定期送上世界各地最新、最地道嘅旅遊資訊!

【韓國手信2018】韓國超市必買零食手信推介!韓國芝士腸都榜上有名!

小編每次去韓國,都必定會去韓國超市大手入貨,囤積一大堆零食帶返香港,又可以當韓國手信送畀朋友!韓國超市又大又好行,零食種類亦都非常多,令人花多眼亂!今次小編為送上韓國超市必買零食Top 10,最hit、最好食嘅韓國零食一一為你介紹,下次去韓國旅行記得都唔好輸蝕,買返一打返香港!

 

📖延伸閱讀:【快閃濟州】濟州島4日3夜自駕遊行程!
📖延伸閱讀:【首爾新景點2018】韓國好去處—帶你玩盡首爾2018新景點!

 

必買韓國手信零食|Top 10|益力多棉花糖


@gtothek33

益力多係大家嘅童年回憶(可能你而家都仲會飲),早前韓國出咗一系列嘅益力多零食,包括益力多薯片、益力多軟糖同益力多杏仁等等,推出冇耐就大受歡迎!最近,樂天又有新搞出,推出咗益力多棉花糖!一袋有18粒左右,每一粒都獨立包裝,岩哂做手信派街坊啦。益力多棉花糖味道酸酸甜甜,同平時食開得個甜字嘅棉花糖比,非常有新鮮感,值得入手!

 

必買韓國手信零食|Top 9|No Brand芝士球

@instagram

No Brand係韓國E-Mart旗下嘅品牌,零食、生活用品應有盡有,而且價錢親民,係韓國近期最hit嘅品牌之一!而No Brand芝士球可以形容為「大件夾抵食」,一桶芝士波有成370g,大大桶,最岩一班朋友一齊開Party/睇戲食!芝士波有好濃嘅車打芝士味,食落非常脆口,去韓國記得買返桶喇!

 

必買韓國手信零食|Top 8|OSULLOC綠茶包

@Instagram

OSULLOC綠茶醬之前一推出令全個大韓民國陷入瘋狂,個個都爭住要買!其實OSULLOC除咗綠茶醬,佢哋推出嘅綠茶包都非常好飲!茶葉由濟州自家出產,佢並唔係普通嘅綠茶,每種口味都加入咗唔同嘅乾果,一打開包裝就會飄散住濃濃嘅果香味!神奇嘅係飲落去唔會有甜味,而係帶有果香嘅綠茶味!茶包入面並唔係茶葉渣,而係原條茶葉,物超所值!加上包裝非常高貴、精美,無論自用定當手信送禮都一流!

 

必買韓國手信零食|Top 7|SPREAD101牛奶曲奇醬

@Instagram

早幾年,韓國推出咗隻綠茶醬,吸引咗一大班人搶購,更加一度賣斷市!不過而家已經回復正常,大部分韓國超市都可以買到,唔洗再用海鮮價去買。今次Top7嘅韓國超市必買零食,並唔係綠茶醬,而係佢個朋友牛奶曲奇醬。呢隻曲奇醬有一粒粒曲奇碎粒,偏味道甜,用嚟搽麵包食就最啱喇!相信呢款曲奇醬好多女仔都會鍾意,男朋友們,識做啦!

 

必買韓國手信零食|Top 6|紅豆焦糖牛奶糖

@Instagram

樂天出品嘅呢款紅豆牛奶糖包裝已經好搶眼!包裝以紅色為主,非常突出,而紅豆焦糖嘅配搭,畀人感覺應該好甜,但食落其實唔會太甜,反而啱啱好,同時帶有濃郁嘅牛奶香味,就好似食緊紅豆味雪糕咁!

 

📖延伸閱讀:【韓國自由行】仲去首爾近郊?大邱一日遊景點連行程攻略!
📖延伸閱讀:【首爾米芝蓮 2018】實測五大米芝蓮餐廳食物水準!必食首爾美食逐個數!

 

必買韓國手信零食|Top 5|朱古力蝦條


@Instagram

呢款韓國版嘅卡樂B蝦條,係由樂天出品。脆卜卜嘅蝦條,配上香滑嘅朱古力外層,香脆又滋味,本身蝦條係鹹,配上朱古力嘅甜味,原來兩樣野係出奇地夾!鍾意食朱古力嘅朋友記住唔好錯過呢款韓國零食喇!

 

必買韓國手信零食|Top 4|Lego軟糖

@Instagram

相信唔少人都係Lego迷,Lego可能你就玩得多喇,但Lego軟糖你又食過未呢?早喺今年3月韓國就推出咗Lego軟糖,呢排推出咗升級版,軟糖同真嘅Lego一樣,每一粒都可以砌埋一齊,超得意!呢款Lego軟糖玩得又食得,去到韓國緊係要買啦!

