定期送上世界各地最新、最地道嘅旅遊資訊!

【九州秘境】湯布院由布院景點、餐廳、住宿懶人包!

九州一向都係日本溫泉勝地,而由布院,又稱湯布院,更加係九州自由行必去地點!距離博多大概兩小時車程嘅由布院,有壯麗嘅由布岳同金麟湖,又有可愛嘅童話小村落,仲有數之不盡嘅甜品同美食,被譽為九州嘅世外桃源!小編已經為大家準備好一個由布院景點、餐廳、住宿懶人包,快啲book機票同酒店,一次過玩盡呢個九州秘境啦!

 

九州秘境|由布院景點推薦|湯之坪商店街

湯之坪商店街
@freepapple

去到日本,幾乎每一個地方都有商店街,相比起鬧市嘅連所店,近郊小鎮嘅商店街更具特色!嚟到由布院,湯之坪商店街可以話係必經之道。呢條商店街主要建築都係傳統日式平房,加上四周自然景色,喺到一邊漫步,走訪各種日式雜貨店,一邊食吓特色小食,真係好悠閒舒暢!

湯之坪商店街_2
@Deskgram
由布院オルゴールの森

商店街嘅店鋪非常有特色,每間都有獨特主題,好似呢一間由布院オルゴールの森就係原創玻璃手工作品同有超過1500種音樂盒嘅專賣店,可愛精緻嘅手工製品令人目不暇給!仲有專賣同貓,又或者係同狗有關嘅商品店,淨係行湯之坪商店街都可能會花上半日!

 

由布院オルゴールの森
地址:879-5102 大分県由布市湯布院町川上1477-1 (顯示地圖)
營業時間每日 09:00-17:30
網址:http://www.folcart.com/shop_info/20110808032803_11878.html

 

湯之坪商店街
地址:879-5102 大分県由布市湯布院町川上1524 (顯示地圖)

 

九州秘境|由布院景點推薦|金麟湖

金麟湖
@Flickr

由布岳山腳下嘅金麟湖係由布院最具代表性嘅景點!呢個並非係一個平平無奇嘅湖泊!由於湖底有三個溫泉眼,所以湖水其實係溫泉水!當氣溫比湖水凍嘅時間,水溫較熱嘅湖水就會開始蒸發,形成咗湖面仙氣霧漫嘅奇幻景象!

金麟湖_2
@Flickr

金麟湖四季如畫,春天綠意映然,夏天陽光照射湖面,金光閃閃充滿生氣,秋天漫天楓葉,冬天霧漫奇景!而且無論任個角度去觀賞金麟湖都係絕美!可以講得上係零死角嘅人間仙景,此生必到!

 

金麟湖
地址:日本〒879-5102 大分縣由布市湯布院町 (顯示地圖)

 

九州秘境|由布院景點推薦|歐洲童話村Yufuin Floral Village

歐洲童話村Yufuin Floral Village
@ameblo.jp

Yufuin Floral Village係以英國小鎮Cotswold為藍本而建成嘅童話小鎮,整個小鎮由黃泥磚小屋組成,加入咗歐陸風情嘅園林造景,仲有以歐洲童話同卡通人物,例如Peter Rabbit同飄零燕為主題嘅商品店,非常夢幻!雖然只係一條好短嘅村落,但每一個位置都係打卡影相位!令人少女心大爆發!

歐洲童話村Yufuin Floral Village_2
@Travostyle

Yufuin Floral Village最受歡迎嘅莫過於貓頭鷹森林!入面有多個品種嘅貓頭鷹,連電影《哈利波特》入面嘅Hedowigu同品種嘅貓頭鷹都可以喺呢度搵到!只需要成人¥600,小童¥400入場費,大家可以零距離接觸神秘而可愛嘅貓頭鷹,千祈唔可以錯過!

 

Yufuin Floral Village
地址:879-5102 大分県由布市湯布院町川上1503-3 (顯示地圖)

 

由布院交通攻略|JR特快列車 – 由布院之森

JR特快列車 - 由布院之森
@Flickr

去由布院嘅交通方法好多,但如果大家由福岡出發,小編推介大家一定要乘坐JR特快列車由布院之森。由布院之森由JR博多站出發,沿途風光明媚,仲會經過耳納群山同慈恩瀑布,透過車箱嘅窗戶已經可以飽覽名勝景色!由布院之森每日由博多出發往返由布院只有分別09:24、10:24同14:35三班列車。建議大家提早上JR網站預先購買全九州或北九州JR Pass,然後加¥1000預先劃位!由布院之森車票好搶手㗎,如果想坐到心水坐位就千祈唔好慳呢¥1,000啦!

JR特快列車 - 由布院之森_2
@Flickr

由布院之森唔單止沿途有靚景睇,列車本身都吸引到唔少鐵道迷嚟朝聖!綠色車身同四周綠樹林蔭呼應,車廂內主要由木製而成,加上絨布坐椅,充滿復古感!列車仲設有景觀車箱,乘客可以自由去景觀車箱,透過落地窗全方位欣賞景色!

 

九州秘境|由布院餐廳推薦|由布まぶし 心

由布まぶし 心
@blog.xuite.net

只要一搵由布院餐廳,無論係網絡定雜誌,都會大推由布まぶし 心!呢間餐廳主打大分縣頂級豐後牛料理。有別於一般燒牛肉或shabu shabu食法,呢度用豐後牛配上炊釜飯,鮮嫩多汁嘅牛肉同香噴噴嘅炊飯,未食都覺得係充滿療癒感嘅料理!令人無法抗拒!

