定期送上世界各地最新、最地道嘅旅遊資訊!

【巴黎美食地圖】朝聖人氣法國巴黎必食甜品店!

法國巴黎絕對係甜點迷嘅天堂,甜品店、蛋糕店、開到周圍都係,間間都精緻又華麗,仲匯聚咗全法國最勁的甜品大師。無論由視覺到味蕾上,都係一百分嘅享受!今次小編就同大家介紹三間喺巴黎最人氣嘅甜點店,食得再飽,都要記得留肚試下呀!

 

巴黎必食甜品店|朱古力大師即製法式千層酥 La Chocolaterie de Jacques Genin

巴黎最出名嘅朱古力大師之一Jacques Genin。Jacques Genin本身唔係學甜點出身,而係自學成才。佢曾經喺屠宰場度做學徒,後來去咗著名嘅朱古力店La Maison du Chocolat擔任甜點師。離開之後就開咗自己嘅工作室,為法國當地超過二百間高級餐廳同酒店供應優質嘅朱古力同焦糖。La Chocolaterie de Jacques Genin嘅門面低調,佔地兩層。店內裝潢簡約時尚,地下售賣招牌朱古力、焦糖、水果軟糖等,而一樓就係工場,所有朱古力及甜點都係喺店內製作,特別新鮮。

呢度嘅焦糖軟糖曾經一度掀起搶購潮!有成十款口味如朱古力、熱情果、開心果、薑等,入口超軟滑而唔黏牙,焦糖味超香,小編上次買咗一打放喺雪櫃再拎出嚟放室溫,都一樣咁軟滑!雖然要成一歐元一粒,但真心勁好食!

朱古力同樣高質,亦有好多特別口味。朱古力盒仲係用銀色金屬盒,送畀人做手信啱哂。

Mille feuilles Vanille €9

除咗朱古力,好多人專登嚟呢度試大師嘅甜點。每日供應嘅款式都唔同,小編就試咗勁多人推薦嘅千層酥 Mille feuilles,果然好有水準!酥皮層疊緊密又分明,一刀切落去就聽到清脆嘅碎裂聲,食落酥脆又有牛油香,夾雜中間柔滑不膩嘅吉士,好食到即刻想encore!但係甜點只限堂食,想食就要親自嚟食啦!


Tarte au citron €9

不過,令小編更有驚喜嘅就係檸檬撻。撻皮夠薄夠脆,仲有好香嘅杏仁味。中間嘅檸檬餡勁滑,有清新嘅檸檬酸香但又唔會酸到令人變樣。最特別係加咗羅勒,添加咗一陣高雅嘅清新,令味道更有層次,一試難忘!

 

巴黎必食甜品店|La Chocolaterie de Jacques Genin
地址:133 Rue de Turenne, 75003 Paris (顯示地圖
營業時間:星期二至日 11:00 – 19:00 (星期一休息)
網址:http://jacquesgenin.fr/fr

 

巴黎必食甜品店|摩登法式甜點 Gateaux et du pain

Gateaux et du pain 有別巴黎大部分主打傳統法式甜點嘅名店,Gateaux et du pain 走嘅係摩登創新風格,連店面都係一室黑調位主,好有型!呢度由法國有名嘅女甜點師Claire Damon所開設,佢曾經喺多間知名甜品店工作,包括Fauchon、Ladurée等,擅長運用當季時令食材做成甜品,而且賣相都好簡約精緻,唔會有花巧嘅裝飾。

精緻嘅甜點喺黑調襯托下好似一件件珠寶。


焦糖泡芙 €5.8/件

小編最鍾意焦糖泡芙,泡芙皮薄卻保持脆度,焦糖內餡飽滿又軟滑,微鹹的鹽味啱啱好平衡焦糖的甜膩。


牛角包 €1.5/個

呢度嘅牛角包亦係必試之一,隻隻烤得金黃挺身,咬落外脆內軟,而且牛油味勁香,好易食唔停口!

 

巴黎必食甜品店|Gateaux et du pain
地址: 89 Rue du Bac, 75007 Paris (顯示地圖
營業時間:星期一、星期三至六 10:00 – 20:00,星期日 10:00 – 18:00 (星期二休息)
網址:www.desgateauxetdupain.com

 

巴黎必食甜品店|傳統法式手藝 Sébastien Gaudard Pâtisserie

想食最好食嘅傳統法式甜品?小編大推呢間喺蒙馬特區域附近嘅 Sébastien Gaudard。主廚Sébastien Gaudard出身於甜點世家,耳濡目染下製作甜點方式都係依法式傳統。佢曾擔任過Fauchon,Pierre Herme嘅甜點師傅,仲喺Bon Marche 百貨公司獲得「甜點小王子」嘅封號。店內賣嘅全都係法國傳統口味甜點,好似栗子撻、Saint-Honore 法式焦糖泡芙撻、閃電泡芙、法式蘋果批等等,仲有餅乾、糖果、麵包……好多花款。


想食唔同口味嘅傳統法式甜點呢度都滿足得到。


栗子撻 €5.7/件

栗子撻係小編食過最好嘅,栗子蓉超濃郁又綿滑,中間啲蛋白霜輕柔唔過甜。


法式焦糖泡芙撻 €5.7/件

法式焦糖泡芙撻亦勁好味,三顆泡芙有層焦糖糖衣,食落多咗種脆口,雲呢拿吉士又香又滑,無論口感同味道都好balanced。

 

巴黎必食甜品店|Sébastien Gaudard Pâtisserie
地址:22 Rue des Martyrs, 75009 Paris(顯示地圖
營業時間:星期一至五 10:00 – 20:00,星期六 09:00 – 20:00,星期日 09:00 – 19:00
網址:www.sebastiengaudard.com

 

Hotels.com 酒店優惠