定期送上世界各地最新、最地道嘅旅遊資訊!

【香港手信篇】 Top 10 香港必買手信推薦 2019!

香港出名係一個美食天堂,唔同國家嘅美食佳餚都可以喺度搵到,但講到地道香港手信,可能好多人都講唔出有咩係香港必買。好多遊客嚟到香港可能淨係識買珍尼曲奇,但其實香港有好多特色手信都非常值得入手!今次就等喺香港土生土長嘅小編為大家介紹十大非買不可嘅特色香港手信,絕對本土製造!

 

 

香港必買手信|No.10 香港手信|公仔麵
@petersinyangyang9999

嚟到香港旅行,梗係要去茶餐廳食嘢感受下「港式」風味啦!茶餐廳有兩樣必食嘅嘢,分別係奶茶同公仔麵公仔麵方便快熟,食落爽口又彈牙,深得民心!香港有好多唔同嘅公仔麵品牌,當中最「本土炮製」就梗係「公仔麵」啦!「公仔麵」由香港富豪周文軒同有「公仔麵之父」之稱嘅王清熙喺49年前創立。至今已經推出咗多款口味,款款充滿香港特色,例如五香肉丁味、雪菜味等,好有本土feel㗎!

 

香港必買手信|No.9 香港手信|蜜蜂糖
@fionchungonon

相信蜜蜂糖係唔少香港八、九十後嘅童年回憶,小編仲記得細個嘅時係喺士多買係一蚊四粒,隨住時間流逝,而家蜜蜂糖價錢已經通漲,亦都換咗新嘅包裝,不過味道一樣冇改變。蜜蜂糖係小編嘅私心推薦香港手信,味道帶少少蜜糖甜味同檸檬酸味,如果想感受下香港情懷,絕對值得入手!不過留意,想買蜜蜂糖就要去士多或者細型嘅零食店先買得到。

 

香港必買手信|No.8 香港手信|雞仔嘜
@Facebook

如果想買一份窩心嘅香港手信,小編誠意推薦「雞仔嘜」呢個品牌!「雞仔嘜」1953年喺香港面世,當時香港經濟仲係起飛階段,「雞仔嘜」雖然喺呢段時期創牌,但冇受影響,而且憑住毅力同堅持,而家已經係家傳戶曉嘅本土香港品牌!品牌嘅標誌係隻雞仔,雞仔昂首闊步,象徵對當時社會嘅寄望,亦代表對未來充滿希冀,品牌背後充滿濃厚嘅香港精神。「雞仔嘜」推出咗一系列嘅舒適保暖衣物,質料好,送畀家人朋友夠哂貼心!

 

香港必買手信|No.7 香港手信|維他奶
@vitasoy

每個地方都有佢嘅特色飲品,韓國係香蕉奶,日本係波子汽水,咁講到香港就一定係維他奶維他奶1940年已經喺香港面世,係「維他奶國際」呢個品牌嘅主打產品。維他奶為品牌打響名堂,直到而家,全球各地都有生產廠房。品牌之後都推出咗其他飲品,例如檸檬茶、菊花茶同麥精等等,亦都大受歡迎。不過嚟到香港當然首選維他奶維他奶有淡淡奶香味,飲落甜甜哋,無論大人定小朋友都非常鍾意!

 

 

香港必買手信|No.6 香港手信|保濟丸
@joleeqh

去到日本,好多人都鍾意大手入貨唔同藥品,其實香港都一樣有好多本土藥品廠,選擇多亦都非常實用!當中保濟丸就係其中一款家傳戶曉嘅藥品!保濟丸係中成藥,專治腹痛腹瀉、腸胃不適、消化不良同暈車浪等。一樽入面有多粒深啡色藥丸,一次食一樽,好快見效,嚟到香港不妨買返幾盒看門口。

 

香港必買手信|No.5 香港手信|京都念慈菴喉糖
@t.oo.m.oo

京都念慈菴係清朝主要生產枇杷膏嘅老牌藥廠,產品專治傷風咳嗽或者喉嚨不適。後嚟,京都念慈菴將枇杷膏成份製成喉糖,推出咗幾款唔同嘅口味,包括金桔檸檬味、薄荷味、烏梅味同蘋果桂圓味等等。一罐入面有十幾粒,每一粒都獨立包裝,非常方便!喉嚨痛嘅時候食返幾粒,有紓緩作用!

 

香港必買手信|No.4 香港手信|和興白花油
@shionnu_san

1927年白花油喺馬來西亞檳城創立,1950年先喺香港註冊同大肆宣傳,去到而家品牌已經遍佈世界各地。和興白花油係一款萬用藥油,身體不適嗰時就大派用場,應用亦都非常廣泛,包括肚痛、頭暈、暈車浪、鼻塞、肌肉痛等等,只要拎少少搽喺不適位置,就有紓緩同減輕痛楚嘅功效,非常神奇!

 

 

香港必買手信|No.3 香港手信|「大排檔」茶包
@Facebook

大排檔係香港重要嘅飲食文化,嚟香港旅遊嘅旅客都必定會去大排檔食嘢,感受地道香港氣氛之餘又可以試下香港地道美食。想將大排檔風味原汁原味咁帶返去?小編推薦買「大排檔」茶包,將呢份「香港好味道」帶返屋企!「大排檔」亦推出咗一系列即沖飲品,包括港式奶茶、西冷紅茶、鴛鴦等等,掛住香港嘅時候就可以沖返杯喇!

 

香港必買手信|No.2 香港手信|齒來香蛋卷
@Facebook

齒來香係香港嘅老字號餅家,最出名係人手製作嘅蛋卷,而且全香港只有一間鋪,絕無分店!店家一直以嚟都堅持手工人手製作蛋卷,所以整出嚟嘅蛋卷特別有蛋香,唔單止香氣濃郁,咬落去仲份外鬆脆,非常好味!另外,肉鬆鳳凰卷亦都係鋪頭嘅招牌產品,肉鬆絲夾喺鬆化嘅蛋卷之中,好食到停唔到口!不過想買嘅朋友記得早啲去,有時生意好,去到晏晝已經賣哂㗎喇!

 

齒來香蛋卷
地址:香港西環西營盤第三街66號福滿大廈地下 (顯示地圖)
營業時間:09:00 – 19:00
交通:MTR西營盤C出口步行5分鐘

 

香港必買手信|No.1 香港手信|住好啲
@Facebook

住好啲係香港本土家居品牌,品牌1996年成立,以「香港品牌」作旗號,sell 本土同「香港製造」。品牌大部份產品都係自家設計,本土味濃厚,將香港特色或者懷舊嘅元素加入喺設計意念之中。品牌周不時會嘗試大膽設計,例如將香港粗口文化元素融入設計之中,玩味十足!住好啲嘅產品充滿香港特色,令人一睇就知係「made in Hong Kong」。


@Facebook

蘭桂坊係每個旅客必去嘅香港朝聖景點,買返個蘭桂坊 cushion 紀念一下就夠哂特別喇!

 

 

Hotels.com酒店優惠