定期送上世界各地最新、最地道嘅旅遊資訊!

【九州溫泉推薦特輯】日本九州溫泉一泊兩食酒店推介!(連浸溫泉注意禮儀)

正所謂「入鄉隨俗」,感受日本人殷勤禮待嘅同時,我哋係咪應該尊重返對方嘅文化先?最近杜如風套《九州攻略》熱播,睇完係咪好想去日本浸溫泉呢?今次小編就會同大家分享六個日本溫泉禮儀,去日本浸溫泉嘅時候記得留意返喇!

 

📖延伸閱讀:【日本冬季溫泉提案】京都溫泉旅館+大阪溫泉旅館一泊二食套餐大比併2018!(話埋你知邊間有私人風呂!)

 

九州自由行| 九州溫泉住宿推介|湯布院秀峰館酒店 

湯布院秀峰館酒店

湯布院秀峰館酒店位於湯布院溫泉區,係一間cp值高嘅嘅酒店。酒店好大,設施完善。外環境好好,房夠大又乾淨。

湯布院秀峰館酒店2

對住呢個山景對住山景真係超放鬆,四周比山群同稻田包圍,好有度假feel,咩都市壓力都冇哂啦 !雖然比離主要街道要走路要行15分鐘,不過飯店有免費嘅接駁車,而且距離由布院彩繪玻璃博物館同諾曼洛克威爾由布院博物館都係10 分鐘路程,夠哂方便。

湯布院秀峰館酒店3

如果有時間可以係酒店嘆埋個傳統懷石料理,呢到嘅溫泉料理嘅主餐係豐厚牛 shabu sai。豐厚牛係日本國產黑毛和牛嘅一個品牌,油花豐富肉質柔軟,大理石紋好吸引。

湯布院秀峰館酒店4

呢到嘅豐厚牛係自家牧場飼育,品質有保證 。唔想食涮涮鍋都可以叫醬燒,或者西式鐵板燒,一樣咁好食。所有套餐豐富又精緻,著住浴衣影相呃like一流!不過留意翻所有餐點都要係抵達前 1 日同飯店預約呀。

湯布院秀峰館酒店5

秀峰館有唔同類型嘅溫泉,一個係大型公共浴室,一個係半露天浴池,亦都有免費嘅足湯。呢度嘅半露天浴池比較特別,係位於4樓天台,可以比你俯瞰湯布院嘅風景。

湯布院秀峰館酒店6男溫泉區係面向山,而女嘅係面向稻田。小編推薦日頭去浸啦 ,咁就可以嘆埋個靚景啦 !

湯布院秀峰館酒店7房間方面就有榻榻米,日式床鋪客房同西式床鋪客房可以揀。如果係榻榻米客房,員工會係晚餐後入嚟鋪好榻榻米床墊,服務好周到呀!

 

湯布院秀峰館酒店 – 由布
地址:日本大分縣由布市湯布院町川上2415-2 (顯示地圖)
星級 | ★★★☆☆
位置 | ★★★☆☆
設施 | ★★★★☆
環境 | ★★★★★
價格 | 查看價格  

 

📖延伸閱讀: 東京近郊溫泉之旅:箱根溫泉酒店推薦
📖延伸閱讀:【北海道自由行】北海道溫泉特輯—露天溫泉食、玩、住全攻略!

 

 

日本溫泉禮儀一:著浴衣嘅正確方法

@popdaily

入住日本溫泉旅館,旅館都會提供一套浴衣,方便住客浸溫泉嘅時候著,但好多人並唔知道浴衣嘅正確穿法。最令人困惑嘅係,應該左邊衣襟覆蓋右面,定調返轉呢?其實,只要記住「左上右下」呢個口訣,姐係左衣襟覆蓋右衣襟,再綁好腰帶,就大功告成!千其千其千其(好重要所以要講三次)要記住呢個次序,唔好調轉「左下右上」咁著,因為喺日本,只有為逝者穿衣先用呢個次序㗎!

 

 

日本溫泉禮儀二:喺日本浸溫泉要「剝光豬」?

