住得舒服一啲,可以考慮住喺富士山市酒店,休息一晚先繼續行程。富士中心 APA 酒店距離富士山需要60分鐘車程,酒店24小時都可以check-in,無論幾點落到山都可以入住。

酒店房寬敞闊落,大部分客房仲可以遠眺富士山,景色一流!

 

富士中心 APA 酒店
地址:417-0056 靜岡縣, 富士市, Hinode-Cho 38, 日本 (顯示地圖)
星級 | ★★★☆☆  
位置 | ★★★☆☆  
設施 | ★★☆☆☆  
環境 | ★★☆☆☆  
價格 | 查看價格  

 

富士山行山攻略|2日1夜登山住宿推薦|富士吉田庭院路線酒店 

呢間酒店正正喺富士山山腳,位置非常方便,由酒店出發去富士山遊客中心只需要10分鐘車程。由酒店去富士吉田市火車站亦都只需10分鐘車程,去邊都好方便。

雖然酒店房間唔算非常華麗,但基本設施都一應俱全,而且酒店最大賣點係地點方便,對富士山行山人士係一個性價比高嘅住宿選擇!酒店內仲有一個公共浴池,行完山可以去浸浴放鬆一下!

 

富士吉田庭院路線酒店
地址:403-0005 山梨縣, 富士吉田市, Kamiyoshida 1411-1, 日本 (顯示地圖)
星級 | ★★★☆☆  
位置 | ★★★★★  
設施 | ★★☆☆☆  
環境 | ★★☆☆☆  
價格 | 查看價格

 

富士山行山攻略|行山須知|裝備篇


1) 行山鞋
行富士山同喺香港行山好唔同,唔好諗住著波鞋都可以輕鬆攻頂,富士山山路比較崎嶇,亦多碎石,小編建議準備一對行山鞋,無論防跣能力定抓地能力都絕對比波鞋更加優勝!

2) 擋風/預寒衣物
富士山海拔落差較大,喺山腳或者你覺得唔係好凍,但當你上到山上溫度就會驟降,入夜之後更加可以低至零下四、五度!而且山上比較大風,所以要預備足夠嘅擋風同保暖衣物。

3) 輕便雨衣
山上天氣話變就變,仲無常過女人,所以背囊一定要預備定一件雨衣!

4) 充足食水
雖然沿途都會有小屋有賣食水,但當然最好準備定足夠食水啦!

 

 

富士山行山攻略|行山須知|火山警戒須知

富士山係一座活火山,雖然已經好多年冇火山爆發,最後一次噴發係喺1707年,但所有登山者都要清楚知道火山警戒級別。日本火山警戒級別分為5級,分別係1-留意活火山、2-火山口周邊管制、3-入山管制、4-準備避難同5-避難,出發之前記得上官網check下先!

 

 

Hotels.com酒店優惠