由布まぶし 心_2
@yufumabusisin
豐後牛釜飯¥2,453

最人氣嘅分別係豐後牛、地雞同鰻魚釜飯,人多就梗係試哂三款,但如果只可揀一款,一定係豐後牛!餐廳對食釜飯都好講究,第一碗先食原味、第二碗配柚子胡椒同wasabi、第三碗加入特製高湯成為泡飯!每一碗都係無窮滋味!

 

由布まぶし 心
地址:879-5102 大分県由布市湯布院町川上1492-1 (顯示地圖)
營業時間:星期三至一 10:30-18:30
網址:http://yufumabusisin.com/

 

九州秘境|由布院餐廳推薦|花麹菊家

花麹菊家
@funtime

由布院其實係日本OL票選必中第一名旅遊勝地,相信除咗因為美景,呢度眾多人氣甜品店亦係迷倒不少OL嘅原因!既然有咁多選擇,梗係要食啲與別不同嘅甜品啦!喺湯之坪商店街有一間叫花麹菊家嘅菓子店,經常都人頭湧湧!為嘅就係人氣創意甜品布丁銅鑼燒!

花麹菊家
@kikuya-oita
布丁銅鑼燒 ¥777/4個

布丁銅鑼燒其實就係將銅鑼燒嘅豆沙餡換成布丁。老實講,一開頭對呢款甜品都抱有懷疑態度,軟綿綿嘅餅皮,再夾著滑溜溜嘅布丁,感覺入口只係會變成糊狀,想像唔到會有幾好食。但估唔到食落口又出奇地夾!佢地嘅銅鑼燒餅皮係比較有彈性,而布丁嘅濕潤反而平衡咗微乾嘅餅皮,加上濃濃焦糖香,成件事好完美!絕對唔可以錯過!

 

花麹菊家
地址:879-5102 大分県由布市湯布院町川上1524-1 (顯示地圖)
營業時間:每日09:00-17:45
網址:http://eshop.kikuya-oita.net/

 

九州秘境|由布院住宿推薦|湯布院溫柔之鄉旅館

湯布院溫柔之鄉旅館

湯布院溫柔之鄉旅館鄰近金鱗湖,行過去都只係5分鐘,好適合想晨早睇金鱗湖湖面霧漫嘅旅客入住!而酒店正正坐落於由布岳山,四周景色優美,而且酒店設備完善,服務周到,有專為小朋友而設嘅兒童遊戲區,係親子遊住宿嘅極住選擇!

湯布院溫柔之鄉旅館_2

旅客可以揀和洋合式又或者係傳統和式房間,房間設計簡單而溫馨!最重要係空間夠大!有足夠比大人休息同比小朋友跑跳嘅地方!

湯布院溫柔之鄉旅館_3

嚟到溫泉之鄉,選擇酒店嘅其中一個重點就梗係酒店溫泉有幾正啦!呢度設有室內外兩個公共溫泉,室外溫泉有精緻園林景,仲可以望到由布岳山景色!小編強烈推薦大家一定要夜晚嚟一邊浸溫泉,一邊欣賞夜景!

 

湯布院溫柔之鄉旅館
地址:JPN由布2717-5 Yufuincho Kawakami (顯示地圖)
星級 | ★★★☆☆  
位置 | ★★★★★
設施 | ★★★☆☆  
環境 | ★★★★★  
價格 | 查看價格  

 

九州秘境|由布院住宿推薦|由布院清香園日式旅館

由布院清香園日式旅館

如果鐘意環境比較寧靜清幽嘅旅客,就一定要入住由布院清香園日式旅館啦!雖然呢間酒店位置較遠,但以絕美景色取勝!四周圍比綠樹包圍,人煙較少,係放鬆身心,洗滌心靈嘅渡假好地方!酒店亦設有穿梭巴士往返由布院車站,只需訂酒店時預約定就得㗎啦!

由布院清香園日式旅館_2

傳統日式房間光猛整潔,絕對無舊式和式住宿嘅殘舊感覺,現代化設備齊全!無論房間位置向邊,只要一打開房內窗戶就可以睇到靚景!成個人relax哂啦!

由布院清香園日式旅館_3

建議大家可以揀附帶私人風呂嘅房間,隨時隨地都可以浸溫泉,仲可以買啲生果小食同清酒,一邊浸,一邊食都唔怕騷擾到人!真係好嘆!

 

由布院清香園日式旅館
地址:JPN由布1208-1 Yufuincho, Kawakami (顯示地圖)
星級 | ★★★★☆  
位置 | ★★★☆☆  
設施 | ★★★☆☆  
環境 | ★★★★★  
價格 | 查看價格  

 

📖延伸閱讀:【九州溫泉推薦特輯】日本九州溫泉一泊兩食酒店推介!(連浸溫泉注意禮儀)
📖延伸閱讀:【名古屋自由行】名古屋必買—長島三井Outlet、土岐Outlet攻略 (連Top 3名古屋必食餐廳推薦)
📖延伸閱讀:【日本便利店必食大全】日本7-11 vs 日本LAWSON大比併!人氣必食飯糰、炸雞、關東煮、零食、飲品逐一介紹!
📖延伸閱讀:【去旅行用日本app】超實用!日本旅遊app + 日本交通app推薦

 

Hotels.com酒店優惠Hotels.com酒店優惠