你冇睇錯,喺日本浸溫泉,係要脫光光先可以進入泉池㗎!由於溫泉水入面有礦物質,而衣物成分中含有化學纖維,有機會同溫泉水產生化學反應,令到泉水變質,嚴重更會令到溫泉水有毒,所以安全為由,喺日本浸溫泉係規定要一絲不掛㗎!

 

日本溫泉禮儀三:浸溫泉之前記得要沖身

因為衛生問題,浸溫泉之前記得要先沖身。日本溫泉屬於公眾地方(私人溫泉旅館另計),日本人非常注重衛生,所以喺進入泉池之前,要先將身體嘅污垢洗去!唔講唔知,喺日本污染公共浴場甚至會觸犯民事及刑事法㗎!通常日本溫泉都設有淋浴區,洗頭水、淋浴露等等全部都有供應,另外長頭髮嘅女士記得要用橡筋紮好頭髮先好浸啊!

 

日本溫泉禮儀四:毛巾須放頭上,千其唔好帶落水

去日本浸溫泉,或者你會發現好多日本人會將一條毛巾仔擺喺頭上面,係咪感到大惑不解呢?其實浸溫泉擺條毛巾喺頭上,並唔係咩日本潮流造型,唔好睇小一條毛巾,其實大有用處!由於溫泉溫度較高,為咗防止腦充血而不適,將毛巾濕水再放喺頭上可以有降溫同埋散熱之用。切記,日本溫泉唔可以帶任何衣物落水,所以毛巾都唔例外!

 

日本溫泉禮儀五:浴場內唔好高聲交談、傾電話等

@tamtaka37

無論你有幾咁日理萬機,每秒鐘幾廿萬上落而手機不離手,都請你先將所有事放埋一二邊,安靜享受短暫而美好嘅溫泉時光。日本溫泉一般都禁止講電話或喧嘩,請注重禮儀,安靜浸浴唔好影響其他人。當然,細細聲同身邊嘅人傾計係冇問題,只要唔會騷擾到其他顧客就可以。

 

日本溫泉禮儀六:進入泉池嗰陣,可以先同池中顧客點頭問好

日本人非常注重禮儀,即使冇眼神接觸,喺入泉池嗰陣,佢哋都會同池入面其他客人打招呼以示禮貌。所以,去到日本浸溫泉嗰陣,都不妨向身邊其他顧客點頭微笑,表示友好。唔識講日文都唔緊要,點一點頭、笑一笑,已經非常足夠!

 

 

📖延伸閱讀:【日本冬日限定美景】走進白色童話世界!日本白川鄉合掌村交通、酒店攻略
📖延伸閱讀:【北海道自由行】北海道登別自由行懶人包 (登別景點、必食推薦)

 

日本溫泉溫馨小提示:

@Flickr

除咗以上六個日本溫泉禮儀之外,仲有幾項溫馨提示都可以留意返!

 

浸完溫泉之後應唔應該沖涼?答案係唔洗!好多人慣咗沖一沖身先離開,但其實泉水含有好多有益嘅成分同物質,對身體好好㗎,所以浸完溫泉後,用毛巾輕輕拭乾身體就可以㗎喇!

 

浸溫泉都會令身體流失水分,所以浸完溫泉可以飲返杯水、茶或者牛奶。大多數浴場都設有飲品售賣機,浸完飲返杯野,爽哂!

 

浸溫泉之前可以先上廁所,以防浸浸下突然想去廁所,咁就尷尬喇!

 

有紋身者要注意,以前大部分日本浴場禁止有紋身者進入,因為日本傳統觀念係視紋身為黑社會嘅標誌,為咗唔會驚嚇到其他客人,大多禁止紋身者進入。不過近年,紋身越嚟越普遍,日本社會大眾慢慢接受咗,但以防萬一,去之前都記得check清楚浴場有否禁止紋身人士進入!

 

📖延伸閱讀:日本名古屋3日2夜行程懶人包!
📖延伸閱讀:日本大阪近郊-箕面景點行程懶人包!
📖延伸閱讀:【京都自由行】春日京都和服攝影,秘密景點大公開!(連京都櫻花必買手信)
📖延伸閱讀:【日本福袋攻略】日本新年又到!必搶日本福袋推薦2019!

 

Hotels.com 酒店優惠