 

必買韓國手信零食|Top 3|烏龜薯片

最近韓國年青人最鍾意嘅零食,一定非呢包烏龜薯片莫屬。包裝有大大隻烏龜,唔識睇韓文一眼都認得出。呢款烏龜薯片到底有咩吸引之處?就係每一塊薯片都有四層!想像一下,每食一塊薯片就等如同時食四塊薯片一樣,香脆口感提升四倍!呢包薯片唔似一般薯片咁大塊,其實應該用「一粒」去形容,一啖一粒,大推!

 

必買韓國手信零食|Top 2|流心芝士腸

@Instagram

芝士控注意!呢款流心芝士腸係近期最hit嘅韓國零食。惹味嘅魚肉腸其實內有乾坤,入面有超邪惡嘅芝士,咬一啖,入面嘅芝士好澎湃咁爭住湧出嚟,濃郁嘅芝士味充斥成個口腔!除咗流心芝士,仲有另一款藍色包裝嘅吞拿魚肉腸仔,一樣好好味!

 

必買韓國手信零食|Top 1|韓國辣雞麵 (2倍勁辣版)

@Instagram

韓國辣雞麵咁hit,唔洗多講相信你未食過都早有聽聞。今次排名Bloghotels.com韓國超市必買零食榜首嘅,就係韓國辣雞麵嘅2倍加強版!絕對唔講得笑,小編食正常版已經食到狂飲牛奶解辣,食完口水仲不受控制咁狂流。但越辣越過癮,加上麵條又爽又彈牙,非常之好味,真係令人又愛又恨。今年呢款辣麵強勢推出另一版本—2倍加強勁辣版,去到韓國當然要買返包挑戰一下!

 

📖延伸閱讀:【汗蒸幕特輯】三大必試韓國首爾汗蒸幕推薦!連常見問題Q&A
📖延伸閱讀:【坐首爾凌晨機】仲喺仁川機場過夜?Top 10 仁川機場酒店大評比!

 

韓國自由行| 首爾住宿推介|首爾新羅大酒店

首爾新羅大酒店1

首爾新羅大酒店係一間五星級嘅首爾酒店!環境超靚之餘,客房又夠哂大,最重要係大部分客戶都可以望到南山首爾塔,夜晚望住個咁靚嘅夜景入睡,真係人生一大樂事啊!而且酒店位置都非常好,鄰近東大門,方便住客夜晚四出覓食!

首爾新羅大酒店2

酒店嘅泳池又大景色又好,無論朝早起身定夜晚臨瞓前游返轉水都一樣咁正!成間酒店都充滿悠閒舒適嘅感覺,入住呢度即刻有渡假嘅感覺。

 

首爾新羅大酒店
地址:249, Dongho-ro, Jung-gu, 中區, 04605 首爾, 韓國 (顯示地圖)
星級 | ★★★★★  
位置 | ★★★☆☆  
設施 | ★★★★☆  
環境 | ★★★★★  
價格 | 查看價格  

 

韓國自由行| 首爾住宿推介|行政塔樓首爾樂天酒店

行政塔樓首爾樂天酒店1

行政塔樓首爾樂天酒店係你另一個首爾酒店住宿好選擇!酒店位置極方便,同地鐵乙支路 1 街站同埋樂天百貨公司相連,由地鐵站行幾分鍾就返到酒店,而且咁近樂天百貨,方便你 Shopping 血拚,買完好多戰利品都可以即刻返房擺底先!

行政塔樓首爾樂天酒店2

最冇得輸係酒店內設室內游泳池同桑拿室,就算唔出去留喺酒店都唔會怕悶啊!


行政塔樓首爾樂天酒店
地址:30, Eulji-ro, Jung-gu, 中區, 04533 首爾, 韓國 (顯示地圖)
星級 | ★★★★★  
位置 | ★★★★★  
設施 | ★★★☆☆  
環境 | ★★★★★  
價格 | 查看價格

 

韓國自由行| 首爾住宿推介|明洞 PJ 酒店

明洞 PJ 酒店1

明洞 PJ 酒店2明洞 PJ 酒店裝潢設計走時尚現代風,由酒店外表睇落已經覺得非常型格。酒店鄰近多個首爾景點,包括明洞、東大門等等,由酒店行去都只不過需要 5-10 分鐘。最貼心嘅係,酒店仲提供前往明洞同東大門市場嘅免費接駁車服務,唔想行都可以搭車!

 

明洞 PJ 酒店
地址:71, Mareunnae-ro, Jung-gu, 中區, 04548 首爾, 韓國 (顯示地圖)
星級 | ★★★★☆  
位置 | ★★★☆☆  
設施 | ★★☆☆☆  
環境 | ★★★☆☆  
價格 | 查看價格

 

 

Hotels.com酒店優惠